۳۱ دئکابر دونیا آزربایجان تورکلرینین بیرلیک گونو
و ۲۰۲۶-جی ایل قوتلو اولسون
گونئی آزربایجان قورتولوش پارتیاسینین بیلدیریشی
۳۱ دئکابر دونیا آزربایجان تورکلرینین بیرلیک گونو – ۱۸۲۸-جی ایلدن اعتباراً میللتیمیزه زورلا قبول ائتدیریلمیش پارچالانمایا قارشی میللی دیرنیشین و بوتؤو آزربایجان ایدهآلینین سیموولودور. بو گون «آزربایجان تورک میللتی»نین یئنیدن بیرلیگه و اورتاق گلهجگه اولان ایرادهسینین آنلامیدیر.
گونوموزون گرچکلرینه گؤره، ۱۹۸۹-جو ایلین ۳۱ دئکابر دایانیشماسینی آشاغیداکی باشلیقلاردا سیرالاماق اولار:
آ) بیر میللت – ۵۰ میلیونلوق آزربایجان تورک میللتی،
ب) بیر دؤولت – آزربایجان رئسپوبلیکاسی،
ج) بیر بایراق – آزربایجان دؤولت بایراغی،
د) بیر دؤولت باشچیسی – آزربایجان پرئزیدنتی،
پ) میللی-سیاسی ایراده – گونئین ایستیقلالی، بوتؤو آزربایجان دؤولتچیلیگینین قورولماسی
بو بیرلیک اولکوسونون قازانماسی اوچون:
- گونئی آذربایجاندا و دیگر بؤلگهلرده ایران آدلانان فارس دؤولتچیلیگینین چاتیسی آلتیندا اسارتده قالان ۴۰ میلیونلوق سویداشیمیزین آپاردیغی اؤلوم-دیریم موباریزهسی بوتون تورک میللتینین میللی داواسی کیمی قبول ائدیلمهلیدیر. گونئین آزادلیغی میللی زوروملولوقدور.
- ایران رئژیمینین زیندانلاریندا ازیلن میللی فعاللارین سسی، عائلهلرینین و اوشاقلارینین آجیسی دقتدن کناردا قالمامالیدیر.
- تعقیب و تضییقلر سببیله قوزئی آزربایجانا و تورکیهیه سیغینمیش گونئی آزربایجانلیلارین حقوقی و اینسانی مدافعهسی دؤولت و میللت ویجدانینین گؤستریجیسی اولمالیدیر.
- میللی بیرلیک ایدئیاسینی داشییان مئدیا، اینفورماسیا و اجتماعی پلاتفورمالار یارادیلمالی، گونئی آزربایجانین سسی اولوسلاراراسی عالمده سیستملی شکیلده دویورولمالیدیر.
- گونئی آزربایجان میللی-سیاسی قوروملارینا صاحب چیخماق، اونلارین موباریزهسینی اؤز موباریزهسی بیلمک میللتیمیزین و دؤولتیمیزین گوندلیگیندن دوشمهمهلیدیر. ۳۱ دئکابر روحو شوعار یوخ، عمل طلب ائدیر.
- دونیایا سپلنمیش آزربایجان تورکلرینین سیویل تشکیلاتلانماسی و اورتاق ایستیقامتده فعالیت گؤسترمهسی میللی گوجوموزون باشلیجا دایاغیدیر. آزربایجان دیاسپورا اوزره دؤولت کومیتهسی بو یولون باش معماری اولاراق دستکلنمه لیدیر.
۳۱ دئکابر ۱۹۸۹-جو ایلده میللتیمیز روس–فارس سرحد مفتیللرینی سؤکهرک سؤزله دئیل، عمل ایله بیرلیک ایرادهسینی اورتایا قویدو. بو گون قوزئی میز دؤولت صاحیبیدیر، گونئی میز ایسه گوجلنن میللی حرکاتا مالیکدیر. بونا گؤره ده میللی بیرلیک عملی مؤقعیه چئوریلمهلیدیر.
یاشاسین ۵۰ میلیونلوق آزربایجان تورک میللتی!
یاشاسین ۳۱ دئکابر – میللی بیرلیک و همرایلیک گونوموز!
گونئی آزربایجان قورتولوش پارتیاسی
۲۸.۱۲.۲۰۲۵
