ترورسوز گونئی آزربایجان، ترورسوز تورکیه دئمکدیر!
آزربایجان قورتولوش پارتیاسی نین بیلدیریشی
سون گونلرده آمریکا و ایسرائیل طرفیندن ایرانین حربی و سیاسی آلت یاپیلارینا قارشی حیاتا کئچیریلن گئنیش آلانلی هوجوملار ایران دؤولتینین گله جگی ایله باغلی یئنی و سون درجه کریتیک بیر سونوجون باشلاندیغینی گؤستریر. بو سورج سونوندا ایرانین حربی و تهلوکهسیزلیک ایستروکتورلارینین جدی شکیلده دارما-داغین اولدوغو و اؤلکهنین سیاسی سیستئمینین گله جگی ایله باغلی چئشیدلی سناریلرین گوندهمه گلدیگی گؤرونور.
گلوبال سیاسی آلانلاردا ایرانین گله جگی ایله باغلی جدی احتیماللار موذاکیره ائدیلیر: مؤوجود رئژیمین دییشمهسی، سیستم داخیلینده اصلاحات و یا ترانسفورماسیا، فئدئرال مودئله کئچید، دؤولتین پارچالانماسی و یا یئنی سیاسی قورولوشلارین یارانماسی کیمی سناریلر آرتیق آچیق و آیدین فورمادا موذاکیره قونوسونا چئوریلمیشدیر. بو پروسئس ایرانین ایندیکی سیاسی قورولوشونون درین چیخماز ایچینده اولدوغونو گؤستریر.
گونئی آزربایجان قورتولوش پارتیاسی بیلدیریر کی، ایران داخیلینده باش وئرهجک هر هانسی سیاسی دئیشیکلیک و یا یئنی سیاسی دوزهنین قورولماسی کئچیدی آزربایجان تورک میللتینین «آزادلیق-عدالت-میللی حکومت» ایرادهسینی نظره آلمادان حیاتا کئچیریله بیلمز. ایرانلی و یا ایرانسیز بؤلگهنین گله جگی گونئی آزربایجانسیز اولوشا بیلمز.
گونئی آزربایجان تورپاقلاری هئچ بیر بؤلگه سل و دونیا گوجلرینین گئوسیاسی پلانلارینین و مهندیس اولونموش ائتنیک پروژه لرینین تطبیق ائدیلجه گی بیر ساحه اولا بیلمز. اؤزللیکله اورمو بؤلگهسی و گونئی آزربایجانین باتی زولاغینین ائتنیک و ترور یؤنوملو سلاحلی قروپلارین یئرلشدیریلمهسی و یا یئنی حربی کوریدورلارین یارادیلماسی جهدلری بؤلگهده تهلوکهلی قارشیدورمالار یارادا بیلر و بو جور پلانلار قطعی شکیلده رد اولونور.
تورکیه جمهوریتینین حیاتا کئچیردیگی «ترورسوز تورکیه» ایستراتئگیاسی بؤلگهده تئررور ایستروکتورلارینین آرادان قالدیریلماسینا یؤنلمیش لئگیتیم و گرکن تهلوکهسیزلیک سیاستیدیر. بو ایستراتئگیانین ائتکیسیزلشمهسی و یا ترور قروپلارینین یئنی جغرافیالارا یؤنلدیلمهسی یالنیز بؤلگهده داها بؤیوک تهلوکهسیزلیک بحرانینا سبب اولا بیلر.
عینی زاماندا آزربایجان پرزیدنتی نین وورغولادیغی «۵۰ میلیونلوق آزربایجان خالقی» گئرچه گی بؤلگهده فورمالاشاجاق هر هانسی یئنی سیاسی دوزهنین نظره آلمالی اولدوغو درین گئوسیاسی رئاللیقدیر. آزربایجان تورک میللتینین حقوقلاری و تهلوکهسیزلیگی نظره آلینمادان بؤلگهده داواملی ثابتلیک قورماق مومکون دئیلدیر.
گونئی آزربایجان قورتولوش پارتیاسی بیان ائدیر کی، ایرانلی و ایرانسیز بؤلگه گله جه گینده یاراناجاق هر هانسی یئنی سیاسی کئچید سورجینده گونئی آزربایجان تورکلرینین اؤز میللی ایرادهسینی سئچمه حاقی آنا پرینسیپ اولمالیدیر. گونئی آزربایجانین گله جگی یالنیز بو تورپاغین یئرلی خالقینین ایرادهسی ایله معین ائدیله بیلر و بو ایراده گونئی آزربایجانین میللی وارلیغینی و میللی مستقل پئرسپئکتیوینی احاطه ائدیر.
گونئی آزربایجان قورتولوش پارتیاسی (گاقپ)
