گونئی آزربایجان تشکیلاتلاری امکداشلیق شوراسی»نین (گاتش) بیر گونلوک ایستوکهولم میتینقی و توپلانتیسی ایله باغلی گونئی آزربایجان قورتولوش پارتیاسینین (گاقپ) قیسا دَیرلندیرمهسی
تاریخ: ۱۳ دئکابر ۲۰۲۵
مکان: ایسوئچ – ایستوکهولم
۲۰۲۵-جی ایل ۱۳ دئکابر تاریخینده ایسوئچین ایستوکهولم شهرینده گونئی آزربایجان تشکیلاتلاری امکداشلیق شوراسینین (گاتش) چاغیریشی ایله ۲۱ آذر میللی حرکاتینین ۸۰-جی ایلی موناسیبتیله آنیم و دیرلندیرمه ائیلهمی کئچیریلدی. عینی زاماندا گاتش پلاتفورماسی ایجتیمایته تقدیم اولوندو.
ائیلهم ایکی حیسهدن عبارت اولدو. ساعت ۱۰:۰۰–۱۱:۳۰ آرالیغیندا ایران ایسلام رئسپوبلیکاسینین ایستوکهولم شهریندهکی سفیرلیگی قارشیسیندا اعتراض میتینقی کئچیریلدی. آردینجا ساعت ۱۳:۰۰–۱۸:۰۰ آراسیندا اسکاندیک ایستار سولنتونا هتلی سالونوندا بئش پانئللی گئنیش توپلانتی باش توتدو. ائیلهمده آوروپا و دونیانین مختلف بؤلگهلریندن گلمیش ۱۰۰–۱۲۰ نفر گونئی آزربایجان فعالی و دعوتلی قوناق ایشتیراک ائتدی.
توپلانتینین آچیلیش پانئلینده گاتش پلاتفورماسینین یارانما آماجی، ایش پرینسیپلری و گلهجک یول خریتهسی تانیدیلدی. بیرینجی و ایکینجی پانئللرده گاتش-ا عضو قوروملارین تمثیلچیلری آزربایجان تورکجهسینده چیخیش ائدرک گونئی آزربایجانین میللی، سیاسی و حقوقی ایستکلرینی آچیق شکیلده دیله گتیردیلر.
اوچونجو پانئلده ایران داخیلینده یاشایان عرب، بلوچ، گونئی تورکمنیستان تورکلری، قاشقای تورکلری و خوراسان تورکلرینین سوروملولاری چیخیش ائدرک اؤز خالقلارینین دورومو، اوزلشدیکلری باسقیلار و اورتاق سورونلار حاقیندا مؤقعلرینی بیلدیردیلر. بو چیخیشلار ایرانین چوخ میللتلی یاپیسینی و اورتاق موباریزه احتیاجینی بیر داها آچیق شکیلده اورتایا قویدو.
دؤردونجو پانئلده هر هانسی قوروما باغلی اولمایان آیدینلار، یازارلار و دوشونجه آداملاری، هابئله گاتش اویه اولمایان تشکیلات منصوبلاری گونئی آزربایجانین بوگونکو دورومو و گلهجک یؤنو ایله باغلی باخیشلارینی پایلاشدیلار. بئشینجی پانئل ایسه گاتش سوروملولارینین ایشتیراکی ایله سورغو-جاواب شکلینده کئچیریلدی. توپلانتینین آنا دیلی تورکجه اولسا دا هر کس ایسته دیگی دیلده دانیشدی.
گاقپ اولاراق وورغولاییریق کی، بو ائیلهمین اساس آماجی گونئی آزربایجانین بؤلگهده فورمالاشان یئنی سیاسی شرایط ایچینده گلهجک مؤوقئینی گوجلهندیرمک اولموشدور. بو گون اورتا دوغونون سیاسی گوندهمی گونئی آزربایجان مسئلهسینی گؤرمه مزلیگه وورماغا چالیشسا دا، ۴۰ میلیونلوق تاریخی بیر خالقین ایرادهسینی و وارلیغینی بؤلگهنین سیاسی حسابلاریندان سیلمک مومکون دئیل.
عینی زاماندا آچیق شکیلده قئید اولونمالیدیر کی، گونئی آزربایجانین یئرالتی و یئروستو ثروتلری، باشدا معدنلر اولماقلا، عین حالدا عرب بؤلگه لرینین نفت یاتاقلار اوزون ایللردیر مرکزه و فارسیستان آدلانان بؤلگهلره داشینیر. بو ثروتلر گونئی آزربایجانین، عرب–اهواز بؤلگهسینین و ایراندا یاشایان دیگر خالقلارین ریفاهی اوچون دئیل، فارسچی و شعوبی رئژیمین سیاسی وارلیغینی قوروماسی و بؤلگهدکی نیابتی سلاحلی و تئررور قروپلارینین مالیلشدیریلمهسی اوچون ایستیفاده اولونور. بو تالان سیاستینین نتیجهسینده اورتا دوغو آتشه وئریلیر، اینسانلیق بؤیوک ایتکیلر یاشاییر، ایراندا یاشایان خالقلارین گئنیش بیر قیسمی ایسه یاشام ائشیگینین آلتینا سوروکلنمیش، جمعیتین تخمیناً ۶۰ فایزی آجلیق و یوخسوللوق حدینه یاخینلاشمیشدیر.
بو چرچیوهده خصوصی اولاراق وورغولانمالیدیر کی، بو گون ایران رئژیمینین زیندانلاریندا یوزه یاخین تانینمیش و سایسیز تانینمامیش آزربایجان میللی حرکاتی (آمح) فعالی، ائلجه ده مینلرله قئیری-فارس خالقلارا منسوب اینسان یالنیز میللی کیملیگی، دوشونجهسی و حاق سسینی دیله گتیردیگی اوچون توتولو وضعیتده ساخلانیلیر، بیر قیسمی ایسه اعدام تهلوکهسی ایله اوز-اوزدیر. گونئی آزربایجان قورتولوش پارتیاسی (گاقپ) بو سیاستی آچیق سیاسی باسقی و اینسانلیق سوچو اولاراق دیرلندیریر و بوتون سیاسی محبوسلارین درهال آزاد ائدیلمهسینی، اونلارین نورمال حیاتا قوووشدورولماسینی طلب ائدیر.
گاقپ-نین ایستیقلال دوروشو
گونئی آزربایجان مسئلهسی یالنیز دیل، مدنیت و حقوق سورونو دئیل. بو مسئله تام بیرمیلی – سیاسی ایستیقلال مسئلهسیدیر. گونئی آزربایجان خالقینین تاریخی، سایی، جوغرافیاسی و میللی ایرادهسی یاریمچیق و کئچیجی چؤزوم مدل لرینی قبول ائتمیر.
گاقپ اوچون بو موباریزه تکجه میللی ایستکلر اوغروندا دئیل، اینانجلاردان و کیملیکلردن اوستون اولان بیر اینسانلیق موجادیلهسی، باریش، عدالت، چاغداشلیق و آزاد یاشام حاقی اوغروندا آپاریلان اورتاق بیر یولدور. استکهولم توپلانتیسی نین آنا شوعاری اولان « آزادلیق ـ عدالت ـ میللی حکومت» بیر داها آزربایجان تورک میللتینین۲۱ آزردن سونرا توکولن ۳۰.۰۰۰ میللی شهید قانینا باغلیلیغینی گؤسترمیش اولدو.
گونئی آزربایجان قورتولوش پارتییاسینین (گاقپ) مؤوقئیی آچیق و دییشمزدیر:
گونئی آزربایجانین گلجه گی یالنیز آزاد، موستقیل و اؤزطالعینه باغیمسیزجا صاحب بیر سیاسی قورولوش اولاجاقدیر. هئچ بیر فارس مرکزلی ایداره ائتمه آنلاییش بو گئرچه گی دییشه بیلمز.
ایستوکهولمدا کئچیریلن بو ائیلهم بیر داها گؤستردی کی، گونئی آزربایجان آرتیق سوسان دئیل؛ اؤز یولونو، اؤز سؤزونو و اؤز ایستیقلال هدفینی آچیق شکیلده اورتایا قویان بیر میللتدیر. بو یول گئری دؤنمزدیر.
گونئی آزربایجان قورتولوش پارتیاسی (گاقپ)
۲۰۲۵/۱۲/۱۵
