آزربایجان –تورکیه استراتژیک بیرلیگی و گونئی آزربایجانین ژئوپولیتیک اؤنمی ایله باغلی گونئی آزربایجان قورتولوش پارتیاسی،نین بیلدیریشی
آزربایجان رئسپوبلیکاسینین پرزیدنتی نین کمکچیسی – پرزیدنت ادارهسینین خارجی سیاست شعبه سینین مدیری سایین حیکمت حاجی یئوین تورکیه مدیاسینا وئردیگی گئنیش روپرتاژدا وورغولادیغی چوخ اؤنملی سؤزلر سرعتله گلوبال مدیادا یئر آلدى. گئنیش سوال-جوابدا اؤزلیکله آزربایجانین ایکی ساواش آراسیندا قالدیغی و گَرگین تهلوکهسیزلیک سیاستی یوروتدویونو بئله سؤزلرله دیله گتیردی: ژئوپولیتیک باخیمدان رژیونوموزدا وضعیت چوخ چتیندیر. باکودان ۲۰۰ کیلومتر جنوبدا ایران، آمریکا و اسرائیل آراسیندا ساواش گئدیر. ۲۰۰ کیلومتر شمالدا ایسه روسیه–اوکراین ساواشی دوام ائدیر…. بیزیم قارداشلاریمیز سرحدین، آراز چایی نین او تایندا یاشاییر. بیرینجیسی، اَراضیلریمیزین آزادلیغی و سوورنلیگی بیزیم اوچون فوندمنتال پرینسیپلردیر. ایکینجیسی، آزربایجان هیچ واخت اؤز اَراضیسیندن قونشو اؤلکهیه موداخیلهیه ایمکان وئرمز. اوچونجوسو، اورادا بیزیم وفا بورجوموز وار. سرحدین او تایندا یاشایانلار، دئدیگیم کیمی… بیزیم قارداشلاریمیزدیر.
سایین حاجییئوین سؤیله دیگی سؤزلرین آنلامیندا تکجه جغرافی سرحدلر دئیل، همده دیپلوماتیک ایفاده ایله گونئی قافقاز و اورتادوغونون ژئوپولیتیک رئاللیغیندا دایانان قوزئی–گونئی و تورکیه فاکتورو دیقت چکمکدهدیر. او، میلیونلارلا آزربایجان تورکونون یاشادیغی گونئی آزربایجان جغرافیاسینا آچیلان قاپییا ایشاره ائدهرک، بؤلگهده باش وئرن هر بیر سیاسی، تهلوکهسیزلیک و اینسانی گلیشمهنین آزربایجان اوچون میلی تهلوکهسیزلیگی اولدوغونو وورغولاییر. اونون سؤزلرینده آزربایجان و تورکیه آراسیندا وار اولان – «بیر ملت–ایکی دولت!» – استراتژیسی ایسه بؤلگهنین باریش و دنج حیاتی اوچون اؤنملی فاکتور کیمی گؤزه چارپیر. بو امکداشلیغین ماهییتی هر ایکی دولتین اؤز میلی منافعلرینی قوروماغلا یاناشی، یاخین سینیرلاردا تورک وارلیغینین دا قورونماسی اوچون گوج فاکتورو کیمی اورتایا چیخیر.
تورکیهنین اولمادیغی ماسادا آزربایجان وار، آزربایجانین اولمادیغی ماسادا ایسه تورکیه وار. سایین حیکمت حاجییئوین دیله گتیردیگی بو معنالی ایفادهنین آرخاسیندا ایکی باغیمسیز دؤولتین استراتژیک اَمکداشلیق ایرادهسی ده آچیقجا اؤزونو گؤستریر. طبیعی کی، گونئی آزربایجانین ژئوپولیتیک دورومودا محض بو استراتژیک چارچیوهسینده دوشونولمه لیدیر. بؤلگهده یاشایان میلیونلارلا آزربایجان تورکونون حقلاری، تهلوکهسیزلیگی و یاشام حقی یقین کی، بو استراتژینین تام مرکزینده یئر آلمالی، گونئی قافقاز و یاخین شَرقده اوزون سورکلی باریش اورتامیندا یاشامین و قارشیلیقلی سایغین اَمکداشلیغین تامیناتی اولاراق گؤرونمه لیدیر.
بو اوزدن، سایین حیکمت حاجییئوین طرفیندن «ایکی سرحد» سؤزونون وورغولانماسی ژئوپولیتیک باخیشلا ایزلنمه لی، گؤرونمه لی و اینجه لنمه لیدیر.
گونی آزربایجان قورتولوش پارتیاسئ
2026/8/8
