«گونئی آذربایجان قورتولوش پارتیاسینین ۲۹ اکیم بایرامی ایله باغلی بیلدیریشی»
بؤیوک تورک میللتینین اؤلوم-دیریم ساواشینین قان باهاسی اولان ابدی تورکیه جومهوریتینین ۱۰۱-جی ایلدؤنومو قوتلو اولسون.
تورک دونیاسینین ان بؤیوک بایرامی اولان ۲۹ اکیمین دوغوشوندان ایللر کئچسه ده، اوفوقلری گونو-گوندن پارلاماقدادیر.
۱۹۲۳-جو ایل اوکتیابرین ۲۹-دا تورک میللتینین دیره نیشینین سیموولو اولان آزاد، موستقیل تورکیه جومهوریتینین دوغوشو، قورتولوش ساواشینین ظفر سونوجو اولاراق، قاضی مصطفی کمال آتاتورکون تاریخی ایمضاسی ایله دونیایا دویولدو.
آتاتورک ایستیقلالیتین اعلان ائدیلدیگی گون نه اوچون دونن دئیل، صاباح دئیل، آنجاق بو گون اولدوغونو بئله آچیقلامیشدیر:
«وطنیمیزی ایشغال آلتیندا بوراخان موندروس آنلاشماسی گونو ۳۰ اکیمدیر. بونا گؤره ایستیقلالین اعلانینی (موندروس آنلاماسینین) بیر گون اؤنونه چئکدیک.
۱۹۱۸-جی ایل ائکیمین ۳۰-جو گون میللتیمیزین، یوردوموزون پارچالانماسینا سبب اولان موندروسون (موقاویلهنین) ۵-جی ایلدؤنومو اولاردی. تورک میللتی ۵ ایل ظلم و اسارتده قالامازدی! بونا گؤره ده بیر گون اؤنجه، اکیمین ۲۹-دا تورکیه جومهوریتینی اعلان ائتدیک».
گونئی آذربایجان قورتولوش پارتیاسی بو بؤیوک تورک بایرامینی قوتلاییر، تورکیه جومهوریتیمیزین سؤنمز آی-اولدوزونون گوندن-گونه پارلاماسینی اومار.
بؤیوک آتاتورکون دئدیگی کیمی، تورک میللتی ۵ ایل اسارتده قالا بیلمز! آنجاق آذربایجان تورک میللتی ۲۰۰ ایلدیر کی، روس-اینگیلیس-فارس بیرلشمهسینین باسقیسی آلتیندا ازیلیر. ۱۸۰۵-جی ایل کورکچای، ۱۸۱۳-جو ایل گولوستان و ۱۸۲۸-جی ایل تورکمنچای موقاویلهلرینین طبیعی نتیجهسی اولاراق، اینگیلتره-روسیا لایحهسی اساسیندا ۱۰۰۰ ایللیک آذربایجان تورک هئگئمونلوغونا سون قویان آزلیق فارس فاشیزمی آلتینا دوشن آذربایجان دؤولتچیلیگی ۱۹۲۵-جی ایلده ایشغال ائدیلدی.
قوزئی آذربایجان ۱۹۹۰-جی ایلده سووئت دؤولتینین داغیلماسی ایله اؤز آزادلیغینی الده ائتسه ده، ۴۰ میلیونلوق گونئی آذربایجان و ایران آدلانان اؤلکهده اینلهین تورکلرین ایستیقلال ساواشی سورور. سؤزسوز کی، قورتولوش موجادیلهسینده اولان تورک میللتینین اؤز سویوندان، بویوندان اولان قارداشلاریندان کؤمک گؤزلهمهسی چوخ دوغال ایستکدیر.
تورک میللتی بو آلچالدیجی ایشغالدان بیر آن اؤنجه قورتولمالیدیر.
(گونئی) آذربایجان میللی حرکاتی چوخ میلیونلوق میللی قورتولوشچو گوج اولاراق بوتون ایمکانلارینی گونئی آذربایجانین آزادلیغی اوچون سفربر ائتمکدهدیر. فاشیست فارس دوشمن رئژیمینین ظلمونه معروض قالان، حبس اولونان، زیندانلاردا شرف و لیاقتی تاپدانان تورکچو گنجلرین سایی هر گون آرتیر.
طبیعی کی، بو آغیر ایستیقلال ساواشینا گئدن یولدا تورکیهنین و تورک دؤولتلرینین مادی و معنوی دسته گینه احتیاجیمیز وار.
گونئی آذربایجان تورک جومهوریتینین یارادیلماسی هم ده بوتؤو، بؤیوک آذربایجان دؤولتی و توران بیرلیگی اوچون واز کئچیریلمز فاکتدیر.
گونئی آذربایجان قورتولوش پارتیاسی باشقانی ائلدار قاراداغلی
۲۸/۱۰/۲۰۲۴
