گونئی آزربایجان قورتولوش پارتیاسینین یول خریته‌سی
گونئی آزربایجان قورتولوش پارتیاسی (گاقپ) دؤولت پروگرامیندان آلینمیش تاسلاقدیر.
ائدیتؤر: ائلدار قاراداغلی
گونئی آزربایجان قورتولوش پارتیاسی نین یول خریته‌سی نئچه آشامالی ایستراتئژیک یاناشمادان ایر‌لی گلمکده‌دیر. بو یول خریته‌سی اسیر میللت و تورپاغیمیزین میللی قورتولوشونو آماجلارکن، اویانیش، دیرنیش، سیاسی قورومساللیق، اقتصادی، علمی، ائیتیم، اسپورت، اینجه صنعت، موسیقی، ادبی اینکیشاف و ایلکر(پرنسیپ) میللی کوتله وی آیاقلانما، دیپلوماتیک چالیشما، دیاسپورا و توپلومسال سفربرلیک کیمی باشلیقلار اوزرینده دایانیر:
۱. سیاسی یول خریته‌سی:
۱.۱. میللی قورتولوش و تام باغیمسیز دؤولتچی‌لیک آماجی؛
– گاقپ-نین آنا ایدئولوژیک یؤنو تورکچولوک اوزرینده‌دیر. ۵۰ میلیونلوق آزربایجانا اؤزه ل ایدئولوژیک ایسه «آزربایجان تورکچولویو»دور. بو ایدئولوژینین ایلک آیاغی: گونئی آزربایجانین تورک جومهوریتی‌دیر. بوتؤو آزربایجان دؤولتی و توران بیرلیگی «آزربایجان تورکچولوگو»نون اولمازسا اولمازلاریدیر.
– گاقپ، آزربایجان تورک میللتی آراسیندا میللی ایدئیانین یاییلماسینی و میللی-سیاسی اؤرگودلنمه‌نی اؤن گؤرور. اونون تئوریک و پراکتیک گوجونون آرتماسی اوچون اؤزه‌ن گؤسته ریر.
۱.۲. سیاسال قورومساللاشما؛
– گاقپ-نین ایچری قولونو اولدوقجا گیزلی توتماق، دیشاری قولونو اولدوقجا آچیق، یاریم آچیق و گئنیش توتماغا چالیشیر.
– ایستیقلالچی قوروملارلا سورکلی ایلگی قورماغا چالیشیر.
– بو قوروملارین لیدئرلیک اورقانلارینی بیر آرایا گتیرمه‌یه چالیشیر.
– گاقپ، میللی مانیفستینی، ایستراتئژی پلانلارینی مئدیا آراجلاریلا یایماغا اؤزه‌ن گؤستریر.
۱.۳. میللی-سیاسی چالیشما مکانیزمی؛
– ایران ایچینده باسقیلی فارسچی رئژیمینین آتموسفرینه اویغون اولاراق میللی-سیاسی فعالیت ائدیر.
– سورگونده وار اولان گونئی آزربایجان قوروملاری ایله امکداشلیغا کسین باخیر.
– ایران ایشغالیندا اولان غیری فارس خالقلارین میللی موجادیله‌سینه تام دستک وئریر. اونلارلا، چوخ بوداقلی ایشبیرلیگینی اولوملو و گرکن ساییر.
– تهران فاشیزمینین تورک میللتینه و تورپاقلارینا قارشی یؤنله‌ندیر‌ن ائتنیک تئرور قوروپلاریلا تورلو ماسا گؤروشلرینی، گیزلی آنلاشمالاری، ایرانچیلیق اویونلارینی کسینلیکله قیناییر.
– ایچری و دیشاریدا پوسگویه یاتان فارسچی، ایرانچی قوروملارا تورک میللتیندن داها چوخ اومود بسله‌ین و اونلارین شعوبی رئژیمدن داها درین آنتی-تورک اولماسینا گؤز یومان اؤزوموزدن اولانلاری کسینلیکله قیناییر.
– ایران آدلانان اؤلکه‌ده سیاسی، نظامی، علمی مرکزلرده میللی فعاللارین یئرلشدیریلمه‌سینه چالیشیر.
– دیپلوماتیک و دیاسپورا یوللاری ایله میللی داوامیزا دگر وئره‌ن اؤلکه‌لردن و اولوسلاراراسی چئشیدلی گوجلردن دستکلر آختاریر.
۲. ائکونومی یول خریته‌سی:
(قورتولوش سورجینده)
۲.۱. یئرلی، اؤزل و اورتا ائکونومی؛
– گونئی آزربایجان اقتصادیاتینین آلت یاپی سینین تام فورمالاشماسی اوچون یئرلی صنایع و تیجارته اوستونلوک وئریلمه‌سی گرکیر.
– ایران دؤولتینین سؤمورگه‌چی اقتصادینا قارشی توپلومسال مدنی دایانیشما و دیره نیشمه یولا سالینمالی‌دیر.
– گونئی آزربایجانین گلنکسل اقتصادی تمللرینین گوجلنمه‌سی اوچون مودئرن مئتودلارین ایستیفاد‌یه آلینماسی گرکیر.
۲.۲. یاتیریم و ائکونومیک قالخینما؛
(باغیمسیزلیق سورجینده)
– (قوزئی) آزربایجان رئسپوبلیکاسی، تورکیه و تورک دونیاسیندان بیلیم سل، تکنیک سل، اورتاق یاتیریملار قبول ائدیلمه‌لیدیر.
– گونئی آزربایجانین اوزون و سورکلی ایشغالچی رئژیمین اقتصادی بلوکاسیندان قورتولماق اوچون آوروپا تکنولوگیاسینا و بازارلارینا یول تاپیلمالیدیر.
– مودئرن شهر و کند صنایع سئکتورلارینین اینکیشافی اوچون اؤلکه چاپیندا قالخینما پلانلارینین یولا سالینماسی گرکیر.
۳. میللی کیملیک یول خریته‌سی:
۳.۱. دیل و ائیتیم؛
– تورک دیلینده ائیتیم حاقلارینین قازانماسی اوچون، بوتون میللی قوروملار و سیویل فعاللار بیرگه دایانیشمادا اولمالیدیر.
– آنا دیللی اوشاق ائولرینین، اوخوللارینین و بیلیم یوردلارینین (اؤیرنجی یوردلاری) آچیلماسی اوچون دیلچی، فئدرالچی، ایستیقلالچی قوروم و سیویل چالیشقانلار بیرگه امکداشلیق ائتمه لیدیرلر.
-تورک دیلینین قورونماسی، چیچکلنمه‌سی و یایغینلاشماسی اوچون گیزلی، اونلاین و آچیق ائیتیم آلانلاری اولوشمالیدیر.
۳.۲. کولتور و میللی کیملیگین گوجلندیریلمه‌سی؛
– آزربایجان تورکلرینین تاریخینی، کولتورونو، میللی کیملیگینی تانیتماق یؤنونده کوتله وی پروژه‌لر حیاتا کئچیریلمه‌لی‌دیر.
– تورک دیللی مئدیا و (ت و) چالیشمالارینین سورکلی گئنیشلنمه‌سی و گوندمده اولماسی گرکیر.
– کولتورل ائتکین لیکلرین (سینما، تئاتیر، اوپرا، ایسپورت وب.) گئنیشلنمه‌سیله باغلی گوند‌م یاراتماق گرکیر.
– سیستملی شکیلده یاخین دیاسپورا (قاشقای، خلج، خوراسان تورکلری، تورکمنلر کیمی دیلداشلار.) و اوزاق دیاسپورا (ایران دیشیندا یاشایان سویداشلار) تشکیلاتلاری یارادیلمالیدیر.
۴. اولوسلاراراسی ایلیگی اوداقلارینین اولوشماسی:
۴.۱. (قوزئی) آزربایجان رئسپوبلیکاسی ایله دوغما ایلیشکیلر؛
– دوغما آزربایجان دؤولتی ایله درین ایلیشکیده اولماق چوخ اؤنملی‌دیر.
– آزربایجانین قوزئیی ایله گونئیی آراسیندا قارشی‌لیقلی سیویل توپلوم قورولوشلارین و سیاسی پارتیالارین آراسیندا ایلیشکی قورماق گرکیر.
– باکی و تبریز آراسیندا سورکلی غیری دؤولت قوروملاری آراسیندا کوردیناسیا مرکزلرینین یارادیلماسی گرکیر.
۴.۲. تورک دونیاسی ایله دوغما ایلیشکیلر:
– سؤزسوزکی، تورکیه جومهوریتی ایله گونئی آزربایجان آراسینداکی ایلیشکیلرین اؤنمی دارتیشیلمازدیر. بو ایلیشکیلری تورک توپلوملارینا داشیماق ان واجیب ایشلردندیر.
– قازاخیستان، اؤزبکستان، تورکمنستان، قیرقیزیستان، قوزئی قبریس تورک جومهوریتی و دیگر تورک توپلولوقلاری ایله درین یاخینلیق گرکیر.
– تورک دؤولتلری تشکیلاتیندا گونئی آزربایجانین تانینماسی اوچون گئنیش آلانلی چابا گؤستریلمه‌لیدیر.
– تورک دونیاسینین گونئی آزربایجانا سیاسال و دیپلوماتیک دستک وئریلمه‌سینی ساغلاماق ان اؤنملی گؤروه لردن ساییلمالی‌دیر.
۴.۳. عرب و ایسلام دونیاسی ایله سیجاق ایلیشکیلر؛
– بؤلگه‌میز عرب-ایسلام ایدئولوژی ایله بزنمیش تئررور باسقیلارینا اویغون بؤلگه‌دیر. بو بؤلگه‌ده آیاقدا قالماق اوچون چئشیدلی دؤولت یاپیلاری ایله نورمال دیپلوماتیک ایلیشکیلر گرکیر.
– تانیق اولدوغوموز ایمپریال دستکلی تئرور قروپلارینین بؤلگه‌ده کائوس یاراتما چابالاری گوندن-گونه چوخالیر. سؤزسوز کی، اؤزونو آزربایجان میللی حرکاتینا باغلی بیلن قورومون بو تئرور قروپلارا یاناشماسی قبول اولونمازدیر.
– یوخاریدا سادالانمیش تئرور اسینتیلری گونئی آزربایجانین دا گوند‌مینده‌دیر. بو اوزد‌ن آزربایجان میللی حرکاتی هر نه قدر ده سیویل حرکات اولسا بئله، باتی آزربایجانی گلمه تئررور قروپلارینین شرریندن قوروماق اوچون گرکن “مشروع مدافعه” حاقینا مالیکدیر.
۴.۴. آوروپا بیرلیگی، آمریکا و بیرلشمیش مللتلر تشکیلاتی (بمت) ایلیشکیلری؛
– گونئی آزربایجانین میللی-سیاسی موجادیله‌سی آوروپا بیرلیگی، آمریکا و بمت کوریدورلاریندا گوند‌م اولمالیدیر.
– گونئی آزربایجان اوچون گوند‌م یاراتماق، دیاسپورا و لوببی‌چیلیک فعالیتی طلب ائدیر.
– گونئی آزربایجان و بوتؤو آزربایجانی دونیا چاپیندا تانیدان دونیا آزربایجانلیلاری کونگرسی (داک) کیمی سولوخو کسیلمیش سیویل توپلوم قورولوشلارینین یئنی‌دن نَفسلنمه‌سی گرکیر.
۵. توپلومسال دیرچه لیش و اینسان حاقلاری:
۵.۱. کوتله ایچره میللی-سیاسی بیلینجین یوکسه لیشی
– سانال (اینترنت) و مئدیا آلانیندا فورمالاشمیش میللی شعور آشیلانمالی‌دیر.
– گونئی آزربایجانین بوتون یاشاییش بؤلگه‌لرینده، گیزلی و آچیق میللی-سیاسی تبلیغات آپاریلمالی‌دیر.
– ایدمان آلانلاریندا میللی آتموسفرین یوکسلیشی ساغلانیلمالی‌دیر.
۵.۲. اینسان حاقلاری و توپلومون قورونماسی؛
– آزربایجان تورک میللتینه و فارس اولمایان خالقلارا قارشی رئژیمین فارسلاشدیرما ایرانلیلاشدیرما سیاستینه قارشی اولوسلاراراسی اینسان حاقلاری اورقانلارینا سورکلی راپور وئریلمه‌لی‌دیر.
– میللی سیاسی توتوقلولارین اؤزگورلویو اوچون دونیا اوزره کامپانیالارین آرتیریلماسی گرکیر.
– میللی فعاللارین تهلوکه‌سیزلیگی اوچون مدافعه کومیته‌لرینین یارانماسی ان واجیب گؤروه لردندیر.
۶. اؤزه ت
گونئی آزربایجان قورتولوش پارتیاسی نین دییشمز ایلکه و اولکوسو گونئی آزربایجانین میللی قورتولوشودور. آنجاق، بو قودسال یولون بؤیوک آلانلی یئنیش-یوخوشلاری گؤزدن قاچینمامالیدر میللی آزادلیغین آلت یاپی‌سی تورک کیملیگینین کوتله ایچینده یایغینلیغیندان کئچر. آیریجا ایچری نین آیدینلاشماسی ایله یاناشی آزربایجان میللی حرکاتینین باریش ایچینده اینسانجیل و چاغداشلیغا دایانان آماجلارینین دونیادا تانیدیلماسی گرکیر. طبیعی کی، آزربایجان میللی حرکاتینین آماجینا ال تاپماق اوچون سیاسی قورومساللاشما، مالی-ائکونومی تأمینات، میللی-کوتلوی اویانیش، دیپلوماتیک ایلیشکیلرین گئنیشله‌نمه‌سی و توپلومسال قالخینما کیمی اؤن گؤرولرین الده ائدیلمه‌سی گرکیر.
سؤزسوز کی، بو آماجا چاتماق اوچون، آزربایجان میللی حرکاتینا اینانان، آزربایجان تورک میللتی نین گوجونه دایانان بوتون پارتیا و میللی فعاللارین انرژی‌سینین بیر آرادا اولماسینی ایستر. بو گوج بیرلیگی، سیراوی اولاراق، میللی شورا، سورگونده پارلامئنت، سورگونده دؤولت کیمی ایره لیله میش دؤولتچی‌لیک فورمالاری سیستئملریله کوره سل لشمه آشاماسینا گیره بیلر. بو ایسه، اورتاق میللی موجادیله خریته‌سی ایلکه‌لری اوزرینده گرچکلیک قازانار.
