آزربایجانین گله جگی اؤز الینده دیر، رئیسی لرین و خامنه ای لرین اؤلومو ایله دئیشن بیر دوروم اولمایاجاق!
گونئی آزربایجان میللی قورتولوش پارتییاسینین بیلدیریشی
قوشقوسوز کی، آزربایجان تورک میللتینین دوشمه‌نی اولان فارس فاشیزمی توپلو اولاراق، بوتؤو بیر رئژیمدیر. دونیانین ان تئوکراتیک، گئریچی، شوونیست دؤولت سیستئملری سیرالاماسینین باشینی چکه‌ن تئهران رئژیمی اوچون بوندان سونرا دا نیظام ایچی گیزلی چکیشمه‌لر اؤز دامغاسینی ووراجاقدیر.
دئسپوت سیستئملره اؤزل اولان گلر- گئدر فیقورلارین رئژیم اوچون بیر فورصت اولماسی کیمسه‌نین گؤزوندن اوزاق دئیلدیر. گئری ساخلانیلمیش توپلوملاردا گلر- گئدر فیقورلار اصلینده باش دیکتاتورون سیرادان قوربانلاری کیمی دویغو سؤمورگه آراجی حؤکمو داشییر.
ان سون اؤرنک اولاراق، ۴۰-۵۰ مین الی یالین فلیسطینلی نین قانینا گیره‌ن، حماس-ایسرائیل وحشیلیگینی کؤروکلندیر‌ن جینایتکار خامنه ایی اوچون رئیسی لرین، آل هاشیملرین اؤلومو نه قدر آجی گؤرونسه ده، سیرادان دویغو سؤمورگه سی آراجلاردیر.
بشریت، بوندان سونرا دا ایسلام رئژیمینین تؤرتدیگی بیر چوخ آجی، درین و حتی دونیانی سارساجاق بؤیوک ساواش اوچوروملارین اولوشونا تانیق اولاجاقدیر. بئله رئژیملرین وارلیغی سوره رکن یئر اوزوندن قان و جینایت پروسئسسواللاری اولوسلاراراسی محکمه سیستئملریندن اسکیک اولمایاجاق‌دیر. جانی رئژیملری تورلو-تورلو چیخارلاری اوزوندن اللری اوستونده توتان سؤمورگه‌ن دؤولتلرین قانلی اولایلارداکی سوچو ان آزی بئله رئژیملر قدر بؤیوکدور.
آمئریکا باشدا اولماقلا روسیا، چین و بؤیوک آوروپا بیرلیگی دؤولتلرینین یئر اوزونده چلیشکن سیاستلری اوزوندن فارسچی-شعوبی سیاسی ایران دؤولتی کیمی رئژیملرین قان ایتیرمه‌سی اسیر خالقلارین کئچیجی سئوینجینه ندن اولسا دا، قالیجی آزادلیقلاری اوچون کسکین سونج گتیرمه‌یه‌جکدیر. چونکی، بو رئژیملر اوچون باش دیکتاتور سؤزونون ایلکی و سونو ساییلیر. حتی بئله دیکتاتور سیستئملرده باش دئسپوتون دئیشمه‌سی بئله، چاره یولو دئیلدیر. یالنیز، اسیر میللتلرین میللی قورتولوش اوغروندا آیاقلانماسی و میللی دؤولتلرین قورولماسی ایله بشریتین آلنینا قازیلمیش بو قارا لکه‌یه سون وئرمک مومکون‌دور.
تاریخ بویو تورک کیملیگی و گلنه یی ایله یئر اوزونه بخش ائتدیگی اولو کولتو ارثینین از‌لی ییه‌سی – آزربایجان تورک میللتی، بو توپلوملاردان بیری، بلکه ده اولوسو، تورپاغی و دؤولتیله ان زنگین اسیر دوشه‌ن توپلومدور. آزربایجان پرئزیدئنتی ایلهام علیئوین دئیمی ایله ۴۰ میلیونلوق گونئی آزربایجان قانداشلارینین طالعینه بیگانه قالیناماز! سؤزسوز کی، سایغیلی آزربایجان پرئزیدنتی نین بو آنلاملی سؤزو ۵۰ میلیونلوق بؤیوک بیر تورکلویون ده ایلک و سون سؤزودور.
سؤزسوز کی، آزربایجان تورک میللتی، رِئیسی لرین و حتی خامنه ای لرین اؤلومو ایله دئیل، اؤز دمیر ایراده‌سی ایله گونئی آزربایجانین تورک جومهوریه تینی قوراجاق، پارلاق وارلیغی ایله اؤزلویوندن اولان باشقا تورک اولوسلارین، ائله جه ده بؤلگه خالقیلاری میللی حاقلارینین الده ائدیلمه‌سینده بؤیوک پای صاحبی اولاجاقدیر. کسینلیکله او گون چوخ اوزاق دئیل!
یاشاسین خالقلار دوستلوغو!
محو اولسون خالقلار دوشمه‌نی ایران سیستمی!
گونئی آزربایجان میللی قورتولوش پارتییاسی (قورتولوش) یؤنتیم قورولو
۲۰۲۴/مای/۲۰
