Sign petition: Upholding human rights and denouncing any form of tolerance or collaboration with extremist groups. · GoPetition.com
اورمو گؤلو فاجعه‌سینی سیاسی ائقو آراجی ائد‌ن قروپلارلا باغلی
اورمو گؤلو فاجعه‌سینی سیاسی ائقو آراجی ائد‌ن قروپلارلا باغلی
گونئی آزربایجان میللی-سیاسی قوروم و فعاللارینین
آزربایجان تورک میللتینه بیرگه مراجعتی
سئوگیلی میللتیمیز!
آرتیق فاشیست فارسچی رئژیمینین میللت و وطنیمیزه قارشی آچیق ساواشا گیرمه‌سی کیمسه‌نین گؤزوندن، عاغلیندان گیزلی دئیلدیر. سون ایللر سورجینده آزربایجان تورک میللتینین یاشام داماری اولان اورمو گؤلونون چئشیدلی ایستراتژیلر تملینده قورودولماسینا حؤکوم وئره‌ن فاشیست ذهنیتین آنتی-بشری دالغالاری، اینسانلیغی اؤز باتاقلیغینا چکمکد‌ه‌دیر. فاشیست رئژیم، گؤز گؤره-گؤره تورک میللتینی بوتونلوکله یئر اوزوندن سیلمه‌یه چالیشیر. گونئی آزربایجانین دوغال یئرآلتی و یئراوستو زنگین لیگینین تالانماسی فارسچی شعوبی رئژیمین اَن درین دؤلت ایستراتژ‌یسینه چئوریلیبد‌یر. بیر گون یوخدور کی، یوزلر عائله‌نین چؤرک آغاجی اولان بیر نئچه فابریکانین قاپانما خبری مئدیالاردا یاییلماسین. ایشچی کسیمین آلدیغی آیلیق معاشین آنجاق ۵ گونلوک دایانما گوجو واردیر. منفور رئژیمین اؤز ایستاتیستیک وئریلرینه گؤره، آجلیق سینیری %۶۰ رقمینه یاخینلاشماقد‌ادیر. فارسچی شعوبی رئژیم طرفیندن شهرلریمیز دالغین، کندلریمیز داغینیق، داغلاریمیز، معد‌نلریمیز تالانمیش دورومدادیر. یوردوموزا قارشی تامان آلانلی فاشیست هوجوملارین آردی کسیلمد‌ن سورور. اورمو گؤلو، فوندامئنتال رئژیمین آزربایجان تورک میللتینه وردوغو نؤوبتی داربادیر. دوشمن سون نفسیمیزی کسمه‌یه چالیشیر. بئله بیر دورودا، وارلیغیمیزی قوروماق اوچون ساواشد‌ان باشقا یولوموز یوخدور. بؤیوک شهریار دئمیشکن: «قالخ آیاغا، یا آزاد اول، یا تامام یان آزربایجان!»
عزیز میللتیمیز!
میللت و وطن اولاراق آغیر دؤنمدن کئچمکده ییک. آزربایجان تورکلویو اوچون، اینسانلیق اوچون دایانیشما و بیرلیکده اولماق سو و هاوا کیمی گرکیر. توپلوم اولاراق بو بیرلیگه چوخ احتیاجیمیز وار.
یئنیجه یاییلمیش ۹۰۰ دن چوخ تانینمیش ایمضالی «آزربایجان میللی حرکاتی»نین بیلد‌یری‌سینین گئنیش آنلامی آپ-آچیق میللی بیرلیک روحونون یانسیماسی‌دیر. سؤز قونوسو بیلد‌یری آچیق-آیدین میلیونلار آزربایجان تورکونون دیله گینین ترجومانی اولموش و بعضی آزربایجانا منسوب تشکیلاتلارین داغیدیجی اؤزباشینالیقلارینا دور دئمیشد‌یر.
شوبهه‌سیز کی، آزربایجان میللی حرکاتی، گونئی آزربایجان تورکلویونون میللی قورتولوش مجادیله‌سینین تمل پرینسیپلرینی داشیان اولو روحدور. بوگون، بو روحون یوکسه لیشی اوچون فارسچی رئژیمه سینه گره ن ۹۰۰ دن چوخ اؤز به اؤز حقیقی ایمضانین آنلامی میللی، علوی و ایشیق توتان کیلاووزدور.
بیز، گونئی آزربایجان میللی حرکاتینین میللی-سیاسی قوروملاری و باغیمسیز فعاللاری اولاراق یاییلان بیلد‌یرینین بعضی اینجه دئتاللاری و یازی فورماسینا ایرادیمیز اولسا دا، میللی-سیاسی تمللرینی آزربایجان تورک میللتینین باغیمسیز، اؤزگور و مستقیل روحو ایله اویغون سانیر، آشاغیداکی سیرالارین اوزرینه دقتلری جلب ائدیریک:
۱- آزربایجان میللی حرکاتینین سیرالاریندا چئشیدلی فیکیر و ایدئولوگیا آخاری واردیر. اؤزونو بو حرکاتین بیر پارچاسی حساب ائد‌ن تشکیلات و شخصلرین آچیق فیکیر و سیاسی یؤنته‌م بلیرله‌مه‌سی گرکیر. اؤزونو چئشیدلی دوشونجه‌لر اؤرتویو آلتیندا گیزلی توتانلارین بو حرکاتا وئردیی زیان اولدوقجا آغیردیر.
۲- چئشیدلی شوعارلار آلتیندا ایرانچیلیق سئوداسینی میللی حرکات ایچینه سیزدیرماغا چالیشانلارین اللری گون کئچدیکجه میللی اؤنجوللر طرفیندن آچیلیر. شعوبی‌چیلرین، رضا پهلو‌ی ماساسیندا اوتورانلارین، ایران میللی کنگره سینده آزربایجان آدی آلتیندا ایرانچیلیق ائد‌نلرین، تورک دوشمنی موجاهیدلره سمپاتی دویانلارین، تئرروریست کورد عشیرت پارتیالارینا ماسا آلتی دوستلوق الی اوزالدانلارین گونئی آزربایجان میللی حرکاتی سیرالاریندا ان اوفاق بئله، یئرلری اولاماز!
۳- آزربایجان میللی حرکاتینین تانینمیش میللی لیدئرلرینه چامور آتما چابالاری دوشمن رئژیمین ایفشا اولموش اویونودور. بیلر- بیلمز رئژیمین چامور آتما اویونونا اورتاقلیق ائتمک ان آزیندان جاهیل لیکدیر. هر هانسی ندن اوزوندن دوشمن سئویندیر‌ن چامور آتما جهالتینه سون قویماق گرکیر. آزربایجان میللی حرکاتی بئله خطالی ایستراتژیلردن اوزاق قالمالیدیر. آدینی میللی چالیشقان قویان کیمسه بو خطالی یؤنته‌مین بیر پارچاسی اولمامالید‌یر.
۴- اوزوله‌رک آشیری ائقوایزمه یئنیک دوشن ۵ شهریور چاغیریشی گونئی‌ده یاشایان میللی اؤنجوللریمیزین نه قدر حاقلی اولدوغونو بیر داها گؤسترمیش اولدو. ایچرینین بوتون ایستک و ریجالارینا باخمایاراق پارتیزانبازلارین اینادی سوره رکن ۳۰-۴۰ گونلوک تبلیغاتین تملسیز اولدوغو اؤزونو گؤستردی. میللی فاجعه‌میز اولان اورمو گؤلو، پارتیزانبازلارین سیاسی ملزمه‌سی اولدو. حالبوکی، بئله اولماماسی گرکیردی. آیریجا هر هانسی اولوملو الشدیریه داعش سایاغی رئاکسیا گؤسترمه مئتودو معلوم مئدیا و نیفاق توخومو سَپن شخصلر طرفیندن کؤروکلنه ر‌ک ساپورت اولونور. بو ایسه، تورک میللتینین چاغداشلیغینا کؤلگه سالاراق توپلوم ایچیند‌ه درین یارا آچماغا داوام ائدیر. آرتیق، گئج اولمادان توپلوم ایچی کائوس یارادان ایتی، قیریجی و قاتی داورانیشلاردان آیریلمالی و فیکیر مرکزلرینی توپلومدان اوزاق توتمالی ییق.
۵- عموم میللی – دئپرم، سئل، مئشه یانغینی و داها فاجعوی اورمو گؤلو، کیمی فاجعه‌لرین سیاسی پارتیالار طرفیندن یالنیش یؤنلو تبلیغات قونوسونا چئوریلمه‌سی بؤیوک اخلاقسیزلیق نیشانه‌سی‌دیر. اورمو گؤلو ایله باغلی هرهانسی ائیله‌م، گؤستری، میتینگ و اولوسلاراراسی مراجعتلرین یولو کسینلیکله میللی دایانیشمادان، گئنیش فیکیرداشلیقدان کئچر. «سؤزه باخمارام، کیمسه‌نی سایمارام، سؤزومون اوستونه سؤز دئیه‌نین گؤزونو چیخارارام!» دیکباشلیغین سونوجو میللی قورتولوش حرکاتیمیزین اومیدلریله اویناماق دئمکد‌یر.
۶- آزربایجان میللی حرکاتینین آخار دامارلاری گونئی‌ده‌دیر. گونئیه عاید اولان بوتون میللی-سیاسی قوروم-قورولوشلارین آناسی گونئی آزربایجان میللی حرکاتی‌دیر. گونئی آزربایجاندا آنا حرکاتد‌ان اوستون پارتیا، تشکیلات، قوروم-قورولوش یوخدور و اولا بیلمز ده! اؤزونو گونئی آزربایجان میللی حرکاتیند‌ان اؤزگون، باغیمسیز و اؤزگه حساب ائد‌ن هر هانسی پارتیا، تشکیلات، قوروم-قورولوش کسینلیکله تورک کیملیکلی یوخ، پانفارسیزمین چمبرین‌ده مانقورتلاشان ایرانشهری جریان‌دیر.
۷- آزربایجان میللی حرکاتی بیر بوتؤو حرکاتدیر. بو حرکاتین ایچری‌سی، دیشاری‌سی یوخدور. آنجاق، بللی اولدوغو کیمی فارسچی شعوبی رئژیم قارشی‌سیند‌ا سورکلی زیندانلارا، سورگونلره، ایشسیزلیگه، یوخسوللوغا، گیزلی و آشکار اؤلومه معروض قالان ایچری اؤنجوللریمیز واردیر. اونلار، ایچرینین گئنیش آلانلی دورومونو کسینلیکله دئموکراتیک و دینج اؤلکه‌لرده یاشام سوره‌ن هرکسد‌ن و هر هانسی قورولوشدان داها درین اینجه‌له‌مه‌یه و قرار وئرمه‌یه یاخیندیر‌یلار. بو اوزده‌ن قبول ائتمک گرکیر کی، هر هانسی ائیله‌مین اوغورلو باش توتاجاغینی ایچری اؤنجوللر داها دوغرو بیلیرلر. ائله محض بو گرچگه دایاناراق، ایچری اوچون هر هانسی قرار وئریجی اورقان ایچرینین اؤزو اولمالیدیر.
بو بیلد‌یرینی ایمضالایان میللی-سیاسی قوروم و شخصلره گؤره، اورمو گؤلو فاجعه‌سی هر هانسی قورولوشون سیاسی آماجلارینین آراجی اولمامالید‌یر. اورمو گؤلو بیر میللتین عموم میللی چئوره سل اؤلوم-دیریم ساواشی‌دیر. بو سون میللی قورتولوش ساواشین ظفرله سونوجلانماسی اوچون تورک وارلیغینین میللی دوشونجه بیرلیگی، ییرتیچی فارسچی شعوبی دوشمنین سیزما شبکه‌لریند‌ن اوزاق توتولمالید‌یر. بو اوزدن، اؤزونو آزربایجان میللی حرکاتینا باغلی بیلن هر هانسی قوروم-قورولوشون ان بؤیوک گؤره وی دوشمنین اویونلارینی پوزاراق اؤز دؤولتچیلیگیمیزه دوغرو موجادیله ائتمه‌سی‌دیر.
یاشاسین بیرلیگیمیز
یاشاسین گونئی آزربایجان میللی حرکاتی!
۲۰۲۳/۹/۵
