بیر هفته‌یه یاخین زامانیمیز قالیب. آوتوبوس و طیاره بیلتلری تداروک اولونوب. بیزیم هدفیمیز ۵۰۰۰ سویداشیمیزین بروکسل‌ده بیر آرایا گلمه‌سی‌دیر. هدفیمیزه چاتاجاغیق.بروکسل‌ده باشلاییب، تبریزده بیتیرجییک
بیر هفته‌یه یاخین زامانیمیز قالیب. آوتوبوس و طیاره بیلتلری تداروک اولونوب. بیزیم هدفیمیز ۵۰۰۰ سویداشیمیزین بروکسل‌ده بیر آرایا گلمه‌سی‌دیر. هدفیمیزه چاتاجاغیق.
بو سؤزلری Axar.az- تانینمیش گونئی‌لی فعال آذربایجان میللی قورتولوش حرکاتینین صدری ائلدار قاراداغلی «آزادلیق و عدالت« یوروشو حاقین‌دا دانیشارکن دئییب.
یوروشله باغلی مادی دستیین اؤنملی اولدوغونو بیلدیره‌ن قاراداغلی چاغیریشلارا باخمایاراق، ایمکانلی شخصلرین جدی دستک گؤسترمدیینی وورغولاییب:
«بیزه عادی وطنداشلار یاردیم ائتدی. حتی زلزله‌دن ضرر گؤره‌ن خوی بؤلگه‌سیندن اولان یاردیم بیزیم اوچون جسارت و انرژی وئرن عاملدیر. محض بو سبب‌دن بیز اؤز مقصدیمیزه چاتماق اوچون گئجه-گوندوز چالیشیریق. بؤیوک کومان‌دامیز ۳ کمیته اساسیندا فعالیت گؤستریر. ایلک دفعه اولاراق گونئی آذربایجانلیلارین بیر یئره گلمه‌سینین شاهدی اولاجاغیق».
قاراداغلی گونئی آذربایجانلیلارین مارتین ۲۵-ده بروکسل‌ده کئچیریلمه‌سی پلانلاشدیریلان آکسییاسینین تبلیغاتینین بؤیوک سس-کوی دوغوردوغونو، آنجاق انگل اولماغا چالیشانلارین دا آز اولمادیغینی بیلدیریب:
«آرتیق سون گونلر سوسقون قارداشلاریمیز دا دیله گلمه‌یه مجبور اولوبلار. عزیزلریمیز یانلیش حرکتلری، داورانیشلاری و باخیشلاری ایله بو جابانی یوخا چیخارتماغا چالیشیرلار. لاکین بو چابا گئجه-گوندوز وئردییمیز امییمیزین سایه‌سین‌ده ائله بیر مرحله‌یه گلیب چاتیب کی، گئرییه دؤنوشو یوخدور و اولمایاجاقدیر. بعضی دوستلاریمیز یئرسیز ایرادلار دئییر، بعضی بیاناتلار وئریر و فیکیرلر سسلندیریرلر. بورادان میللی اویانیش حرکاتینین باشقانی و هئیتینه سس‌لنیرم: گونئی آذربایجانین ایستیقلالیتی و مستقیل‌لیگی هامیمیزین آرزوسودور. بونا کیمسه شک-شبهه ائتمه‌سین. بیزیم بو حرکاتیمیز بروکسل‌ده باشلاییب، مطلق تبریزده بیته‌جک. بیز آذربایجان میللی حرکاتی اولاراق میدانا چیخمیشیق. حرکاتیمیز هئچ بیر تشکیلاتین، فردین، انحصارچی دوشونجه‌نین میدانی دئییل. بوتون دوشونجه‌لرین، ایدئیالارین، فیکیرلرین میدانیدیر. هئچ کیم دئیه بیلمز کی، یالنیز میللی حرکات منم. میللی حرکات هامینین آنا حرکاتیدیر. بورادا هر هانسی قوروم اوستونلوک تشکیل ائتمیر. بوتون تشکیلاتلار هامیلیقلا ال-اله وئریب‌دیر. آرزوموز بودور کی، آذربایجان تورک میللتینین و گونئی آذربایجانین میللی حرکاتینین ایچین‌دن چوخ بؤیوک رهبرلریمیز و اؤندرلریمیز چیخ‌سین. بیز بونا چالیشیریق. کیمسه بو گون گونئی آذربایجانین اؤندری، لیدری و سون سؤز دئیه‌نی دئییل. آذربایجان تورکلرینین میللی ایدئولاگییاسی و آذربایجان تورکچولویو بو یوروشون ان باشیندا گئدن مسئله‌دیر. بونو ایران‌چیلارا، مجاهیدلره، شاهچیلارا بنزتمک یانلیش‌لیقدیر. دوستلاریمیز میللتدن، میللی باغلاردان، میللی کیملیکدن دانیشان‌دا چوخ دقتلی اولمالیدیرلار».
ائلدار قاراداغلی یوروشون عمومی چاغیریش اساسیندا حیاتا کئچیریلدیینه دقت چکیب:
«حرکاتین عضولری حساب ائدیر کی، بیزیم اوچون فاشیست اسلام رسپوبلیکاسی ایله فاشیست پهلویلر و فاشیست مجاهیدلر آراسیندا هئچ بیر فرقی یوخدور. بیزیم اوچون آذربایجان میللی حرکاتی واردیر. بونو «ایران تورکلری» و «ایران حرکاتی» دئیه آدلاندیرانلار وار ایدی کی، ایلک هفته‌لرده کنارلاشدیریلدیلار. گؤردولر کی، بورا اونلارین میدانی دئییل. اولا دا بیلمز. چونکی بیز گونئی آذربایجانین استقلالیتینی هر شئی‌دن اوستون گؤروروک. هامیمیز ائله دوشونورمو؟ – دئیه بیلمره‌م. بئله اولسایدی، هامیمیز بیر پارتییا، بیر قوروم، بیر دسته اولاردیق. یوروش گونونه قدر، بو کووردیناسییا مرکزینین عضوو و مالییه قروپونون باشقانی اولاراق، بورادان اعلان ائدیره‌م، ایندییه کیمی هئچ کسه، خصوصی وورغولاییرام، هئچ کیمه دعوتنامه گؤندرممیشیک. دوروب دئمه‌سینلر کی، بیزی دعوت ائتمه‌ییبلر. هئچ کیمی دعوت ائتممیشیک. عمومی چاغیریش ائتمیشیک. مجاهیدلرله کیمسه گؤروشورسه، اوندان منه نه؟ من مجاهیدلرله گؤروشممیشه‌م. من ده بو حرکاتین ایچینده اولانلاردان بیرییه‌م. بوتؤوچولوک و تورانچیلیق روحوموزدادیر».
او، همچینین، مباحثه دوغوران بایراق مسئله‌سینه ده آیدینلیق گتیرمه‌یه چالیشیب:
«یوروش‌ده سیمگه اولاراق سئچیلن بایراق میللی حرکاتین مجادیله رمزیدیر. بو، گونئی آذربایجانیمیزین بایراغی کیمی دئییل، بیر حرکاتی تمثیل ائتسین دئیه اورتایا قویولوب. بو بایراغی قامچیلایانلار بیلسینلر کی، بوتؤوچولویوموزدن اؤنجه گونئی آذربایجانین دولتی یارانمالیدیر. بیر مستقیل اؤلکه اولمادان باشقا مستقیل اؤلکه ایله بیرلشمک مومکون دئییل. بونو بیلملیدیرلر کی، گونئی آذربایجانین دولتچیلیینین بیر سیمگه‌یه احتیاجی واردیر. هئچ کیمین ادعاسی یوخدور کی، بو بایراق گونی آذربایجانین دولت بایراغی اولاجاق. اولا بیلر – اگر میللت بونا آلیشسا، اوریینده بؤیوتسه، البته کی، اولار».
