بیر خرداد میللی آیاقلانماسی‌نین ایل دؤنومو ایله باغلی گونئی آزربایجان تشکیلاتلارین بیرگه چاغریشی
🔹دگرلی آزربایجان تورک میللتی!
🔹ایرانین فارسچی شاه و موللا رئژیمی، ۱۹۲۵ینجی ایلد‌ن بری میللی دولتچیلیگیمیزی اله کئچیردیکده‌ن سونرا وطنیمیزی هر طرفلی شکیلده سؤمورگه‌لشدیرمیشدیر. گونئی آزربایجانی تورکسوزلشدیرمک اوچون سوی‌قیریما، سورگونه، زیندانا، ایشکنجه‌لره ال وورماقلا یاناشی، آزربایجانین ائتنوگرافییاسینی دگیشدیرمک استراتئژیسی اویغولامیش و آزربایجان تورکلرینین اؤز‌گووه‌نینی قیرماق هدفی ایله فاشیست رئژیم چئشیدلی آشاغیلاییجی پروقراملار حیاتا کئچیرمیشدیر.
🔹آشاغیلاما سیاستی‌نین ان باریز اؤرنگینده ایسه اؤلکه‌نین ۴۰٪ نفوسو بؤجگه (پیس‌پیسایا) بنزه‌دیلمیشدیر. رسمی “ایران قزئتی”ینده میللتیمیزه قارشی کاریکاتورا یاییلمیش، اعتراضا قالخان میللتیمیزه قورشون یاغمیشدیر.
بیر خردادلا باشلایان ایکی هفته بویونجا ۳۰دان آرتیق گونئی آزربایجان شهرلرینده آزربایجان اؤیرنجی حرکتی‌نین اؤنجوللوگونده، میللی کیملیگینی ساوونان تورک میللتینه قارشی اویغولانان شددت نتیجه‌سینده اونلارلا وطنداشیمیز شهید دوشموش، یوزلرله وطنداشیمیز یارالانمیش، مینلرجه سوچسوز قادین، کیشی، گنج، یاشلی توتوقلاناراق آغیر ایشکنجه و حبس‌لره معروض قالمیشدیر.
🔹فاشیست رئژیم، ۱۳۸۵ ده دولت تئرور آکتلارینا ال ووراراق آزربایجان میللی حرکتی‌نین آیاقلانماسینی کئچیجی اولاراق دوردورا بیلسه ده، خرداد روحونو هئچ بیر زامان میللتیمیزین گونده‌لیگیندن سیلمه‌گه قادیر اولمامیشدیر. بوگون، آزربایجان میللی حرکتی‌نین اورتایا قویدوغو “آزادلیق، عدالت، میللی حؤکومت” دئویزی خردادلارین سارسیلماز اراده‌سینین آیدین گؤسترگه‌سیدیر.
🔹گوندن گونه گوجلنن آزربایجان میللی حرکتی، فاشیست رئژیمین حاکیم و اپوزیسیون آلانلارینی دریند‌ن قورخویا سالیبدیر.
🔹گنجلیگیمیز فاشیست فارسچی رئژیمی تورپاقلاریمیزدان سیلیب-آتماق اوغروندا موجادیله صفلرینی سیخلاشدیریر. ایرقچیلیغا قارشی ازیلن میللتلرین جبهه‌سی گون کئچدیکجه بؤیویور. دونیا، وطنیمیز آزربایجاندا و بؤلگه‌میز اورتا دوغودا بؤیوک دییشیکلیگین اولماسینا حاضرلانیر.
🔹ایگید گنجلیگیمیز!
🔹آزربایجانین آیدین گله‌جگی سیزین الینیزده‌دیر. آزربایجانین قورتولوشو سیزین پولاد اراده‌نیزده‌ن آسیلیدیر. آزربایجانین سارسیلماز غیرتی و توکنمز غرورو سیزسینیز. تاریخ بویو یوردوموز اوغرونا تؤکولن قانلارین امانتداری سیزسینیز.
🔹بیر حالداکی خاریج‌ده‌کی وطنداشلاریمیز برلین‌ده ایکینجی «آزادلیق عدالت میلی حؤکومت میتینگی»نه حاضیرلانیرلار، ۱ خرداد شهیدلرینن قانی یئرده قالماسین دییه، گنجلیگیمیزی “هر یئر ائیلم یئری، هر زامان ائیلم زامانی” تاکتیکینه دایاناراق گونئی آزربایجانین بوتون شهرلرینده اعتراضا چاغریریق.
🔹خرداد ۱۳۸۵ شهیدلریمیزین قانی یئرده قالمایاجاق!
🔹یاشاسین آزربایجان تورک میللتی!
🔹آزادلیق، عدالت، میللی حؤکومت!
♦️آزربایجان اؤیرنجی حرکاتی – آزوح
♦️آزربایجان مرکز پارتیسی – آم‌پ
♦️آزربایجان میلی دیرنیش تشکیلاتی – دیرنیش
♦️گونئی آزربایجان ایستیقلال پارتیسی – گآیپ
♦️گونئی آزربایجان دمکرات پارتیسی – گآدپ
♦️گونئی آزربایجان دمکراتیک تورک بیرلیگی – گآدتب
♦️گونئی آزربایجان میلی قورتولوش حرکاتی – قورتولوش
۱۴ مای ۲۰۲۳
