عباس لیسانی‌نین توتوقلانان میللی فعاللارلا ایلگیلی بویوک آذربایجان میللتی و میللتچی‌لرینه موراجعتی
اولو تانری نین آدی ایله
بویوک آذربایجان تورک میللتی و میللی چالیشقانلاری
بیلدییینیز کیمی فارس راسیسمی، قیرخ دورد ایل اؤنجه باتی گوجلرینین چیخارلاری دوغرولتوسوندا، سلطنت دونون چیخاردیب، اسلام جمهوریتی دونون گئیدی.
دئمک پهلوی دؤنمینده فارس شووینیزمینین یالنیز قیلینجی وار‌ایدیسه، اسلام جمهوریتینده هم قیلینج، همده تانری‌چیلیق( تئوکراسی) آراجینا یییه‌لنمیش دورومدادیر و بو اوزدن ایران آدلانان یئرده بوتون اؤزگورلوک اوغروندا سیاسال و توپلومسال حرکت‌لر، اؤزللیکله اولوسال حرکت‌لر قیلینج گوجو و دین آدی آلتیندا هر تورلو باسقی و تاپتالانماقلا یوخ ائدیلمه‌یه سوروکلنمیش‌دیر.
گونئی آذربایجان میللی حرکتی‌نین آذربایجان کوتله‌سی آراسیندا یایغینلاشیب، میللی سؤیله‌مین ائتگی و اؤتگو آلانی‌نین گئنیش و درین اولدوغونا گوره، مرکزچی فارس حاکیمییتی، میللی حاقدان دوغولان و اینسان حاقلارینا سؤیکه‌نن میللی حرکتی هر تورلو بوغوب سؤندورمه‌یه جان آتمیش‌دیر.
دوستاقلار، شیکنجه لر، شخصیت ترورلاری، شهید ائتمک لر، باسقین‌لار آردیجیل اولاراق هله‌ده سورمکده دیر.
آنجاق بوتون بو باسقی‌لارا باخمایاراق اولوسال چالیشقانلار دوشمن قارشیسیندا دیک دوراراق، سینماییب، بوروشوق اویونلارا اویماییب، موبارزه ائتمکده‌دیرلر.
بوگون اولوسال اؤزگورلوک یولونون یولچولاری گونو- گوندن سایسیزجا آرتماقدادیر. اؤزللیکله گونئی آذربایجان گنجلری، آذربایجان میللتی نین سارسیلماز اومودلاریندان بیری اولاراق فارس فاشیزمینه بنزرسیز مدنی یولاق(متد)لارلا میدان اوخوماقدادیرلار.
بو گرچکلری گؤره بیلمه ین شووینیزم قوللاری سون زامان‌لاردا یئنه ده باسقی‌لاری آرتیریب و اولوسال چالیشقانلاری توتوقلاییب و انسانی حقوق‌لارینی پوزموش‌دور.
بو دورومدا هر زامان اولدوغو کیمی میللی چالیشقانلار و آذربایجان تورک میللتی، اوزه‌رلرینده اولان اولوسال و انسانی گؤره‌و و سوروملولوق اساسیندا، گونئی آذربایجان میللی حرکتی‌نین توتوقلو و توتساغینین، یاتیش(گرایش) و آخیش(مسیر)ینا باخمایاراق آرخا دوروب، سس‌لرینه سس وئرمه‌لی‌دیر.
ائله بو دوشونجه دوغرولتوسوندا، بوگون توتوقلو اولان میللی چالیشقانلاریمیزین سایقی دَیَر عایله لرینه، الیمیز چاتانا بیرباشا دئمیشیک، الیمیز چاتمایانا یئتیرمیشیک کی تبریزده، هر چاغ و هر یئرده ایسته‌سه‌لر، فیزیکی اولاراق ییغیشیب؛ “یا توتوقلانان میللی فعاللاری بوراخین یا بیزی ده توتوقلایین” شوعاری ایله سسیمیزی دونیایا چاتدیرمالیییق.
من اوز پاییما اولوسال دَیَرلریمیزه گوره او تحصن‌ده اولماغی اوزومه بیر میللی بورج بیلیرم یئترکی سایقی دیر عایله لر ایسته سینلر.
بوگون هامی بیلیرکی سانال‌دونیا چالیشمالاری قاچینیلمازدیر، آنجاق یئترلی دئییل، حاکیم سیستم هئچ بیر سس-ه و ساوا اونم وئرمه ییر نییه‌کی ایچری مشروعیتی و گوجو، تانری و سیلاح و دیشاری دایاغی باتی گوجلری دیر.
بو اوزدن، دوغرودان و گرچکدن میللی فعاللاریمیزا آرخا دورماق ایسته ییریک‌سه مئیداندا اولمالیییق و هر بیریمیز میللت فدایی سی اولاراق، آزادلیق- عدالت – میللی حکومت( اوزگورلوک- آربالیق- اولوسال حکومت) دوشونجه سی و آماجی ایله اورتادا اولمالیییق، یوخسا تکجه سانال‌دا گئدن شوعارلارلا نه توتوقلانانلاریمیز بوراخیلار و نه‌ده آذربایجان آزاد اولار.
اگر بوگون اورمو گولو مسئله سی کیمی اونملی اولان سورونلاریمیزین، چوزولمه‌سینه گوره میللت اورتادا اولمالی‌دیر و بیر چوخ سیاسی، اقتصادی و اجتماعی ندنلره گوره مئیداندا اولابیلمیر، ان آزی میللی فعاللاریمیزی توتساقدان و شیکنجه دن قورتارماق ایچین میللتچی‌لر و میللی فعاللار مئیداندا اولورسا سونوج آلماق داها ال وئریشلی اولار.
عباس لیسانی ۱۴۰۲/۸/۲۴
