*نه‌دن آزربایجان میللی حرکتی؟
ایران لا عرب ایراغی(عراق) ساواشیندا ایکی‌یۆز مینه یاخین شهیدین دؤرت‌دن بیری، یانی ۵۰ مین نفره یاخینی همدان، قزوین، زنگان، تبریز، اورمو، اردبیل، تئهران، قوم، کرج ائله‌جه ده آزربایجان تۆرک‌لری‌نین یاشادیغی بۆتۆن شهرلره پای اۏلدو. آنجاق، بو دؤیۆش بیتندن سۏنرا، جۏغرافییا باخیمیندان ایرانین اۏرتالاریندا یئرلشمیش فارس‌لار یاشادیغی بؤلگه‌لری گلیشمه‌یه باشلاییب، ایرانین قوزئی‌باتیسیندا یئرلشن آزربایجان شهرلری گۆن‌دن-گۆنه آرخادا قالیب، گئریله‌دی! آزربایجان تۆرک‌لری اؤزلریندن سۏروشوردولار: ایرانا بو قدر شهید سونماغیمیزا باخمایاراق:
– نه‌دن بیزیم آنا دیلیمیز رسمی دگیل؟ ائله‌جه ده، ایرانین باشا-باشیندا یاشایان تۆرک‌لره میللی رادیو، تئلئویزیۏن، روزنامه، هابئله باشقا مئدییالار یۏخدور؟!
– نه‌دن تۆرک تئاترینا، سینماسینا، موسیقی‌سی‌نه، آیین-اۏیونونا، دیل ایله ادبیاتینا هابئله چئشیتلی هۆنرلرینه بو اؤلکه‌ده میللی حیمایت لا یاناشی دؤولتی درنک یۏخدور؟
-نه‌دن تۆرک أکینچی‌لرینه، ایش‌چی‌لرینه؛ اۆسته‌لیک أمک‌لی‌لرینه حاقسیزلیق لا ظۆلم اۏلور؛ آزربایجان تۆرک‌لری ایش‌سیزلیک‌دن-بیر تیکه چؤرک‌دن اؤترۆ تئهرانا، کرجه، قوما، ایصفاهانا، مشهده، بوشهره، شیرازا، کیرمانا، یزده، ائله‌جه ده باشقا فارسلاشمیش شهرلره کؤچمک زۏروندا قالیرلار؟
-نه‌دن تۆرک اوشاق‌لاری اؤز دیل، ادبیات، هابئله تاریخ‌لرینی اۏخوماق‌دان، اؤرگنمک‌دن محروم دورلار، اۆسته‌لیک فارسی مئدییالار تۆرک‌لرین اؤزلریله یاناشی دیل، ادبیات هابئله تاریخی کتاب‌لارینی کۆچۆمسه‌ییب، تحقیر ائتمک‌ده دیرلر؟
–نه‌دن فارس دلقک‌لریله طننازلاری تۆرک‌لره جۏک لا گۆلمه‌جه دۆزلدیب، اۏنلاری اؤزگۆرجه‌سینه گۆلۆنج قۏنوسو ائدیب، لاغلا قۏیورلار(مسخر ائدیرلر)؛ اۏنلارا قارشی هئچ قانون یۏخ دور! دئمک یارقیلانماییرلار؟
-نه‌دن ایرانین حاکیمییتی‌نین باشچیلیغیندا تۆرک‌لرین رۏلو بو قدر آزدیر، تۆرک حاق‌لارینا ایسه دگر وئرن یوخ‌دور؟
-نه‌دن تۆرک دیلی قورومو ایله آکادئمیاسی بو اؤلکه‌ده یۏخ دور؟ ائله‌جه ده تۆرک‌لرین دیلی‌نی قۏروماغا هئچ چابا گؤستریلمیر، هابئله تۆرک کۆلتۆرۆیله فۏلکلۏرو آزربایجانیمیزدا آرادان گئتمکده دیر؟
-نه‌دن تۆرک یازارلاریندان و تۆرکۆ کیتاب‌لاردان هئچ حیمایت یۏخدور؟ حتی مین بیر توتارقا (بهانه) ایله اۏنلارین آدلیملانماغینا، یایینلانماغینا ائله‌جه ده یاییملانماغینا قارشی دورورلار؟
-نه‌دن آزربایجانین سرمایه یییه‌لریندن آزربایجاندا یاتیریم یاتیرتماق اوچون هئچ حیمایت یوخ‌دور و اونلار گلیشمک و قازانماق اوچون تئهرانا، کرجه، مشهده، ایصفهانا و باشقا شهرلره کؤچمک زوروندا قالیرلار؟
-نه‌دن آزربایجانین هوشلو- بئیینلی- بیلیجی اوشاق‌لاری لا اؤرگنجی‌لری تئهرانا قاچیب، ایران یایلاسی‌نین اۏرتالایندا اۏلان شهرلرده یاشاماغی سئچیرلر؛ بیر داها آزربایجانا قاییتماییرلار؟
-نه‌دن ایران حاکیمییتی ایسلام تۏرپاغی اۏلان قاراباغ قۏنوسوندا ائرمنی داشناک‌لارینا قارشی هئچ بیر جیددی حرکت‌له سییاسی توتوما کئچمه‌ییر؟
–نه‌دن آزربایجانین مئشه‌لری ییغمالانیب، یئرآلتی-یئراۆستۆ خزینه‌لری تالانیب، یاشام چئوره‌سی داغیلیب، میللی-معنوی میراث‌لاری قۆرونماییر، بئله‌لیک‌له آزربایجان تۏرپاغی سؤمۆرگه‌چی‌لره یئم اۏلوب؟
-نه‌دن آزربایجان‌لا تۆرک‌لرین اۆرک‌یاندیران وکیل‌لری‌نین صلاحیت‌لری له اعتبارنامه‌لری رد اۏلوب، اۏنلاری ایران پارلئمانینا یۏل وئرمه‌ییرلر؟
-نه‌دن آزربایجانا اؤزل بانک یۏخدور؟ نه‌دن ایران‌دا یایینلانان پارالار آزربایجان لا تۆرک سیمگه‌لرینه بزه‌نکلی دگیل‌لر؟
آزربایجان لا تۆرک سیمگه‌لرینه بزه‌نکلی دگیل‌لر؟
-نه‌دن أیالتی-ویلایتی انجۆمن‌لر قورولماییرلار؟ نه‌دن قاجار دؤنه‌مینه‌‌دک آزربایجانین ایللر بۏیو حاکیم اۏلان میللی حاکیمیتی آرادان قالدیریلیب، قورولماغی أنگلله‌نیر؟
-نه‌دن ایران‌دا یاشایان آزربایجان تۆرک‌لری‌نین آزربایجان‌لا تۆرکییه اؤلکه‌لری آرا کۆلتۆرل، ایقتصادی، سییاسی هابئله تۏپلوم‌سال ایلگی‌لرله موناسیبت‌لر قورماقلاری أنگلله‌نیر؟
-نه‌دن آزربایجانین مالییات لا گؤمرۆک‌لری‌نین گلیریندن آزربایجانا خرجلنمه‌ییر؟ اۆسته‌لیک آزربایجانین آرابا ایله قاطار یۏل‌لاری، صنعتی هابئله شهرار ائلئکتریسته‌سی له چئشیتلی ائنئرژی‌لری، اوچاق آلان‌لاری، اۆسته‌لیک بۆتۆن آلت‌یاپی‌لاری بو قدر گۆجسۆز-دۆزنسیز دورومدا دیرلار؟
بونلارلا، بونلارا اۏخشار سۏرغولاری سۏروشان بیلگین‌لرله آزریایجان گنج‌لیگی «آزربایجان میللی حرکتی» کؤلگه‌سی آلتیندا تۏپلانیب، تۆرک‌لرین میللی ایستک‌لرینی، هابئله آرزی-دیلک‌لرینی دیله گتیرمه‌یه باشلاییب، بیلدیریش‌لر یایدیلار،اۆسته‌لیک آزربایجان اؤرگنجی حرکتی بو میللی حرکتین بیر قۏلو کیمی ۱۳۷۰-لردن اؤزۆنۆ ایرانین سییاسی تۏپلوموندا تانیتدیرماغا چابا گؤستردی.
ایندی ۳۰ ایله یاخین دیر بو میللی حرکت اؤز یۏلوندا دیر. یئنی فازیندا ایسه قادین‌لارین، ایشچی‌لرین، اؤرگتمن‌لرین، أمک‌لی‌لرین، أکینچی‌لرین، اوشاقلارین، اورمو گؤلونون ، ائله‌جه ده باشقا یاشام چئوره قونولاری‌‌‌لا آزربایجان تۆرک میللتینین بۆتۆن حاق‌لارینی دوشونوب، قوروماغا چالیشیر و بوتون بو ایستک‌لری اینتئرنئت‌ده، تئلئویزییونلاردا، ایستادییوم‌لاردا، بیل‌یوردلاردا، خییابان‌لاردا، و چئشیتلی اۏرتاملاردا مطرح ائتمه‌یه، بونونلا دا «حاققی دیلنمزلر، اۏنو یاشایارلار» دۆشۆنجه‌سی ایلکه‌سی ایله گئرچک اۏرتامدا یاشاماغا چالیشیر. بو اؤلمز حرکت، آزربایجان یوردوموزلا تۆرک میللتیمیزه اؤزل بیر یۏل دور. اوزون، اینجه، هابئله چتین بیر یۏل اۏلسا دا، بو یۏل بیزیم یۏلوموز دور.
