کوپ۲۹ و اورمو گؤلو!
گونئی آزربایجان قورتولوش پارتیاسی طرفیندن سیتم!
۱۱-۲۲ نویابر ۲۰۲۴گونلرینه گؤزله نیلن دونیا مقیاسلی کوپ۲۹چئوره کونفرانسی ایلک گونلرینی یوکسک گؤروشلرله سوردورور. الده اولونان بیلگیلره گؤره، آزربایجان و تورکیه پرئزیدئنتلری باشدا اولماقلا هر هانسی بیر یوکسک رسمینین چیخیشیندا اورمو گؤلو قونوسو گوندهمه گلمهدی. سانکی، فاشیست فارسچی-شعوبی تئهران رئژیمینین آنتی چئوره سیاستیله قورودولماقدا اولان آزربایجانین ماوی گؤزو بو دونیادا یئرلشمیر.
کوپ یاشیل دونیا دئمکدیر. ۱۱ گونلوک بو کونفرانسدا ایدئولوگیالار، سیاسال قونولار، دیپلوماسیا آلیش-وئریشلرینه یئر یوخدور گویا! دئمک بئلهدیرسه اورومو گؤلونون بیلهرکدن قورودولماسینا ندن گؤزلر، قولاقلار، دیللر قاپانمیشدیر.
فاشیست تئهران رئژیمینین آلت دوزئیده کوپ ب م ت سامتینه قاتیلماسی باشلی-باشینا چئوره دوشمنلیگینین گؤسترگهسیدیر. بو رئژیمه گؤره، یاشیل دئیل، دونیانین اساس رنگی آل قانلا بزنمیش قارا تورپاقدیر. بو رئژیمین ماهیتی بوتون دونیا اؤلکهلرینه بللیدیر. آنجاق، ماراقلیدیر کی، تورک دونیاسینی چیرکین هدفینه آلمیش بو رئژیمه قارشی تورک دونیاسی گولدن آرتیق بیر سؤز سؤیله میر.
اورمو گؤلو، ایللردیر کی دونیانین گؤزو قارشیسیندا تئهران فاشیستلری الیله قورودولور. بو قونودا داها چوخ بیلگی صاحبی اولان ایکی آزربایجان و تورکیه پرئزیدئنتلریدیر. سایین ایلهام الیئو و سایین تاییپ اردوغانین اورمو گؤلو قونوسوندا خبرسیز اولماسی ۲۱-جی یوزیللیگین ان گولونج شاکاسی اولابیلر. بو ایکی لیدئریمیزین بؤلگهنین ان بؤیوک اینسان فاجعهسی اولان اورمو گؤلو حاقدا دیللرینین آچیلماسی گؤزلنیرکن، گونئین گؤزلری کوپ۲۹-ا دیکیلمیشدیر. لاکین، نه باشلانقیجدا و نه ۱۱ گونلوک سورهجک بو محتشم باکی آتموسفئرینده و نه ده کنفرانسین پلانلانمیش ۱۴ تمل پانلینده، دوشمن فارسچی رئژیم جهالتینه محکوم اولان اورمو گؤلو فاجعهسیندن آد-سان یوخدور. حالبوکی، اورمو گؤلونون قورودولماسی یالنیزجا گونئی آزربایجان و چئوره ایالتلری دئیل، بیر باشا ناخچیواندان باکی کندلرینه، باشقا یؤندن ایسه هککاریدن گونئی دوغو آنادولویا اوزانان فارسچی فاشیستلرین تؤرتدیگی سسسیز سویقیریم جینایتیدیر.
سؤزسوز کی، ایللردیر گونئی آزربایجان میللی حرکاتی فعاللاری طرفیندن باکی و آنکارا دؤولت اورقانلارینا اورمو گؤلو فاجعهسینین بیلگیلری ویدئولار، گؤرونتولر، بیلدیریشلر آراجیلیغی ایله گؤندریلیر. بو اوزدن سادهلیک اولار کی، ایکی آزربایجان و تورکیه پرئزیدئنتلرینین بو اینسانسال، ائورنسل و چئوره سل فاجعهدن خبرلری اولماسین. آنجاق، نیه و ندن تئهرانین تورک دونیاسینا اولان بو آچیق نیفرتینه گؤز یومولور!؟
هانسی سینیر ایچنده اولماسیندان آسیلی اولمایاراق چئوره بیر کوره سل میراث کیمی سینیرلار اؤته سی عموم بشری یاشیل دوغادیر. اورمو گؤلو دونیانین ان بؤیوک دوزلو گؤللریندن و تاریخی بشری بیرارث کیمی نه سوچ ایشلمیش کی، هم دوشمن رئژیم طرفیندن، هم ایسه قارداش و اؤز اقتدارلاری ساریندان عئین سوچلا یارغیلانیر!؟
گونئی آزربایجان قورتولوش پارتیاسی بئله حساب ائدیر کی، ایکی تورکیه و آزربایجان اقتدارلارینین اورمو گؤلو قونوسونداکی سوسقونلوغو ان آزیندان آزربایجان تورک میللتینه بؤیوک اهانتدیر. اومارام کی، گلن گونلرده منیم بو ادعامین اساسسیز اولدوغو اؤنه چیخاراق، دونیانین ان اؤنملی ائکوسیستم حؤوضهلریندن اولان اورمو گؤلو قونوسو ان آزیندان آشاغی بیر پانلده یئر آلاراق کیمسهسیز گونئین وارلیغینی تمثیل ائتسین!
گونئی آزربایجانین ایگید تورک گنجلیگی، سیز هر زامان گونئین ایستیقلالی و بوتؤو آزربایجان سئوگیسیله آلیشیب-یانیرسینیز. بو سیزین ان قوتسال سئوگینیز، ایلکهنیز و اولکونوزدور. آزربایجانین گله جگی کسینلیکله سیزلرین اوموزلاری اوستونده اولاجاقدیر. بوندا هئچ شوبهه یوخدور. گؤرونن بو کی، اینانجیمیز مرکزینده یئر آلان دؤولت باشچیلارینین گونئی سورونو ایله اوغراشاجاق زامانلاری و پلانلاری یوخدور. بو سیزین نجیب روحونوزا اولومسوز ائتکی بوراخماسین. اورمو؛ تورپاغی و سویو ایله گونئی آزربایجان تورک جومهوریتینین ووران اوره گی اولاجاقدیر. سیزین ایگید ایرادهنیزله دوشمنلره، جاهیللره، ایشغالچیلارا، چؤره گی دیزی اوستونده اولان تئرروریستلره اؤلکهمیزده یئر اولمایاجاقدیر. آزربایجان تورک میللتی، قوتسال بئشیگیمیز اولان اورمونو تورپاغی و سویو ایله ایللر بویو ساووندوغو کیمی بوندان سونرا دا ساووناجاقدیر.
گونئی آزربایجان قورتولوش پارتیاسی باشقانی ائلدار قاراداغلی
۲۰۲۴-۱۱-۱۴
