گوج
گوج بیر فردین باشقالارینا ارادهسینی تحمیل ائتمهیه دئییلیر.
سیاسی گوج ایسه گئنل اولاراق بیر فرد یا گروپون، توپلومو ائتگیلهییب کنترل ائتمهسینه دئییلیر.
سیاسی گوج، توپلوم طرفیندن دستکلنیب، توپلومسال مشروعیت قازانیرسا اونا یاسال اقتدار دئییلیر.
برتراند راسل-ه گؤره هئچ بیر گلهنک(سنت) و توپلوم کسیملرینه دایانمایان سیاسی گوج، لوت و یا چیلپاق گوجدور.
سیاست اوزمانلارینین فیکیرلرینه گؤره، اینسانین اَن گوجلو اَییملریندن(میل) بیریسی گوج-ه اولان اَییمیدیر.
اینسانلار تاریخ بویونجا گوج الده ائتمک اوچون بیر-بیرلری ایله ساواشیب مجادله ائدیبده قیرغینلار تؤرتمیشلر.
آنجاق سؤزقونوسو سیاسی گوج اولورسا مسالهنین ماهیتی داهادا گئنیشلهنیر، سیاسی گوج گلدیکده توپلوم اینسانلارینین هامیسینی ائتگیلهین عامل نظرده توتولور.
بیلدییینیز اوزره اینسان تاریخینده سیاسی گوج مختلف آشامالاری آشمیشدیر، گلهنکسل دونیادا اولان سیاسی گوجون مشروعیتی توپلومدان دئییل، گؤیدن و تانری طرفیندن گلمکده ایدی.
شاه، سلطان و یا خلیفه تانرینین یئر اوزونده اولان نماینده و یا کؤلگهسی ایدی، او اوزدن ده اونون سؤزو، عملی و قرارلاری تانرینین سؤزو، عملی و قرارلاری کیمی آلقیلانیردی.
مدرنیته چاغی باشلادیقدا ایسه سیاسی گوجون مشروعیت و ماهییتیده دَییشیلدی، گلهنکسل چاغدا سیاسی گوج بیر فردین الینده اولدوغونا گؤره، توپلومون منفعتلری دئییل او فردین ایستکلری دوغرولتوسوندا قوللانیلدیغینا و او گوجون کنترل ائدیلمهدییی اوچون یولسوزلوق(فساد) و فلاکتلر گتیردیکلرینه شاهید اولان اینسانلار، اونو کنترل ائتمک اوچون چوخ دوشونوب داشینمیشدیرلار.
نییهکی سیاسی گوج بیر فردین و یا بیر گروپون الینده اولورسا استبدادی سیستملر اولوشوردو.
آرتیق اوزون زامان سورجی اینسانلاری بو سونوجا واردیرمیشدی؛
“گوج یولسوزلوق(فساد) گتیریر، مطلق گوج ایسه مطلق یولسوزلوق گتیریر”
او اوزدن ایلک اؤنجه سیاسی گوجون مشروعیتینی تانری طرفیندن دئییل توپلوم طرفیندن اولدوغونو ایرهلی سورنلر توپلومسال آنلاشما(قرارداد اجتماعی) نظریهسینی اورتایا قویدولار.
بو آنلاشمایا اساسا، توپلوم اینسانلاری آراسیندا دوزن(نظم)، گوونلیک(امنیت)، استقرار و اینسان حقوقلاری ساغلانسین دئیه، سیاسی گوج، بیر سیرا اینسانلارین سوروملولوق(مسئولیت) داییرهسینده یئرآلدی.
داها سونرا ایسه گوج یا قووت آیریلیغی(تفکیکقوا)، پارلمان سیستمی، فدرالیزم، گوج قوروملارینین توپلوم طرفیندن سئچیلمهسی، حقوق و آزادلیقلارین ساغلانماسی، سیویل توپلومون اولوشماسی(جامعه مدنی) و اونون دولت اوزره اولان نظارتی، دولتین یانیتجی اولماسی و بیر سؤزله دموکراتیک سیستم ایله سیاسی گوجون عمومیلشمهسینه گلیب چیخان پروسه، گوج آزغینلیغینی یئترینجه کنترل ائده بیلمیشدیر.
اؤته یاندان بو مساله اؤلکه ایچینده اولان گوج داغیدیمی(توزیع قدرت) ایله ده تکمیللشمکدهایدی.
سیاسی گوج یالنیز بیر بؤلگهده متمرکز اولورسا باشقا بؤلگهلره مسلط اولور، مرکز متن و اصله دؤنوشور و قیراق، حاشیهلر ایسه فرعه دؤنوشورلر.
او اوزدن ده اؤلکه چاپیندا، مرکز اؤنم داشییاراق، بؤیویوب گوجلهنیر و قیراق بؤلگهلر ایسه ضعیفلهنیب اؤنمسیز اولورلار.
بو دورومون آرادان قالدیرماسی و عدالتین ساغلانماسی اوچون سیاسی گوج بؤلگهلرده ده داغیدیلمالیدیر.
بو تور قاتیلیم، اینسانلارین عدالتلی شکیلده سیاسی گوج-ده پایداش اولمالارینا، اونو منیمسهمهلرینه و داها گئنیش دستکلهمهلرینه ندن اولور.
اوستهگل، گوج مسالهسی تکجه سیاسی داییرهلرده دئییل توپلوم ایچینده ده اویغولانمالیدیر.
اؤزللیکله اینسانی آرمانلارا گؤره مجادلهده بولونان اجتماعی فعاللار و مبارزلر مجموعهلرینده، بو مساله داها دقیق رعایت اولونمالیدیر.
گوجو کنترل ائتمک اوچون اَلوئریشلی مکانیزمالار، دموکراتیک گئدیشات، توپلوسال اوس(خردجمعی) و گَییشمه کولتورو یایغینلاشمالیدیر.
بئله اولان سورج گوج-و کنترل ائدهرک، اؤزباشینالیق، دیکتاتورلوق، حاقسیزلیق و یانلیشلیغین قارشیسینی آلیر و چوخونلوغون منفعتلرینی و سسلرینی ساغلاییب یانسیدیر.
داها دوغروسو گوج یالنیز توپلومون خدمتینده اولان واسطهیه چئوریلیر.
سیامک میرزایی
