گونئی آزربایجان میللی قورتولوش حرکاتی ۳۱ دئکابر
– دونیا آزربایجانلیلارینین همرایلیک گونونو قوتلاییر!
لاکین نئجه!؟
۳۱ دئکابر – دونیا آزربایجان تورکلرینین قودسال بیرلیگی،
بوتؤو آزربایجان بیرلیگینین یئنیدن قورولماسینین باشلانغیج گونودور.
بو، میللتیمیزین سؤنمه ین اینامی، دؤولت باشچیلاریمیزین ۱۹۸۹-ایلدن بری آردی ـ آردینا دیله گتیردیکلری سؤزدور.
بو ایلین ۳۱ دکابر بایرامی بایراغیمیزین آزاد اولموش قودسال قاراباغ سماسیندا دالغالانماسی ایله بام ـ باشقا سئوینج و غرورلا کئچیریلیر.
قهرمان اوردوموزا، ایگید شهیدلریمیزه، قاضی لریمیزه وعالی باش قوماندانیمیزا شوکران بورجوموزلا!
بو گونون اعتباری ایله دئسک ۳۱ دئکابر یعنی:
بیر میللت – ۵۰ میلیونلوق آزربایجان تورک میللتی،
بیر دؤولت – آزربایجان رئسپوبلیکاسی،
بیر بایراق – آی-اولدوزلو گؤی، آل، یاشیل بایراغیمیز،
بیر پریزیدنت – ایلهام علی یئو جنابلاری.
بو تابلونون اوبیکتیو اؤنونون آچیلیشی اوچون هانسی اؤن باشلیقلار گرکیر؟
۱- ۴۰ میلیون سویداشیمیزین ایران فارسچی فاشیزمین قارشی‌سیندا الی یالین اؤلوم-دیریم موجادیله سی ۵۰ میلیونلوق آزربایحان داواسیدیر. بو داوادا دؤلت و میلتجه اورتاق اولماق گرکیر. گونئین قورتولوشو اوغروندا «آزربایجان میللی حرکاتی فوندونون» یارانماسی ان اؤنملی ایلکین آددیمدیر.
۲- آزربایجان میللی حرکاتینین ایگید گنجلرینین فارسچی-شعوبی دوستاقلارد‌ا بوغولان سسلرینین سسی، اوشاقلارینین آغلار گؤزلرینین، آج قارینلارینین مرحمی اولماق گونئین ان آجیل ایسته گیدیر. اؤزونو دؤلت و میلتین بیر پارچاسی دویان کیمسه الینی داشین آلتینا قویمالیدیر.
۳- ایرقچی رئژیمین باسقیلاری اوزوند‌ن ایللر بویو حبس چکمیش، ایشکنجه گؤرموش، ان ایلکین میللی-اینسانی حاقلارینی ایتیرمیش، ایشینی-مالینی، جان امنیتینی قاسیب رئژیمه اودوزموش و سونوند‌ا یاشام ساواشی وئرمک اوچون وطنین قوزئینه و تورکیه‌یه اوز توتموش یوزلرله آزربایجان فدائیسی تورک عائله، ب م ت قانونلارینین چوخ آشاغی‌سیندا ازگین دورومدا عؤمور سورورلر. ایکی دؤولتیمیز – اؤزل‌لیکله اؤز به اؤز آزربایجان دؤولتی ایگید اؤولادلارینا جانلا-روحلا ییه‌له‌نمه‌لی‌دیر. بو اونلارین ان دوغال حاقلاری‌دیر. یوخ،« بیز هله بیر میللت-دؤولت کیمی سوبیئکتیو و روحسل بیرلیکده دئیلیک» دئیریلیرسه، اوندا گونئی‌لی ایگیدلریمیزین طالعینی ان آزیندان «بیرلشمیش میللتلر تشکیلاتینین قاچقینلار اوزره عالی کومیسسارلیغی»نین اینسیاتیوینه بوراخماق گرکیر. حالبوکی ایلگیلی دؤولت اورقانلارینین اینسانی و هومانیتار مسئله‌لرده ویجدانلی داورانیشی ایله بو کیچیک سورونون چؤزومو اولدوقجا راحاتدیر. آیریجا، وطندن وطنه گلمیش سویداشیمیزا قوجاق آچماق، دؤلت و ملت اوچون ان درین قازانجلاردان بیریدیر.
۴- بیر میللت، بیر دؤولت، بیر بایراق و بیر پرئزیدنت صاحبی اولماق اوغروندا ۵۰ میلیونلوق میللی دوشونجه طرزینده تئلکانال، مئدیا و واحید پروپاگاندا شبکه‌سی یولا سالماق گرکیر. بو آزربایجان رئسپوبلیکاسی دؤولتی اوچون ان آز هزینه ایله باشا گلندی. بئله کیچیک پروژه لر اوچون گونوموزون گوجلو، باشی اوجا آزربایجان دؤولتینین معنوی و سیاسی ایراده‌سی یئترلیدیر. بئله گرکلی ایراده نین حیاتا کئچیریلمه سیله تکجه گونئی سسینین اوجالماسی دئیل، تهرانین شعوبی سحر تئله کانالینیندا زهر ساچماسینا یئترلی جواب امکانی آچیلاجاقدیر.
۵- باشد‌ا آزربایجان میللی حرکاتی اولماقلا، گونئی آزربایجان میللی-سیاسی قوروملارینا دوغما گؤزله باخماق، اونلارین ساواشینی اؤزونونکو بیلمک گرکیر. اونلارین مادی-معنوی یاردیمینا قوشماق همرایلیک آنلامینا گلیر. همرایلیک قورو تبریکله دئیل، ائو‌ده اوتوروب هوببی اولسون دئیه ساواش‌چیلارا یاشاسین دئمکله اونلارین عائله‌سینین قارنی دویماز! جسارتله مالی پایلاشماق همرایلیک دئمک‌دیر. شعاردا دئیل، عملده دایانیشما ساغلانارسا کرچک بیرلیک یارانار.
۶- دیاسپورا تشکیلاتلارینین ایش بیرلیگی آزربایجان تورک میللتی نین و دؤولتی نین دونیادا تانینماسی اوچون ان اؤنملی ایشلردن بیریدیر. غیری-حکومت و یا سیویل قوروملارین میللتلر آراسیندا نفوذ دایره‌سی چوخ گئنیش‌دیر. دونیا آزربایجانلیلارینین همرای‌لیگی اصل آنلامدا میللی درنک، آسسوسیاسیا، فئدراسیونلار کیمی دونیا چاپیند‌ا واحید پروژه لر اوزریند‌ه بیرگه حرکتده ن عبارت اولمالیدیر. بئله، بیرلیکلرین ساغلانماسی ایله میلت آراسیندا تشکیلاتچی و سیستملی بیرلیکلر یارانابیلر. و بونلارا بنزر شرطلرین حل اولونماسی ایله دونیا آزربایجانلیلارینین همرای‌لیگی، بیرلیگی اصل اوبیئکتیولیک قازاناجاقدیر. او گونلرین دیله گیله.
یاشاسین اللی میلیونلوق میللتیمیز و دؤولتیمیز!
یاشاسین ۳۱ دئکابر – میللی بیرلیک و همرای لیگیمیز!
گونئی آزربایجان میللی قورتولوش حرکاتی
۲۸/۱۲/۲۰۲۳
