” ۸ مارت موباریزه گونودور!”
“پینار شاکر”
۸ مارت دئدییمیز چیچه ک تؤحفه وئره جه یینیز، قولاغیمیزا گؤزل سؤزلر دئیه جه یینیز سئوگیلی لر گونو ویا دونیا قادینلارینا حصر اولونموش بایرام دئییل،ساواش گونودور موباریزه گونودور…
اصلینده بیز قادین لار اوچون هر گون ۸مارتدیر…
هانی او گوناها گیرمه یه سیز دئیه حیجاب ماسکاسی آلتیندا آر دئیه گیزله دیینیز و یوخ ائتمه یه چالیشدیغینیز؟! قادینلیغیمیزین گونودور ۸ مارت…
هانی او دینسیز دینینیزده یاریم آدلاندیردیغینیز، عدالتین ، اؤزگورلويون دادینی داددیرمادیغینیز، تاریخ بویو یوخموش کیمی داوراندیغینیز قادین لارین، وارلیق بایراغینی بوغازیندا باغیرا باغیرا ساللادیغی گوندور…
۸مارت ائشیت ایشلرده چالیشیب ائشیت قازانج ألده ائده بیلمه ین لرین، عینی داورانیش لار سرگیله ییب میللتین و عدالتین گؤزونده عینی یارقیلانمایانلارین و سوبایلیق سولطانلیق دئیه ن کیشی لرله، ائوده قالیب قارت قیز آدلانان قادینلارین عدالت ساواشیدیر…
بیزیم اوچون ۸ مارت لار یالنیز ایشچی قادین لار گونو دئییل رحم ده نوطفه باغلادیغی گوندن جینسییتی سورغولانان اوشاقدان توتدو، اؤلوم اعلامیه سینده و حتی باش داشیندا شکیلینین اولماسی یاساق اولان قوجا قادینلارین گونودور…
بیزیم اوچون بوتون گونونو مطبخده کئچیرتمک زوروندا قالان، برده کیمی ایشله ین ، آتا، قارداش، أر، اوغول شیدتینه معروض قالان، باشداکی کیشیسیزلرین عدالت سیزجه یازدیغی قانون چرچیوه سینده یارقیلانان، آبیر قفسینده سیخیشیب یوخ اولان ،هر بیر قادینین هر گونو قادینلار موباریزه گونودور…
بو گون و هرگون بوتون دونیادا صیرف قادین اولدوغو اوچون سؤموروله ن،توپلومون هر بؤلومونده چالیشا بیلمه ین، سوی داوامی اوچون جوجه کئشلیک آلتی کیمی قوللانیلان، تؤره جینایت لرینه،شیدته، تجاووزا، جینسل و هر جوره توپلومسال جینسیتجی و آیریمجی یاخلاشیملارا قوربان گئدن بوتون قادینلارین گونودور…
بیزیم اوچون ۸مارت و هر بیر اینسانی حاق لار قونوسوندا اولان بیر موناسیبت، تکجه قادین لار، اوشاق لار، قوجالار،گنج لر و… اوچون اولان بیر موناسیبت یوخ!
۸مارت لار اوشاغینین آنا دیلی یاساقلانمیش آنانین گونودور.
وطنی استعمار اولونموش بیر میلتین گونودور.
میلت ساییلمایان ۳۵ میلیونلوق آزربایجانلینین گونودور.
دوشونوروک وطنیمیز بو ایشغالدان قورتولورسا تکجه قادین لار یوخ بلکه بوتون میلتیمیز اؤز اینسانی و دئموکراتیک حاق لارینی ألده ائده بیله جک دیر.
اینانیریق او گون لر چوخ یاخیندیر، اؤزوموزه یاشاماق، اؤز اولماق ،اؤزگه لردن قورتولماق و دئموکراتیک آزربایجان جومهوریتی بایراغی آلتیندا یاشاماق چوخ یاخیندیر.
دوغروسو اولو اؤندریمیز ابولفضل ائلچی بی دئمیشکن: “من بونا اینانیرام گونئی آزربایجان بو ایستیعمار دان قورتولوب و آردیجا بؤیوک و بوتوو آزربایجان یاراناجاق بو بیر رویا دئییل میلیون لار اینسانین اوره ینده یاشایان ایسته ک دیر آزربایجان میلتینین ایستک ایله ده گرچکلشه جک”
https://upload.cc/i4/De6id.jpg
