گونئی آزربایجان میللی قورتولوش پارتیا‌سی، میللی آراشدیرمالار مرکزی باشقانی
اکبر دباغ دیلمقانی
“جمهوری اسلامی اؤلومه دوغرو گئدیر”
ایران ایسلام اینقلابی اسناسیندا هر دؤنم کوتله‌نین دسته‌یینی قازانماغا چالیشان توتالیتر سیستئم ، سؤزده ۱۴ اونجو جمهور باشقانی سئچکی لرینده اومدوغو دسته‌یی میللت لردن آلا بیلمه‌ییب.
سون سئچکی اویونودا ایسه دؤنه مین ان آز سس وئرمه اورانینی یاشایان توتالیتئر ایران رئژیمی، مئدیا آچیقلاماسینا گؤره میللتلرین آنجاق ۴۰ فاییز سسینی آلا بیلیب.
آما گرچک گؤرونتولره گؤره ،کوتله سادهجه ۱۵ فاییز جواریندا آلداتما رای صاندیقلارینا یاناشیب .
بو اورانین آنلامی، میللتلرین جمهوری ایسلامی یه گوونمه‌دیغی و رئژیمین مشروعیتینین گوندن گونه آزالماسینین آنلامینا گلیر.
بئله کی حتی ۱۳ جو دؤنم ،الی قانلی رئیسی سئچکی لرینده ۴۶ فاییز سس توپلانمیشدیر و باش دیکتاتور خامنه‌ای موتولوق سازی چالمیشدیر . بونا یاخمایاراق آزربایجان تورک لری یاشایان بؤلگه‌‌لر گئنه آز سس وئرمه اورانیا صاحیب دی.
رئژیم بو دؤنم،احمدی نژاد، لاریجانی و خامنه‌ای نین ساغ قولو تانینان وحید حقانیان کیمی کئچمیش گوونیلیر و دئوریمجی گوجلری کنارا قویاراق بیر تورک آدایی، سئچکی سیرکینه یوللادی تا تورکلرین گوونینی و سسینی، هم سیناییب هم ده قازانسین.
آزربایجان بؤلگه‌لرینده پزشکیان اورتالاما سسی قازاندی و تورکلرین رئژیمه گوونمه‌دیغی سون اون ایلده بوتون دونیایا آیدینلاشدی.
۴ آدای آراسیندا پزشکیانین کئچمیشی باشقالاریندان بیر آز تمیز گؤرونسه‌ده ،اونون یاخجی اینسان اولدوغو آنلامینا گلمه‌ییر، سادهجه پزشکیانین الینه یئترینجه هله فرصت دوشمه‌ییب کی الی رسما میللتین قانینا باتسین و رئژیمین جینایت کار باشچیلاری کیمی چیرکین اوزو اورتایا چیخسین .
بو گرچه‌‌یی هامی بیلیر ،ماللا رئژیمی کیمسه‌یه راحات-راحات گوونمز، هله جمهور باشقانی قونوسوندا خامنه‌ای نین تام گوونینی قازانمایان و بیت رهبرینین امرینده اولمایان بیرینی ،اویون جیزیغینن ایچینه یول وئرمزلر و درحال آرادان قالدیرارلار،ایستر رفسنجانی یا دا رئیسی کیمی رئژیمین قوروجو مهره‌لری اولسون .
رئژیمه باغلی اولانلار، صاف ساده اینسانلار ، رفرم یانقیسی اولانلار پزشکیانی طالع قوشو باشلارینا قونموش دئیه سانانلار ایسه، کئچمیش پرزیدئنت لر کیمی، پزشکیان یا جلیلی، ایکیسی ده خامنه‌ای نین بویوندوروقلو اویونجاغی اولدوغونو یاخجی بیلیرلر.
پزشکیانین آنی دن اورتایا چیخماسی و آزربایجان ماراقلاری اساسیندا تبلیغات ائتمه‌سی، اونا وئریلمیش پیلانی اینجه-اینجه یئرینه گتیریلمه‌سی ،رئژیم و ایراندان(حکومت و حاکمیت )آیریلمیش آزربایجان تورکلرینین رایینی آلماق و رئژیمین الدن گئدن مشروعیتینی ،تورکلرین واسیطه‌سیله یئنیدن قازانماسیدیر، یوخسا تورکلرین ایران جغرافیاسیندا حاکمیتی اله آلماسی، فارسچی-شعوبی-ایرانشهری دوشونجه نین آرادان گئتمه‌سینه نه‌دن اولاجاق.
بو سبب‌له رئژیم اویونو قیزدیرماق اوچون، پیلانین ایکینجی پرده‌سینی ،ایکینجی یاریدا دوام ائمه‌لیدیر کی،الدن گئدن اعتبارینی تکرار قازانسین.
خامنه‌ای رهبرلیق پستونا گلندن بری، ان قورخدوغو اولای، ایرانین پارچالانما تهلوکه‌سی و زامانیندا اؤنونو آلا بیلمه‌مه‌سی ،یوخونو گؤزلریندن قاچیریر، بو اساسدا، سون گونلرده تئروریستی سپاه گوجونو اوچ قوللو ایداره سیستئمی (مقننه، مجریه و قضائیه ) هییتینین باشینا گتیره‌رک(سپاه اوردو قووه سی ) اؤلکه ده تام آنلامدا نیظامی حکومت-دیکتاتورلوغو اعلان ائتدی .
آما اجلین قورخویا فایداسی یوخدور، ایرانین پارچالانماسی و میللتلرین باغیمسیز اولماسی تاریخین ایستک سوره‌جیدیر.
سپاه اوردو قووه سی، پزشکیان و آزربایجان تورکلرینه قارشی سس سیز داربه آنلامینی داشییا بیلر و ایران آدلانان جغرافیانین گلجک آغیر دؤنه‌مینین ایداره ائته گوج دونمینی اوغلو مجتبی خامنه‌ای‌یه کئچه‌نه قدر، قیرقین سیلاحینی سوسدورمایاجاق.
گونئی آزربایجان میللی قورتولوش پارتیا‌سی، میللی آراشدیرمالار مرکزی باشقانی- اکبر دباغ دیلمقانی
۱۴۰۳/تیر/۱۰
