گونئی آذربایجان قورتولوش پارتیاسینین دوزوکو
(نیظامنامه)
گونئی آذربایجان قورتولوش پارتیاسینین دوزوکو
(نیظامنامه)
۱. گونئی آزربایجان قورتولوش پارتیاسینین (بون‌دان سونرا «قورتولوش» و یا «گاقپ») گنل پرینسیپلری
۱.۱.آ.«گونئی آزربایجان قورتولوش پارتیاسی»– قورتولوش و یا گ. آ. ق. پ،
. “South Azerbaijan Liberation Party”– Qurtuluş və ya SALP, اینگیلیسجه‌سی ایله
آزربایجانین گونئی نین قورتولوشو، گونئی آزربایجان تورک جومهوریتی نین یارانماسینی، قوزئی آزربایجان دؤولتینین داها دا درینلشمه‌سینی، آزربایجانین یئنیدن بوتؤولشمه‌سینی، ایشغال‌چی گوجلرین ایشتیراکی ایله ایشغال اولونموش تورپاقلاریمیزین آزادلیغینی، معاصیرلیگینی، باغیمسیز، دئموکراتیک، حقوقی دؤولتینین یاراتماسینی اؤزونون اساس مقصدی حساب ائد‌رک، قورتولوشچو تورک سویداشلارینی اؤز سیرالاریندا بیرلشدیرمه‌گه چالیشیر.
۱.۱.ب.«گونئی آزربایجان قورتولوش پارتیاسی» لوقوسونون آچیقلاماسی:
– یئر کوره‌سینده تورکلویون ۳ سیمگه‌سی، چاغداش توران، بوتؤو آزربایجان، گونئی آزربایجان دؤولتچیلیگینین ایچ-ایچه گیرمیش لیگیدیر.
– دؤولت بایراغیمیزدا چاغداش‌لیغی تمثیل ائد‌ن قیرمیزی فوندا آی-اولدوزموز.
۱.۲. قورتولوش، دونیانین هاراسیندا یاشاماسیندان آسیلی اولمایاراق هر بیر آزربایجان تورکونو و تورک سویداشلارینی گونئی آزربایجانین قورتولوشو و ایستیقلالی اوغروندا بیرلشمه‌گه چاغیریر.
۱.۳. قورتولوش، قوزئی آزربایجاندا گئدن دئموکراتیکلشمه جهدلرینی »آزربایجان میللی حرکاتی»ندان آیری توتماییر، رئسپوبلیکامیزین گوجلنمه‌سی، دئموکراتیکلشمه‌سی و چاغداشلاشماسی اوغروندا ایشتیراک ائتمه گینی اؤزونون واز کئچیریلمز حاقی حساب ائدیر.
۱.۴. دونیانین هاراسیندا آزربایجانلی وارسا، قورتولوش اورادا تشکیلاتلانما ایشلری آپاریر.
۱.۵. قورتولوش پارتیاسینین نیظامنامه‌سینی قبول ائد‌ن، گونئین قورتولوشو یولوندا موبارزه آپارماق ایسته‌ین هر کسین، آزاد، دئموکراتیک تمللر اوزرینده قورومدا اویه لیگی سربستدیر.
۱.۶. قورتولوش، بئینلخالق حقوق و قانونلارا اویغون اولاراق فعالیت گؤستریر.
۱.۷. قورتولوشون مالیلشمه‌سی ایانه‌لر، اویه‌لیک حاقلاری و پارتیانین قانونلار چرچووه‌سینده ائکونومیک فعالیتلرینه باغلیدیر.
۲. قورتولوشون آماجی
۲.۱. دونیانین چئشیدلی اؤلکه‌لرینه سپه لنمیش آزربایجان تورکلرینی میللتلشمه، دؤولتلشمه، بوتؤولشمه اوغوروندا اورقانیزه ائتمک، گونئی قافقازدان، زاقروس سیراداغلارینین قوزئییندک چکیلن «آزربایجان یایلاسی»نین تک بیر یورد اولماسینین گرچکلرینی بیلیم یوللارییلا گونده‌مه گتیرمک، قورتولوشون تمل چالیشمالاریندان بیریدیر.
۲.۲. آزربایجان تورک میللتینین بوتؤولشمه‌سینین و قورتولوشونون تاریخی دوشمنلری مارکاسی حالینا گلن روس و فارس ندنلرینی آچیق تانیتماق تورک میللتینین واز کئچیریلمز حاقیدیر. بو باخیمدان قورتولوش، گونئی گنجلرینین تورکیه و آزربایجان ائیتیم مرکزلرینده آچیق و میللی یوکسک سوییه‌لی ائیتیم آلماسی اولدوقجا گرکلی حساب ائدیر .
۲.۳. آزربایجاندا اؤنجوللوک و چاغداشلیق شرطی دئموکراسی‌دیر. قورتولوشون باشلیجا چابالاریندان بیری اینسان قافاسینین ایستیثمارینا و اونون کؤتو یؤنلندیرمه‌سینه سون وئرمکدیر. دئموکراتیکلشمه‌نین ان باش دوشمنی تک آداملیق ذهنیتدیر. ایستر حقوقی، ایسترسه ده حقیقی باخیمدان، تک آدام یؤنتیم ذهنیتی چاغداش اینسانلیقلا یاخیندان-اوزاقدان علاقه‌سی یوخدور. قورتولوش، بیر میللی-سیاسی قوروم اولاراق دئموکراسی یولونو کسن تک آداملیق یؤنه تیملرین بوتون تورلرینه قارشی‌دیر.
۲.۴. اؤلکه‌ده اولوسال دوشونجه اوره تیمیله مشغول اولان مرکزلرین ان اؤنجول و مودئرن تئکنولوژیه ییه‌لنمه‌سی شرط‌دیر. بوتؤو آزربایجان ایدئیاسی ایله گونئین قورتولوش حرکاتینا یؤن وئر‌ن کیچیک چاپلی ائیتیم تیملرینین یارانماسی بؤیوک اوغوردور. باغیمسیز آزربایجان یوردداشی، دئموکراسینین، اینسان حاقلارینین، اؤزگورلویون، لائیک لیگین ائیتیمینی قورتولوش موجادیله‌سینین سورجیندن اؤیره‌نمه‌لیدیر. چونکی، بو گونون اؤیرنجی‌سی کسینلیکله اؤزگور گونئی آزربایجان تورک دؤولتینین اؤیرتمه‌نی، یؤنتیجی‌سی اولاجاق‌دیر.
۲.۵. گونئی آزربایجان تورک دؤولتینین یارانماسی، بوتؤو آزربایجان دؤولتچیلیگینین دانیلماز اؤن شرطی‌دیر. «بوتؤو میللت، بوتؤو وطن یولو گونئین قورتولوشوندان کئچر!» آنجاق، گونئین قورتولوشوندان سونرا، تورک دونیاسینین قودسال اولکولری گرچکلیک تاپار!
آیریجا آزربایجان سینیرلاری دیشیندا یاشایان کومپاکت و داغینیق تورک سویداشلاریمیز واردیر. بو قونو آزربایجان تورک میللتی، آزربایجان میللی حرکاتی و گاقپ-نی دا یاخیندان ایلگیلندیریر.
قاشقای، تورکمن، خلج، خوراسان تورکلری کومپاکت و داغینیق یاشام سورن سویداشلاریمیزین آنا وطندن اوزاق دوشمه‌سی اونلارین آزربایجاندان آیری اولماسی آنلامینا گلمیر! اونلارین دا آزربایجان کیمی قورتولوش یولو یالنیزجا گونئی آزربایجان مرکزلی مستقیل دؤولتینین یارانماسیدیر. یالنیز، گونئی آزربایجان تورک جومهوریتینین تورلو ائتکیسی ایله آنا آزربایجان سینیرلاریندان اوزاقدا قالان تورک توپلولوقلاری اؤز میللی-سیاسی و مد‌نی حاقلارینا ییه‌لنه‌جکلر. سؤزسوز کی، بو حاقلارین الده ائدیلمه‌سی اوچون یئرلی تورکلرین یوکسک ائیتیمی و سونوندا میللی ایراده‌سی گرکیر.
تهران و کر‌جه گلینجه، اورالاردا چوخلو آسسیمیلاسیا اولموش سویداشلاریمیز یاشاماقدادیر. تهران دونیانین ان قالابال‌لیق مئتروپول شهرلرین‌دن بیریدیر. بؤیوک تهران و چئوره‌سی آزربایجان یایلاسینین صفیر سینیر نقطه‌سی‌دیر. اورادا میلیونلار آزربایجان تورکو یاشاماقدادیر. قاجار تورک دؤولتینین باشکندی سئچیلن او گونون کیچیک بؤلگه‌سی زامان-زامان بؤیوک کؤچلر سونوجوندا متروپول شهره چئوریلمیشدیر. بو متروپولون گله جه گینین یؤنتیمی کسینلیکله غیری-فارس ائتنیکلرین، اؤزللیکله تورکلرینین چوخونلوغو ایله اولوشمالیدیر. طبیعی کی، تهران اوچون چوخولجو، چاغداش، دئموکراتیک و یوکسک سیاسال-سوسیال پایلاشیم ان واجیب آرزو حساب اولونور. لاکین، بوتون اینسانجیل آرزولارا رغمن، پانفارسیزمین یاراتدیغی اوستون ائتنیکلی ایدئولوژیدن ائتگیلی دوروما دوشموش غیری اینسانی گئنیش بیر یاپی بو متروپول شهرین دینج گله‌جک توبلوسونو گئنیش اؤلچوده قارانلیق گؤرونوملره ایته‌له‌مکده‌دیر. بو قونودا آمح-نین بوتون میللی-سیاسی قوروملارینین اورتاق دوشونجه اوره تمه‌سی ایله یاناشی ایشبیرلیگی گرکیر.
بؤیوک کرج و چئوره قونوسو تهراندان فرقلی و آیدیندیر. بو گون البورز آدلانان ایالتین بوتونو آزربایجان یایلاسینین گونئی دوغو بؤلگه‌سی‌دیر. بو بؤلگه ایستر جغرافیک، ایسترسه ده میللی-سیاسی آنلامی ایله آزربایجان یایلاسینین دوغال سینیرلاری ایچینده‌دیر. ساده و نئت آنلامی ایله کرج آزربایجاندیر.
۲.۶. ۲۰۲۰-جی ایله دک، قاراباغین ایشغالی وطنین ایشغالی دئدیک. بو اولوسال یارانین سونلانماسی اولوسال ساواشدان کئچر دئدیک! ساواش ایسه، اولوسال اینانجا باغلی اولان قورخماز لیدئرلیک ایستر دئدیک.
آزربایجان دؤولتینین اقتداری-مخالیفتی تک یوموروق اولاراق، میللتیمیزین قهر‌مان اوردوسونا ایناندی! بو اینانج، آزربایجان اوچون ۵۰۰ ایللیک سورکلی یئنیلگیلردن سونرا ایلک اولوسال ظفری قازاندیردی. آزربایجان پرئزیدئنتی،عالی باش کوماندان ایلهام علیئوین ایناملی لیدئرلیگینده ۴۴ گون ایچینده قاراباغین اؤنملی بؤلومو دوشمندن قورتولدو. تورکیه‌نین ده اونودولماز ایشبیرلیگیله میللتیمیزین قورتولوشچو اینانجی ذیروه‌یه یوکسلدی. همین یوکسک علوی اینانجلا دیپلوماتیک و میدان حرکاتی آزربایجان طرفینه کئچدی. ۲۰۲۳/۰۹/۱۹-دا باشلایان آنتی-تئررور عملیاتیندا آزربایجان اوردوسو توپلام ۲۴ ساعت سورجینده خانکندی باشدا اولماقلا قاراباغین بوتونونو دوشمنلردن تمیزلدی. و ایندی ان بؤیوک میللی ساواشیمیزین زامانی گئت-گئده یاخینلاشیر. گونئین قورتولوشو!
۲.۷. چاغداشلیغین ان اؤنملی اؤن شرطلریندن بیری لاتین الیفباسی‌دیر. عین زاماندا چاغداش تورک اؤلکه‌لرینین اورتاق یازی سیستمی ده همین قرافیکده‌دیر. روس کیریل قرافیکاسی ایله یاناشی عرب و فارس قاپساملی ایسلام قرافیکلرینین تورک دونیاسینین بیرلیگینه ووردوقلاری ضربه گون کیمی آیدیندیر. چاغداش دوشونجه‌نین گله‌جک نسیللره اؤتورولمه‌سی، اؤلکه‌نین گئری قافالیقدان قورتولوشو دئمکدیر. لاتین الیفباسی بو یولون شاه داماریدیر. لاتین قرافیکالی تورک دیلینین آزربایجانداکی رولو، اؤلمز کاسپرالی نین «دیل‌ده، دوشونجه‌ده، ایشده بیرلیک» دئویزیله عین اؤلچودور.
۲.۸. گونئیین کسکین قورتولوشو، قوزئیین ایسه دئموکراسی ایلکه‌لری اوزه رینده ایر‌ه لیله‌مه‌سی قورتولوشون وازکئچیریلمز یول خریته‌سی‌دیر. بونا گؤره، باغیمسیز مئدیایا، اؤزگور ایلتیشیم گوجونه یئتیشمک اوچون نئچه دیللی بیلگی پایلاشیم تکنولوژی‌سینه، چئشیدلی بیلگی قایناقلارینا ییه‌له‌نمک گرکیر. قورتولوشا گؤره، گونئی-قوزئی آیرینتی‌سی اولمادان آزربایجان مئدیاسینین یؤنتیجی مرکزی اولمالی و بو مرکزین تورکیه و تورک توپلولوقلاری ایله ایچ-ایچه چالیشماسی گرکیر.
۳. قورتولوشدا اویه‌لیک.
۳.۱. قورتولوشدا اویه‌لیک کؤنوللو، ایراده‌لی و شخصی‌دیر. قورتولوشا اویه لیک شرطی قوروم ایلکه‌لرینی، دوزویونو قبول ائتمکله یاناشی اویه‌لیک حاقی اؤد‌ه مکله‌دیر.
۳.۲. آزربایجانین گونئینین قورتولوش ساواشیندا ایشتیراک ائتمه گی قبول ائد‌ن، غربی آزربایجان باشدا اولماقلا، دربندین، بورچالینین، گؤیچه-زنگزورون، انز‌لی‌دن توتموش آزربایجانین ان گونئی بؤلگه‌سی اولان سونقورادک ایشغالدان قورتولوشونا اینانان، ۵۰ میلیونلوق آزربایجان تورک میللتینین شرفینی، لیاقتینی، اوجا توتان هر بیر تورک و آزربایجانلی شخصین دینیندن، دیلیندن، سویوندان آسیلی اولمایاراق قورتولوشدا یویه اولماسی ایرادسیزدیر.
۳.۳. قورتولوشون چالیشما دینامیکاسی بؤلگه‌لر اوزره اویغونلاشیر. اؤزگور اؤلکه‌لرده، قوزئی آزربایجاندا، تورکیه‌ده عضولرین آچیق و یاریم آچیق چالیشماسی مانعسیز اولسا دا، گونئی آزربایجاندا و ایشغال اولونموش باشقا یئرلریمیزده اویه‌لیک تک آنلامییلا گیزلیلیک ایلکه‌سینه دایانیر.
۳.۴. قورتولوشدا اویه‌لیک ایلقارلا، سیرداشلیقلا، اؤزوئریله اؤلچولور. دوشمنلرله گیزلی ایلیشکی قورماق، قورومون ایچ پایلاشمالارینی، ائشیگه سیزدیرماق میللی دویارسیزلیق و سرت توتومویلا خیانتدیر. بئله دوروملاردا دویارسیزلیق عاملی یوخلاما قورومو طرفیندن سورغولانیر، سوچو بللی اولان اویه‌نین اویه‌لیگی دایاندیریلیر.
۳.۵. قورتولوشدا سیرادان خطالارین قارشیلیغی، ایلک اویاری، یازیلی اویاری، کئچیجی اوزاقلاشدیرما، کسکین اوزاقلاشدیرما کیمی جزالار اویغولانیر. جزالی اویه‌نین قرارا قارشی دورماسی اونون دئموکراتیک حاقیدیر. یؤنتیم بو باغلامدا شخصین یئنیدن دیندیریلمه‌سی ساغلامالی، جزانی گؤزدن کئچیرمه‌لیدیر.
۳.۶. قورتولوشدان اوزاقلاشما هر اویه‌نین حاقیدیر. نورمال دورومدا قورومدان اوزاقلاشماق، یالنیز اویه‌نین اؤلومو ایله سونلانار.
۳.۷. قورتولوش اویه‌لرینین یؤنتیم اورقانلارینا یوکسلمه شانسی ائشیتدیر. بوتون اویه‌لر ائشیت شرطلرده ایشلرین گئدیشاتیندا ایشتیراک ائدر، تکلیف و شیکایت وئرمه حاقینی قوللانار. یؤنتیم قورولونا بیر باشا عریضه ایله مراجعت ائدر، قورومون ایش پلانلاری ایله باغلی ایستکلرده بولونار.
۳.۸. قورتولوش، گرکن یئرده اویه‌دن آکتیو اولماسینی ایستر. قورومون چالیشمالاریندا، کوتله وی آکتلاردا، توپلانتیلاریندا آکتیولیک ائتمک، قوروما، سوروملولارا باغلی قالماق عضوونون اؤنملی گؤروه لریندن ساییلیر. یؤنتیم ایزنی اولمادان، عضوونون قوروم آدینا رسمی یئرلرده چیخیش ائتمه‌سی دوغرو دئیلدیر.
۳.۹. اولوسال اخلاق، آزربایجان میللی حرکاتینین آنلامی‌دیر. آزربایجان میللی حرکاتینین بؤیوک چاتیسی آلتیندا آنلام داشییان میللی اخلاق، قورتولوشون دا، ان اؤنملی ایلکه‌سی ساییلیر. بونا گؤره، قوروم اویه لرینین میللی اخلاق سینیری قورتولوشدا تانیملانان جیزگیلری آشمامالیدیر.
۴. قورتولوشون قورولتایی
۴.۱. قورولتای، قورتولوشون یوکسک اورقانیدیر. نورمال شرطلر ایچینده ایکی ایللیک، باسقیلی زامانلاردا ایسه اولان اوستو قورولتای و یا یئتکیلی دوزئیلی توپلانتی قورومون اوست اورقانی ساییلیر.
۴.۲. قورولتای مانداتلی اویه‌لرین ایشتیراکی ایله کئچیریلیر. یاشادیغی یئردن آسیلی اولمایاراق سئچیلمیش اویه قورولتایدا ایشتیراک ائتمه حاقینی قازانیر.
۴.۳. ایلکه‌لر، اولکولر، دؤولت‌چیلیک پروقرامی، دوزوک، سیمگه‌لر، آنا بلگه‌لر قورولتایدا قبول اولونور. قورولتای، قورتولوشون یؤنتیم قورولونو سئچیر، قورومون اورقانلارینی اولوشدورور، گؤرئو وئریر و یئتکیلی شخصلردن حسابات ایسته یر.
۴.۴. ایکی قورولتای آراسی قورتولوشون یؤنتیلمه‌سینین سوروملوسو قورولتایدا سئچیلن یؤنتیم قورولودور.
۴.۵. اولان اوستو قورولتایلارین کئچیریلمه‌سی اوچ دورومدا گرچکلشیر: آ) باشقانین ایسته گی و یؤنتیم قورولونین %۵۱ اونایی ایله، ب) ساده جه یؤنتیم قورولونون %۷۵ ایسته گیله، ج) مانداتلی عضوولرین %۵۱-سس چوخونلوغو ایله.
۴.۶. دؤوره آراسی یؤنتیم قورولونون گره کجه‌سیله ایشه آلینان اویه‌لرین رسملشمه‌سی ایلک قورولتایین اونایی ایله تاماملانیر.
۴.۷. قورتولوشون قاپادیلماسی، قورولتایین %۷۵ سس چوخونلوغو ایله گرچکلشیر.
۴.۸. قاپانیش قورولتایینین و رسمی پروسئدورونون کئچیریلمه‌سی اوچون ۳ نفرلیک «وکالت قورومو» قورولور
.
۵. قورتولوشون یؤنتیم قورولو
۵.۱. یؤنتیم قورولو (ی ق)، قورولتایدا سئچیلیر و ایکی قورولتای آراسی قورتولوشون پروقیرامی و دوزویو قارشیسیندا سوروملولوق داشیییر.
۵.۲. ی ق قورتولوشون گون‌ده‌میله باغلی گرکلی بؤلوملر یارادیر. یارادیلان بؤلوملرین تصدیقینی نؤوبتی قورولتایا سونور.
۵.۳. ی ق ان آزیندان آیدا ایکی اوتوروم یاپیر. قورومون توپلانتی سیستمی جانلی و یا اینترنت آراجیلیغی ایله گرچکلنیر.
۵.۴. ی ق توپلانتیلاری ساده سس چوخلوغو ایله رسمیلشیر.
۵.۵. ی ق خظالی اویه‌نین موذاکیره‌سینی و یا عضولویونون دوندورولماسینی ساده سس چوخلوغو ایله ماسایا اوتوردور. آنجاق خطالی اویه‌نین قورومدان کسین اوزاقلاشدیریلماسی قورولتایین اونایینا باغلیدیر.
۶. قورتولوشون بؤلگه سل تشکیلاتلاری
۶.۱. گاقپ، گوجو چاتان هرهانسی بؤلگه، اؤلکه و شهرده اؤز بؤلوملرینی یارادا بیلر. بو بؤلوملر میللی، سیاسی، کولتورل و گرکن چئشیدلی فورمالاردا فعالیت گؤستره بیلر.
۶.۲. اؤلکه‌دن اؤلکه‌یه دییشه‌ن چئشیدلی بؤلوملر «بؤلگه بؤلومو» آدییلا یارانیر. بؤلمه باشچی‌سی ایسه «بؤلگه باشقانی» عنوانی ایله سسلنیر. اؤرنک: آلمانیا بؤلگه باشقانی.
۶.۳. بؤلگه باشقانی، قورتولوش تشکیلات بؤلومو آراجیلیغیلا ی ق-یه باغلانیر. تشکیلات بؤلومو سوروملوسونون ایستگی و ی ق اونایی ایله قورتولوشون یؤنتیم قورولونا سئچیلیر.
۶.۴. «بؤلگه بؤلومو» قورتولوشون دوزویونه صادق قالاراق، اؤزوملو و بؤلگه‌یه اویغون دوزه‌نلنیر.
۶.۵. «بؤلگه بؤلومو» توپلانتی‌سی آیدا ان آزیندان بیر کره اولماق اوزره کئچیریلیر.
۶.۶. بؤلگه بؤلوملرینین توپلانتیلاری ان آزیندان هر اوچ آیدا بیر کره جانلی کئچیریلیر. جانلی توپلانتیلاردا تشکیلات سوروملوسو ایله یانی-سیرا گاقپ باشقانی دا قاتیلیر.
۶.۷. گاقپ-نین آزربایجان و تورکیه جومهوریتلریند‌کی بؤلوملرینین اولوشومو ۶.جی مادده‌دن اؤزگوندور.
.آ.۶. گاقپ-نین آزربایجان و تورکیه جومهوریتلریند‌کی تشکیلات بؤلوملری.
۱.آ.۶. گاقپ-نین آزربایجان و تورکیه بؤلوملری یئرل دوروما اویغون قورولور، باشقانلیق کاتیبلیگی ایله گاقپ باشقانینا باغلانیر
۲.آ.۶. آزربایجان و تورکیه دؤولت وارلیغی تورک دونیاسی کیمی گاقپ-نین ده قیرمیزی جیزگیسی‌دیر. گاقپ-نین آزربایجان و تورکیه بؤلمه‌لری بو اؤزللیگین دیشانا چیخمامالیدیر.
۳.آ.۶. آزربایجان و تورکیه دؤولتلرینین ایچ و دیش سیاستی گاقپ-نین باغیمسیزلیغینی اؤز ائتکیسی آلتینا آلمامالیدیر.
۴.آ.۶. گاقپ-نین آزربایجان و تورکیه بؤلوملری ایکی جومهوریتیمیزین اقتداری و مخالیفتی ایله عین دوستلوق، قارداشلیق و امکداشلیق ایچینده سیاست یورودور.
۵.آ.۶. گاقپ-نین آزربایجان و تورکیه بؤلوملرینین باشلیجا فعالیتی مئدیا و مطبوعات اوزره یوغونلاشمالیدیر.
۶.آ.۶. بؤلوملر، قورتولوشون مالیه قایناقلاریندان یارارلانیر، باشقانلیق کاتیبلیگی ایله یؤنتیم قورولو و قورولتایا حسابات وئریر.
۷.آ.۶. آزربایجان و تورکیه بؤلوملری، گاقپ تشکیلات بؤلوموندن باغیمسیز اولدوغو حالدا، همین بؤلومله سورکلی کوردیناسیادا اولور.
۸.آ.۶. آزربایجان و تورکیه بؤلوملرینین سوروملوسو، آزربایجان بؤلوم باشقانی و تورکیه بؤلوم باشقانی آدلانیر.
۷. قورتولوشون گونئی اوزره اینسان حاقلاری بؤلومو.
۷.۱. گونئی آزربایجاندا گرگین میللی آزادلیق ساواشی گئدیر. سؤزسوز کی، آزربایجانین قورتولوشو اوغرونا جانیندان، مالیندان و بوتون یاشام وارلیغیندان کئچه‌ن میللی قهر‌مانلاریمیز آز دئیل. قورتولوشون ان اؤنملی گؤروی بو ایگیدلرین حاقلی سسینی دونیایا چاتدیرماقدیر.
۷.۲. آزربایجانین میللی قورتولوشو اوغروندا فارسچی رئژیمین باسقیلارینا اوغرامیش بوتون ایگیدلریمیزین دونیا گؤروشوندن، قوروم و ایدئولوژیک باغلانتیسیندان آسیلی اولمایاراق فردی و عایلوی احتیاجلاری تامین اولونمالیدیر. بو حاقدا قورتولوشون گونئی اوزره اینسان حاقلاری بؤلومو وار اولان اولوسال و کوره سل قایناقلاردان مالی ایمکانلار آختارمالی و آزربایجان میللی حرکاتی (آمح) احتیاجلارینا یؤنلتمه‌لیدیر.
۷.۳. فاشیست رئژیم، بیر چوخ حاللاردا میللی فعاللارین کؤرپه اوشاقلارینی، عائله وارلیغینی، ایش یئرلرینی و سوسیال حاقلارینی وحشی هدفینه معروض قویور. بو ایش رئژیمین آلیشدیغی آنتی بشری ذهنیتین اورونودور. سؤزسوز کی، قورتولوشون بو قونولاری دا اله آلماسی گرکیر.
۷.۴. آزربایجان میللی حرکاتی (آمح) گون کئچدیکجه فارسچی رئژیمین قورخولو یوخوسو اولور. بو اوزدن رئژیمین آمح-یه قارشی اولان وحشی‌لیگی داها دا آقرئسیولشیر. قورتولوش، رئژیمین آقرئسیولشن وحشیلیگینه اوغرامیش آمح-یه باغلی عائله‌لره یاردیم ائتمک اوچون بوتون ایمکانلارینی ایشه سالمالیدیر.
۷.۵. گونئی اوزره اینسان حاقلاری بؤلومو ایله قادین، اوشاق و عائله حاقلاری بؤلمه‌لری آراسیندا بوتون آلانلاردا یاخین ایلیشکیلر اولمالیدیر. بو ایکی بؤلومون ایشبیرلیگی بیر چوخ حاللاردا قورتولوشون تمل اولوسال ایدئولوژیسی ایله اوست-اوسته دوشمگه بیلر. بئله کی، بو ایکی بؤلوم گئنیش اولاراق چوخ آلانلی اینسان و قادین حاقلاری اؤرگوتلریله ایلیشکیده اولابیلر، ایشبیرلیکلری قورا بیلر. سؤزسوز کی، بو قونولاردا یؤنتیم قورولونون (ی ق) توصیه‌لری دقته آلینمالیدیر.
۷.۶. بو بؤلوم، میللی قورتولوشون گنل بودجه‌سیندن مالیله شیر، چالیشما راپورو یؤنتیم قورولونا و ی ق آراجیلیغی ایله قورولتایا تسلیم ائدیلیر.
۸. قورتولوشون قادین، اوشاق و عائله حاقلاری بؤلومو
۸.۱. قادین اینسانلیغین آناسی‌دیر. قادینا هر تورلو باسقی اینسانلیغا قارشی جینایت ساییلیر. چاغداش دونیادا بوتون گرچک دئموکراتیک قانونلارین کؤکونده قادین-ارکک ائشیدلیگی دایانماقدادیر. فوندامنتالیست فارسچی رئژیمین قادینا قارشی چاغدیشی وحشی باخیشی فارس اولمایان قادینلار اوچون نئچه قات جهنمدیر. قورتولوشون قادین دوشمنی اولان رئژیمه قارشی آپاردیغی موجادیله عین زاماندا قادین حاقلارینین قورونماسی اوغروندا بیر سوسیال ساواشدیر.
۸.۲. قورتولوش، بئله حساب ائدیر کی، آزربایجانین میللی قورتولوش ساواشی تورک قادینی اوچون عین زاماندا اؤزگورلوک، ائشیدلیک و اینسانلیق آلانیدیر. بو اوزدن، آمح-ده تورک قادینلارینین یئری نه بیر آددیم گئری، نه بیر آددیم ایره‌لی، ارککلرله اوموز-اوموزا اولمالیدیر.
۸.۳. قورتولوش، قادین، اوشاق و عائله حاقلارینی میللی موجادیله‌نین ان ایلکین پرینسیپلریندن حساب ائدیر. بو، او دئمکدیر کی، بوتون اینسانجیل ساواشلارین کوتله هدفینده قادین، اوشاق و عائله حاقلارینین ساوونماسی دایانیر.
۸.۴. قورتولوشون قادین، اوشاق و عائله حاقلاری بؤلومو محض بو ادعالارا دایاناراق قادین ائشیدلیگینی اؤز سیاسی یولو سئچن چئشیدلی قوروم-قورولوشلارلا گؤروشلر کئچیرمه‌لی، اورتاق ایشلر گؤرمه‌لیدیر.
۸.۵. بو بؤلوم، گونئی‌ده گئدن میللی موجادیله‌نین توتوقلو قادینلارینین دونیا اوزره هایقیران سسی اولمالیدیر. بو قونولاردا گونئی اوزره اینسان حاقلاری بؤلومو ایله، قادین، اوشاق و عائله حاقلارینی بؤلومو آراسیندا سیخ ایشبیرلیگی گرکیر.
۸.۶. بو بؤلوم، قورتولوشون گنل بودجه‌سیندن مالیلشیر، ایشلرینین حساباتینی یؤنتیم قورولونا و ی ق آراجیلیغی ایله قورولتایا راپور وئریر.
۹. قورتولوشون تشکیلات بؤلومو
۹.۱. قورتولوشون تشکیلات بؤلومو، قورومون چالیشما متودونو سئچیر، اونو یؤنلدیر. بو آلاندا گرکلی یؤنته‌ملر اویغولور. ان اویغون یؤنتیم فورماسینی ساغلاییر.
۹.۲. قورتولوشدا اویه‌لیک سیاستینی اوسته‌لنیر. بو یؤنده یئنی اویه‌لرین ساغلاملیغینی آراشدیریر. یئنی اویه‌لرین سوروم آلماسینی و هانسی بؤلومه اویغون اولماسینی آراشدیریر.
۹.۳. قورتولوشون کونفرانسلاری، توپلانتیلاری و گرکن ائیله‌ملرینین کئچیریلمه‌سینی اوسته‌لنیر. بو گؤرولری دوزگون یئرینه یئتیرمک اوچون بؤلوم ایچی ایشچی قوروملار یارادیر.
۹.۴. قورتولوشون گنل بودجه‌سیندن مالیلشیر. یاپدیغی بوتون ایشلرین حساباتینی ی ق و اونون آراجیلیغییلا قورولتایا راپور ائدیر.
۹.۵. قورتولوشون بؤلگه، اؤلکه، شهر و بوتون تشکیلاتچیلیق ایستراتئگیاسینی (قوزئی آزربایجان، گونئی آزربایجان و تورکیه جومهوریتلری دیشیندا) اولوشدورور.
۹.۶. آزربایجان و تورکیه جومهوریتلرینین بؤلوملری اؤزل شرطلره باغلی اولدوغو اوچون بیر باشا گاقپ باشقانلیک کاتیبلیگینه حسابات وئریر و ایستراتئگیا بلیرله ییر.
۹.۷. قورتولوشون ایچ دوزه‌نینی اله آلماق اوچون قوروم بؤلمه‌لرینین ایچ دوزوگونو طلب و تصدیق ائدیر.
۱۰. قورتولوشون یاییم و ایلتیشیم بؤلومو
۱۰.۱. قورتولوشون اینترنت، تبلیغات، ایلتیشیم و یاییم ایشلرینی اوسته‌لنیر. بؤلومون گئنیش آلانلی اولدوغو اوچون اؤزگون قوللار یارادیر.
۱۰.۲. بؤلوم ایچی قوللارین ائشید، اؤزگون و بیر-بیریله اویغون چالیشماسی اولدوقجا گرکلیدیر. هر گون یئنی بویودلار آلاراق، گئنیشلنن سانال دونیا کاللئکتیو چالیشمالار طلب ائدیر.
۱۰.۳. بؤلوم ایچره چالیشمالارین تهلوکسیزلیگینی گؤز اؤنونه آلاراق، ساوونما قروپو یارادیر.
۱۰.۴. قورتولوش، آدینا لوببی و دیاسپورا چالیشمالاریندا بولونور. بو یؤنده اؤلکه‌میزین گرچکلرینی اولوسلاراراسی اینسان حاقلاری اورقانلارینا اؤتورور.
۱۰.۵. قورتولوشون میللی ایستراتئژی پلانلارینی ائورنسل آلاندا یایماق آماجی ایله تئله-رادیو و چئشیدلی اینتئرنت آلانلاری یارادیر.
۱۰.۶. قورتولوشون گنل مالی قایناقلاریندان یارارلانیر. یؤنتیم قورولو و ی ق آراجیلیغی ایله قورولتای قارشیسیندا سوروملولوق داشیر.
۱۱. قورتولوشون اینفورماتیک و آراشدیرمالار بؤلومو
۱۱.۱. بو بؤلوم، قورتولوشون بیلیمسل و ایستراتئژیک آراشدیرمالارینی اوسته‌لنیر. بو باغلامدا بؤلوم ایچی ایشچی قوروپلار یارادیر.
۱۱.۲. تورک دونیاسی و آزربایجانین اولوسال کیملیگینی، تاریخینی، دیلینی، گونده‌مینی آراشدیریر.
۱۱.۳. قورومون گله‌جک پلانلارینی و میللی-سیاسی یؤنلرینی آراشدیریر، اؤلکه، بؤلگه و کورسل گلیشمه‌لری آن-با-آن اینجه لیر.
۱۱.۴. اولوسوموزون آیدین یاشامینی قارانتی آلتینا آلاجاق دؤولت پروقراملاری اوزرینده چالیشمالار آپاریر. بو قونولار اوزره بیلگیله‌ندیرمه و تبلیغات اوزره بولتن لر یاییر.
۱۱.۵. باشقا قارداش تشکیلاتلار ایله اورتاق ایش پلانلاری ایره‌لی سورور و بو حاقدا گرکه‌ن گؤروشلرین نئجه لیگینی ساغلاییر.
۱۱.۶. قورتولوشون گنل مالی قایناقلاریندان یارارلانیر. یؤنتیم قورولو و ی ق آراجیلیغی ایله قورولتای قارشیسیندا سوروملولوق داشیر.
۱۲. قورتولوشون فینانس و ائکونومی بؤلومو
۱۲.۱. قورتولوشون آماجلاری، گؤروشلری و ائیله‌ملرینین فینانس ائدیلمه‌سی قورومون فینانس و ائکونومی بؤلومونون گؤرویدیر.
۱۲.۲. قورتولوشون ایلک مالی قایناغی اولان اویه‌لیک حاقینین توپلانماسی و فینانس ائدیلمه‌سی بو بؤلومون اوزه رینده‌دیر.
۱۲.۳. فینانس و ائکونومی گلیر قایناقلارینین آراشدیریلماسی، فوند ایشلریله یاخیندان ایلیشکیده اولماسی بؤلومون ان اؤنملی گؤروی ساییلیر.
۱۲.۴. قورتولوشون گنل مالی قایناقلاریندان یارارلانیر. یؤنتیم قورولو و ی ق آراجیلیغی ایله قورولتای قارشیسیندا سوروملولوق داشیر.
۱۳. قورتولوشون دیل، کولتور، تاریخ و توپلوم بؤلومو
۱۳.۱. هاردا یاشاماسیندان آسیلی اولمایاراق اولوسوموزون بیر آد آلتیندا توپارلانماسینین ان اؤنملی اؤزولداشی دیل و کولتوردور.
۱۳.۲. دیل، کولتور و تاریخ ایشیغیندا آیدینلاشان بیر توپلومون وارلیغی تؤکنمزدیر!
۱۳.۳. قورتولوشون ان گرکه‌ن ایشلریندن ساییلان دیل، کولتور، تاریخ و توپلوم بؤلومو پانفارسیزمین میللی اریتمه ایستراتئژینین چوروتولمه‌سی اوچون ان کسکین گؤره اوسته‌لنیر.
۱۳.۴. ایران آدلانان یئرده و دیشاریدا گئنیش آلاندا چئشیدلی درنکلرین یارانماسی اولوسال آماجیمیزا یؤنتم وئره‌جک ان دوغرو یول‌دور. بو قونودا دیل، کولتور، تاریخ و توپلومو بؤلومونون ان بؤیوک ایشلریندن بیری بو درنکلرله سورکلی ایلیشکی قورماسیدیر.
۱۳.۵. بؤلوم، قورتولوش طرفیندن مالیلشیر، یؤنتیم قورولو و ی ق آراجیلیغی ایله قورولتایا حسابات وئریر.
۱۴. قورتولوشون سیاسی بؤلومو
۱۴.۱. سیاسی بؤلوم، قورتولوشون گونده‌م گوزگوسودور. بو بؤلوم، قورتولوشون گونده‌مینین حیاتا کئچیرمه‌سینی اوسته‌لنیر.
۱۴.۲. قورتولوشون باشقا بؤلوملرینین سیاسال گونده‌مینین دینامیکاسینی اولوشدورور.
۱۴.۳. قورتولوشون سیاسی بؤلومونون باشقا اؤنملی گؤروی گونئیین میللی-سیاسی گونده‌مینی دونیادا عکس ائتدیرمکدیر.
۱۴.۴. قورتولوشون سیاسی بؤلومونون یؤنتملری ایله باغلی چئشیدلی قوللار یارانیر. آنجاق، یارانان قوللارین ی ق اونایی ایله اولماسی گرکیر.
۱۴.۵. باشقا بؤلوملر کیمی، سیاسی بؤلوم ده ی ق آراجیلیغییلا قورولتای قارشیسیندا سوروملولوق داشیر.
۱۴.۶. قورتولوشون پولیتیک سوروملوسو اولان بو بؤلومون باشچی‌سی اؤزل دوروملاردا گاقپ باشقانینین سیاسی وکیلی کیمی گؤرو داشییر.
۱۴.۷. بؤلوم، قورتولوش طرفیندن مالیلشیر، یؤنتیم قورولو و ی ق آراجیلیغی ایله قورولتایا حسابات وئریر.
۱۵. قورتولوشون اولوسلاراراسی ایلیشکیلر بؤلومو
۱۵.۱. قورتولوشون اولوسلاراراسی ایلیشکیلر بؤلومو، پارتیاسین ائورنسل ایلیشکیلرینی اوسته‌لنیر. بو بؤلوم، قورتولوشون کورسل گئنیشله‌نمه‌سی اوچون پروقراملار سونور، سوروملولوق داشیر.
۱۵.۲. قورتو لوش باشقانینین هر هانسی ندنله اولوسلاراراسی ایلیشکیلرده اولماماسی دورومدا، اولوسلاراراسی ایلیشکیلر بؤلومو باشچی‌سی باشقان وکیلی گؤروینی داشیر.
۱۵.۳. قورتولوش باشقانینین ایستگی و یؤنتیم قورولونون اونایی ایله اولوسلاراراسی ایلیشکیلر باشچی‌سی تک باشینا و یا سئچیلن هئیتله بیرلیکده اولوسلاراراسی گؤروشلرده گاقپ-نی تمثیل ائدیر.
۱۵.۴. داها گئنیش ایشله‌م اوچون بؤلوم ایچی ایشچی قوروملار یارادیر. یؤنتیم قورولونون اونایی ایله بؤلوم ایچی گؤرولیلر سئچیر.
۱۵.۵. بؤلوم، قورتولوش طرفیندن مالیلشیر، یؤنتیم قورولو و ی ق آراجیلیغی ایله قورولتایا حسابات وئریر.
۱۶. قورتولوشون گنجلیک و ایسپورت بؤلومو
۱۶.۱. شوبهه‌سیز کی، گنجلیک و ایسپورت توپلوملار ایچیندن بیر-بیریندن آیریلمایان اوبیئکتیو و سوبیئکتیو بوتونلوکدور.
۱۶.۲. ایسپور بوتون آلانلارییلا بیر توپلومون شنلیگینین، ساغلاملیغینین، دایانیشماسینین، یوکسلیشینین و تک آنلامییلا میللی و ائورنسل تابلوسونون گؤرونتوسودور.
۱۶.۳. فارسچی شعوبی رئژیمین گنجلیگه قارشی ان ییخیجی سلاحلاریندان بیری اویوشدوروجو مادده‌دیر. رئژیم، اولدوقجا بو سلاح اوزرینده چالیشقاندیر. قورتولوشون ان اؤنملی ایشلریندن بیری آزربایجان تورک گنجلیگینی رئژیمین بو دوزاغیندان اوزاق توتماسیدیر. بو باغلامدا «ایسپورتا آلقیش، باغیملیغا قارقیش» سلوقانی ایسپورت آلانلاریندا سسلنیلمه‌لی، یازیلمالیدیر.
۱۶.۴. قورتولوشون گنجلیک و ایسپورت بؤلومو، آزربایجانین گونئینده گئدن بوتون ایسپورت داللاریندا حاضر اولمالی و میللی ائتکی یاراتمالی‌دیر.
۱۶.۵. فارسچی رئژیمین آزربایجانا قارشی گئنیش آلانلی سیاسال، ائکومومی و توپلومسال آیری-سئچکی‌لیک ایستراتئژیسینه باخمایاراق، تورک گنجی بؤیوک اؤلچوده ایران اسلام رژیمینین ییخیچی و اؤلومجول سیستمی قارشیسیندا ساغلام وارلیغینی سورمکده‌دیر. فارس سیستمی، بوتون گوجو ایله ساغلام یاشامی آزربایجان توپلوموندان چالماغا چالیشیر. بؤلوم بو آلاندا چوخ دقتلی اولمالیدیر.
۱۶.۶. هر تورکون اورگینده اومود چیراغی اولان «تراختور فوتبول تاکیمی»نین میلیونلوق سیرالاریندا گاقپ-یه اویه و یا سمپاتیک باغلانتی‌سی اولان گنجلیگیمیزین فعال اولماسی میللی ساواش آنلامی داشییر.
۱۶.۷. قورتولوشون گنجلیک و ایدمان بؤلومو، بوتون بؤلوملر کیمی قورتولوشون طرفیندن مالیلشیر، فعالیت راپورونو ی ق -یه وئریر و ی ق آراجیلیغی ایله قورولتایا سونور.
۱۷. قورتولوشون تهلوکه‌سیزلیک اوزره اؤز ل بلؤلومو
۱۷.۱. قورتولوشون گوندن-گونه بؤیومه‌سی باشلیجا آماج ساییلیر. بو قاپسامدا بؤیومکله بیرلیکده گووه‌نلیک قونوسو دا اولدوقجا اؤنم داشییر.
۱۷.۲. سؤزسوز کی، اولوسلاراراسی سانال دونیادا تهلوکه‌دن اوزاق قالماق چتین ایشدیر. بو باغلامدا گاقپ-نین ساغلام قالماسی، اؤزللیکله فارسچی رئژیمین تهلوکه‌سیندن اوزاق توتولماسی اوچون سورکلی ایزله ییش و آختاریش گرکیر.
۱۷.۳. تیتیز داورانیش، تهلوکه‌لی نقطه‌لری کور ائتمک بو بؤلومون هر آن حرکتده اولماسینی طلب ائدیر.
۱۷.۴. قورتولوشون تهلوکه‌سیزلیک اوزره اؤزل بلؤلومو، هر هانسی یالنیش گئدیشاتی گاقپ باشقانیلا پایلاشیر. باشقان ایسه همین راپورو اینجه‌له‌مک اوچون گرکن ایشله‌ملری ایر‌لی سورور.
۱۷.۵. بؤلوم، قورتولوشون گنل بودجه‌سیندن یارارلانیر. اؤزل راپورونو باشقانا سونور.
۱۸. گونئی آزربایجان قورتولوش پارتیاسینین سؤزچوسو
۱۸.۱. گونئی آزربایجان قورتولوش پارتیاسی سؤزچوسو، باشقان طرفیندن اؤنه ریلیر و ی ق-ده اونایلاناندان سونرا گؤروه باشلاییر.
۱۸.۲. قورتولوشون سؤزچوسو، ی ق نین ایشلرینی یاخیندان ایزله ییر، پارتیانین رسمی باخیشلارینی دوغرو بیچیمده دونیا مئدیاسینا اؤتورور.
۱۸.۳. قورتولوشون مئدیا ایشلرینده یاخیندان امکداشلیق ائدیر، همین مرکزدن قورومون رسمی بیلگیلرینی یاییملاییر.
۱۸.۴. باشقانین ایسته گی و ی ق- اونایی ایله توپلانتیلاردا، گؤروشلرده گاقپ-نی تمثیل ائدیر.
۱۸.۵. قورتولوشون باشقانینین ایسته گی اوزره، اونونلا بیرلیکده رسمی گؤروشلرده ایشتیراک ائدیر، گرکن بیلگیلر پایلاشیر.
۱۸.۶. گونئی آزربایجان قورتولوش پاتیاسی سؤزچوسونون مالی احتیاجلاری قورومون بودجه‌سیندن تامین ائدیلیر.
۱۸.۷. گونئی آزربایجان قورتولوش پارتیاسی سؤزچوسو، باشقانین ایسته گی، ی ق-نین اونایی ایله ایکی قورولتای آراسی سوزچو سئچیلیر.
۱۹. گونئی آزربایجان قورتولوش پارتیاسینین معاوینلری، مشاویرلری و کاتیبلیگی
۱۹.۱. باشقان، یؤنتیم قورولو ترکیبیندن اؤزونه یاردیمچیلار، معاوینلر، مشاویرلر سئچیر، کاتیبلیک قورور.
۱۹.۲. باشقان، آتانان گؤرولر اوچون ی ق-یه باش ورور. ی ق-نین ساده سس چوخونلوغو ایله معاوینلرینی و مشاویرلرینی گؤرولندیریر.
۱۹.۳. باشقانین اولمادیغی اؤزل دوروملاردا، ۱- جی معاوین قورولتایادک اونون ایشلرینی ایر‌لی سورور و گاقپ-یه رهبرلیک ائدیر.
۱۹.۴. باشقان، بوتون دوروملاردا اؤز معاوینلری و مشاویرلریله کووردیناسیا توپلانتیلاری قورور، توپلانتیلارین سونوجونو ی ق-یه راپور ائدیر.
۱۹.۵. باشقان، چئویک حرکت یاراتماق اوچون گاقپ-نین باشکانلیق کاتیبلیگینی یارادیر. اونون ایشلرینه نظارت ائدیر.
۲۰. گونئی آزربایجان قورتولوش پارتیاسینین باشقانی
۲۰.۱. قورتولوشون اولوسال چیخارلارینین گنل تمثیلچی‌سی، باش دانیشمانی باشقاندیر.
۲۰.۲. قورتولوشون آدیندان توپلانتیلارا، ائیله‌ملره، گؤستریلره و چئشیدلی ائتکینلیکلره قاتیلیر.
۲۰.۳. قورتولوشون توپلانتیلارینی یؤنلندیریر. بؤلمه‌لرین چالیشماسینی یاخیندان ایزله ییر. قوروم ایچره گرکلی دییشیکلیکلرین موذاکیره‌سینی آچیر.
۲۰.۴. گاقپ-نین داها ائفکتیو اولماسی اوچون اؤزونه یاردیمچیلار، مشاویرلر سئچیر، کاتیبلیک یارادیر و اونای اوچون ی ق-یه سونور.
۲۰.۵. قورتولوشون آیاقلانماسی یولوندا حقیقی و حقوقی شخصلرله ایلگیه کئچیر و ایلگیلی قوروملارلا ایشگزار گؤروشلر کئچیریر.
۲۰.۶. گاقپ باشقانی، قورولتایدا سئچیلیر. ایکی قورولتای آراسی قورومون گنل باشقانی اولاراق سوروملولوق داشیر.
۲۰.۷. یؤنتیم قورولوندا اولان چاتیشمازلیقلارین قایناغینی آرادان قالدیرماق اوچون اولان اوستو قورولتای چاغیریر.
۲۰.۸. خطالی گؤردویو ی ق اویه‌سینین ایشدن آلینماسی و یا قورولتایا قدر گؤرویندن اوزاقلاشدیریلماسینی ی ق-یه بیلدیریر.
۲۰.۹. باشقان، گاقپ-نین قورولتاینی آچیر. قورتولوشون ایکی قورولتای آراسی گنل راپورونو سونور، سورولاری یانیتلاییر. یئنی یؤنتیم قورولو سئچکی‌سی اوچون وار اولان ی ق-نین ایشده‌ن آزاد اولماسینی ایسته ییر. قورولتایین سورمه‌سینی قورولتایدا سئچیلن قورولتای دیوانینا تاپشیریر.
۲۰.۱۰. باشقانین یؤنتیم قورولو دیشیندا گیزلی ایش یؤنتمه‌سی کسینلیکله اولومسوز سونوجلارا یول آچابیلر. بئله اولان حالدا، ی ق-نین ¾ اوی چوخونلوغو ایله باشقانین سوروشدورماسی باشلاییر. سونوج اولومسوز اولورسا، ساده سس چوخلوغو ایله باشقان گؤروینی گلن قورولتایا قدر باشقانین ۱-جی معاوینینه تاپشیریلیر.
۲۰.۱۱. هر هانسی ندنله، ایکی قورولتای آراسی باشقان گؤروی بوش قالارسا، باشقانین ۱-جی معاوینی (یاردیمچی‌سی) باشقان وکیلی حؤکمو ایله کئچیجی اولاراق گاقپ-یه لیدئرلیک ائدیر. بو گؤرو، ی ق-نین ساده سس چوخونلوغو ایله نؤوبتی قورولتایا قدر رسمیلشیر.
۲۱. قورتولوشون قاپانماسی
۲۱.۱. قورولتایین ¾ سس چوخونلوغو ایله قورتولوش، اؤز ایشینه سون وئریر.
۲۱.۲. قورتولوشون سونلانما سورجی قورولتایدا سئچیلن ۳ نفرلیک قاپاتما قروپونا تاپیشیریلیر.
۲۱.۳. قورتولوشون داشینار-داشینماز وارلیقلارینین حلی قاپاتما قورومونون اینسیاتیوینه وئریلیر.
۲۱.۴. قورتولوشون رسمی لغویندن سونرا کیمسه اونون قاپادیلماسی اوزوندن سوچلو و یا سوروملو توتولمور.
۲۱.۵. قورتولوشون قاپانیشیندان سونرا، یئنیدن جانلانماسی تعقیبسیز، مانعسیز و اولوملو ساییلیر. هر هانسی اسکی یؤنتیم قورولو عضوونون بو قاپسامدا اعتراض ائتمه‌یه حاقی یوخدور.
«گونئی آزربایجان ایستیقلالی»، «بوتؤو آزربایجان دؤولتچی‌لیگی»، «توران ائوی» یولوندا ایره‌لی!
گونئی آزربایجان قورتولوش پارتیاسی-یؤنتیم قورولو
ایلک اونای ۲۰۲۲/۱۰/۰۱
سون رئداکته اونایی ۲۰۲۵/۰۳/۳۱
