اسرائیل ایله ایران ایسلام رئژیمینین ۱۲ گونلوک ساواشیندان سونرا، خوصوصیله ده سون گونلرده ایستر ایران ایسلام رئژیمینین گوج مرکزلَرینی احاطه‌‌سینه آلمیش، ایسترسه ده اؤزونو رئژیم موخالیفتی آدلاندیران فارس ایرقچیلارینین آزربایجانا قارشی مئدیا و سیاسی هوجوملاری حداکثر (ماکسیموم) حدّه چاتمیش و بیرمعنالی حال آلمیشدیر.
آزربایجان جمهوریتینین پرئزیدئنتی جناب ایلهام علییئو و دیگر دؤولت رسمیلری بیر چوخ دفعه آچیق شکیلده بو اتهاملاری رد ائدَرک آزربایجان اراضیسی و هاواسیندان ایرانا قارشی هئچ بیر تهدید اولمادیغی آچیقلامالارینا باخمایاراق، هر گون فارس یؤنلو مئدیادا آزربایجان جومهورییتینه قارشی اساسسیز و یالان ادعالارین سسلَندیریلمیه داوام ائتمکده’دیر.
عینی شکیلده گونئی آزربایجانین میلّی حرکاتینین تشکیلاتلاری و مئدیالاری دفعه‌لرله وورغولاییبلار کی، گونئی آزربایجان و ایرانین موختلیف بؤلگه’لرینده یاشایان تورک میللتی بو ساواشین بیر طرفی دئییل و بو ساواش ایران ایسلام رئژیمی طرفیندن میللتیمیزه تحمیل ائدیلیب. نئجه کی بو ساواشین چیخماسینین اساس سببکاری دا بوتون بئینالخالق حوقوق پرینسیپلرینه ضید اولاراق بیرلشمیش میللتلر تشکیلاتیندا رسماً تانینمیش بیر دؤولتی یوخ ائتمک ایستین، بوتون دونیایا تررور شبکه‌لری یایان و ایراندا یاشایان بوتون میللتلره ظولم ائدن ایران تئررور رئژیمینین اؤزودور.
آمّا نه یازیق کی، گؤروروک بو رئژیم و عومومیلیکده فارس شووئنیستلری یالنیز قوزئی آزربایجانا دئییل، عینی زاماندا گونئی آزربایجاندا مؤوجود اولان سیاسی قووه‌لَرَده هوجوم ائتمکده و اونلاری سیرادان چیخارماغا چالیشماقدا داوام ائدیرلر. نئجه کی سون گونلرده یئنیدن گونئی آزربایجانلی تورک فعاللار رئژیم قووه‌لری طرفیندن حبس اولونماقدا و رئژیمین ساختا محکمه‌لری طرفیندن آغیر جزالارا محکوم ائدیلمکده’دیرلر.
بوتون بونلار اونو دئمیه اساس وئریر کی، ایرانین هم رئژیم حاکیمیتینده، هم ده موخالیفتینده اولان فارس ایرقچیلاری، آزربایجانی و عومومیلیکده تورک میللتینی بوتؤولوکده اؤزلرینه رقیب حتی دوشمن کیمی گؤرمکده و بو یؤنده داورانماقدادیرلار.
سون ایکی ایلده بوتون مؤوقلرینی بیر-بیر ایتیرن و ۱۲ گونلوک ساواشلا فاکتیکی اولاراق مغلوب اولان ایران ایسلام رئژیمی، آرتیق اسرائیل – آمریکا (آ.ب.د) – اروپا بیرلیغی (آ.ب) اتفاقینا قارشی دورماق گوجونده اولمادیغینی گؤرور و دیگر طرفدن، مُوتفیق سایدیغی اؤلکلردن ده گؤزله‌دیغی دستیغی، آلا بیلمَدیغینه گؤره هر زامان اولدوغو کیمی، یئنه ده گوجو چاتا بیلَجک هدفلر آختاریر.
اگر رئژیم آزربایجانا و تورک میللتینه بو گؤزله باخیرسا، بو اونون حیاتینداکی ان بؤیوک خطا (سهو) اولاجاقدیر. آرتیق بوتون دونیا بیلیر کی، نه قوزئی آزربایجان، نه ده گونئی آزربایجان – ۱۹۹۰-جی ایللرین (۱۳۷۰-جی ایللرین) آزربایجانی دئییلدیر. بو گون دونیادا تامام باشقا بیر آزربایجان تورک میللتی رئاللیغی و البته تورک دونیاسی حقیقتی واردیر.
بیز گونئی آزربایجان تشکیلاتلاری امکداشلیق شوراسینا عضو اولان بوتون قوروملار اولاراق، ایران ایسلام رئژیمینه خبردارلیق ائدیریک کی، ایستر زنگزور دهلیزی، ایسترسه ده ۱۲ گونلوک ساواشلا باغلی اساسسیز ادعالاری بهانه ائدَرک آزربایجان جمهوریتینه قارشی هر هانسی بیر تخریباتا اَل آتارسا، قاراباغ ساواشیندا اولدوغو کیمی، گونئی آزربایجان و ایرانین بوتون تورک اصیللی وطنداشلارینین کسکین عکس العملی ایله (رئاکسییاسی ایله) قارشیلاشاجاقدیر. ائلجه ده مؤوجود دورومدان یارارلاناراق اساسسیز اتهاملارلا گونئی آزربایجانین سیاسی قوه‌لرینی سیرادان چیخارماغا و آزربایجان میلّی حرکاتینا دیوان توتماغا جهد ائدرسه، یئنه کسکین جاوابینی تورک میللتیندن آلاجاقدیر.
*گونئی آزربایجان تشکیلاتلارینین امکداشلیق شوراسی*
۱. آزربایجان دئموکرات فیرقه’سی – آ.د.ف
۲. آزربایجان مرکز پارتیسی – آ.م.پ
۳. آزربایجان میلّی دیرَنیش تشکیلاتی – دیرَنیش
۴. آزربایجان اؤیرنجی حرکاتی – آزوح
۵. گونئی آزربایجان جومهورییت پارتیسی – آ.ج.پ
۶. گونئی آزربایجان دئموکرات پارتیسی – گادپ
۷. گونئی آزربایجان ایستیقلال پارتیسی – گایپ
۸. گونئی آزربایجان میلّی دؤولتچیلیک شوراسی – اِم.د.ش
۹. گونئی آزربایجان قورتولوش پارتیسی – گاقپ
