گونئی آزربایجان تشکیلاتلاریْ امکداشلیْق شوراسیْنیْن فعالیّت پرینسیپلری

گونئی آزربایجان تشکیلاتلاریْ امکداشلیْق شوراسیْنیْن فعالیّت پرینسیپلری

اؤن یازیْ(مقدمه)

اورتا شرقده باش وئرن یئنی ژئوسیاسی-ژئواستراتژی دَییشیکلیکلر، اون ایللردیر ایران جغرافیاسیْندا، ایرتیجاعچیْ، فاشیست، شووینیست، فارس محورلیْ رئژیملر طرفیندن باسدیْریْلان و دونیانیْن گؤرمَزدن گلدیْغیْ میلّی حرکاتلار گئرچَکیْنی، آرتیْق باسدیْریْلا و گؤرمَزدن گلینه بیلمَیَجَک سویّه‌لره چاتدیْغیْنیْن آنلاشیْلماسیْنا گتیریب چیْخارمیْشدیر.

اؤزللیکله بو جغرافیانیْن اَن بؤیوک میلّی قروپو اولان آزربایجان میلّتینین و دیگر تورک توپلوم و توپلولوقلارینین پتانسیلینی آرخاسینا آلان آزربایجان میلّی حرکاتینین، سون اون ایللردکی مُعظّم یوکسَلیشی، دیگر میلّت‌لرین‌ده حرکاتلارینا اؤرنک تشکیل ائتمَسینه وسیله اولموشدور.

بو گون گونئی آزربایجان میلّی حرکاتیْنیْن اورتایا قویدوغو هدفلر و سَسلَندیردیغی دئویز-شعارلار یالنیْز ایراندا یاشایان غیری فارس میلّت‌لره اؤرنک اولماقلا و مترقّی دونیا اجتماعییتینین دقتینی آزربایجان میلّی حرکاتینین هدفلَرینه جلب ائتمکله قالمامیْش، عینی زاماندا، گونئی آزربایجان تشکیلاتلاریْنیْن فعالیّت پرینسیپلَرینین و یول خریطه‌سینین تمل داشلارینا چئوریلمیشدیر. ائله بورادان یولا چیخاراق بیز – شورایا عضو اولان و بو سندی قبول ائدن تشکیلاتلار بَیان ائدیریک کی:

گونئی آزربایجان تشکیلاتلاریْ امکداشلیْق شوراسی اؤز فعالیّتینده میلّی حرکاتیْمیزیْن آمال و ایدئاللارینی، ائلجه ده میلّتیمیزین سارسیلماز ایراده‌سینی سیمبولیزه ائدن “آزادلیق، عدالت، میلّی حؤکومت” شعاری دئویزینی رهبر توتور و بو یوکسک دَیَرلری تمثیل ائدیر.

پرینسیپلر:

۱. میلّی ایدئولوژی و هدف:

گونئی آزربایجان تشکیلاتلاریْ امکداشلیْق شوراسیْ تورک میلّی مفکوره‌سینین تَمَل پرینسیپلرینه و آزربایجانچیْلیْق ایلکسینه سؤیکنیر. گونئی آزربایجانیْن اراضی بوتؤولوغونون توخونولمازلیْغیْنا اینانیر و اوغروندا موباریزه آپاردیغیْ آمال و ایدئاللاریْ تاریخی و میلّی گونئی آزربایجان جغرافیاسیندا گئرچکلشدیرمگی هدفله‌ییر. عینی زاماندا، شورا ایرانین فرقلی بؤلگه‌لرینده یاشایان یتورک توپلوم و توپلولوقلاریْنیْن، او جومله‌دن قاشقای تورکلریْ، گونئی تورکمنیستان، خوراسان تورکلریْ و … موقدّراتینا بیگانه قالمیْر، اونلاریْن حوقوق و آزادلیْقلاریْنی مودافیعه ائدیر.

۲. برابرلیک و وطنداشلیْق پرینسیپی:

 شورا ایْرقیْندان، دیلیندن، دینیندن، جینسیندن، سیاسی و مدنی منصوبییتندن و … آسیْلی اولمایاراق، گونئی آزربایجان اهالیسینی بؤلونمز بیر بوتون اولاراق گؤرور و بو جغرافیادا برابر حوقوقلو وطنداش جمعیّتینین قورولماسیْ اوغروندا موباریزه آپاریْر. شورا گونئی آزربایجاندا یاشایان بوتون آزلیْقلاریْن (میلّی، دینی، مذهبی و …) حوقوقلاریْنیْن مودافیعه‌سی و تأمینی اوغروندا موباریزه آپاریر.

۳. میلّی حاکیمیّتین گئرچکلشدیریلمسی:

شورا اؤز اوزَرینه گؤتوردوغو وظیفه‌لری حیاتا کئچیرمک مقصدیله گونئی آزربایجاندا میلّی حاکیمیّتینین گئرچکلشدیریلمسی اوچون دؤولت قوروجولوغونو ضروری حِساب ائدیر و بو دؤولتین قورولوش فورماسیْنیْن مُعیّنلشدیریلمَسینده یالنیْز گونئی آزربایجان اهالیْسینین ایستک و ایراده‌سینی اساس گؤتورور.

۴. دموکراسی و پلورالیزم:

شورا جمعیّت قوروجولوغوندا دِموکراتیک دَیَرلرین وازکئچیلمز اولدوغونا اینانیر، سیاسی پلورالیزم و فیکیر چئشیدلیلیغینی جمعیّتین عوض‌سیز زنگینلیغی کیمی دَیَرلندیریر. گونئی آزربایجان جغرافیاسیندا حوقوقون اوستونلوغونون تأمین اولوندوغو، چاغداش، سئکولار و دِموکراتیک بیر جمعیّتین قورولماسیْ اوغروندا موباریزه آپاریر.

۵. جئندئر (جینسیّت) برابرلیغی:

شورا قادین و کیشی آراسیندا برابر حوقوقلولوغون گئرچکلشدیریلمسی اوغروندا موباریزه آپاریر، قادین حوقوق و آزادلیقلارینین هر هانسی بیر (مدنی، میلّی، سیاسی، دینی، مذهبی و …) گرکچسی ایله محدودلاشدیریلماسینا قطعی شکیلده قارشی چیخیر.

۶. موباریزه فورمالاری:

شورا زوراکیلیق و تئررورو قطعی شکیلده رد ائدیر، سیویل و مدنی موباریزیه اوستونلوک وئریر. عینی زاماندا، آزربایجان میلّی وارلیغینین و آزربایجان اهالیسینین جان و مال گوونلیغینین و … تهلوکه‌ده اولدوغو ضروری حاللاردا اؤزونو مودافیعه مقصدیله بوتون مشروع (لئگیتیم) واسطه‌لردن ایستیفاده ائتمیی مقبول ساییر.

۷. کئچید دؤورونون ایداره‌سی:

شورانین باشلیجا هدفی گونئی آزربایجان جغرافیاسیندا، یالنیْز میلّی ایراده‌نین حاکم اولدوغو بیر گونئی آزربایجان دؤولتینی قورماقدان عبارتدیر. عینی زاماندا شورا ایران ایسلام جمهوریسی رئژیمیندن کئچید مرحله‌سینده یارانا بیله‌جک غیری-موعیّنلیک و هرج-مرجین(کائوسون) قارشی‌سیْنی آلماق، اونیتار (واحد) مرکزییَت‌چی یئنی بیر فارس شووینیست حاکیمیّتینین فورمالاشماسینا ایمکان وئرمَمَک و میلّت‌لرین اؤز موقدّراتینی تعیین ائتمسی سوره‌جینی باشلاتماق مقصدی ایله آزربایجان تورک میلّتینین مین’ایللیک دؤولتچیلیک تجربه و عنعنه‌سینه اساسلاناراق، کئچید دؤورونون ایداره‌سینه، موستقیل آلتئرناتیو کیمی طالب اولدوغونو بَیان ائدیر. شورا بو مسؤلیتی، بو جغرافیادا یاشایان دیگر غیرفارس میلّت‌لر و خالقلارلا بیرلیکده، اورتاق مکانیزملر یاراداراق حیاتا کئچیریر، بو حاقدا شورانیْن پلاتفورمو یاخین گله‌جکده یایینلاناجاقدیر.

۸. میلّت‌لرین اؤز موقدّراتینی تعیین ائتمه حاقی:

شورا یالنیز آزربایجان میلّتینین دَییل، ایراندا یاشایان دیگر میلّت‌لر و خالقلارین دا، اؤزللیکله قاشقای تورکلریْ، گونئی تورکمنیستان، خوراسان تورکلری و دیگر تورک توپلولوقلارینین، آزاد ایراده‌لری ایله اؤز طالعلَرینی موعیّن ائتمک حوقوقونا حؤرمتله یاناشیر و بو حوقوقون دِموکراتیک اساسلاردا گئرچکلشمسی (رئاللاشماسی) اوچون گرکلی شرایطین یارادیلماسینی ضروری حِساب ائدیر.

۹. شورا آدیندان، موذاکیره‌لر، آنلاشمالار، راضیلاشمالار، ایشبیرلیکلری و … گونئی آزربایجان تشکیلاتلاریْ امکداشلیْق شوراسیْنیْن قراریْ اساسینا گئرچکلشدیریلیر.

۱۰. شورا، عضو تشکیلاتلاریْن موستقیْل‌لیْغی پرینسیپینه حؤرمتله یاناشماقلا برابر، یوخاریْدا یازیْلان پرینسیپلرین بوتون عضو تشکیلاتلار اوچون باغلاییجی اولدوغونو بَیان ائدیر.

گونئی آزربایجان تشکیلاتلاریْنیْن امکداشلیْق شوراسی:

ایمضالایان تئشکیلاتلار:

۱. آذربایجان دموکرات فیرقه سی – آ.د.ف

۲. آزربایجان مرکز پارتیسی – آ.م.پ

۳. آزربایجان میلّی دیرئنیش تئشکیلاتی – دیرئنیش

۴. آزربایجان اؤیرنجی حرکاتی – آزوح

۵. گونئی آزربایجان جومهورییت پارتیسی – آ.ج.پ

۶. گونئی آزربایجان دموکرات پارتیسی – گادپ

۷. گونئی آزربایجان ایستقلال پارتیسی – گایپ

۸. گونئی آزربایجان میلّی دؤولت آلیانسی – مِ.د.آ

۹ .گونئی آزربایجان قورتولوش پارتیسی – گاقپ