سئوگیلی عاریف بئی رحیم اوغلو!
سنین حیات یولون، گنجلیگیندن سون نفسینه قدر، آذربایجان تورک میللتینه حصر اولونموش مقدس بیر آمال ایدی. بو آمالین یوکونو چیگینلرینده داشییاراق، سن هم سؤزونله، هم ده عملینله میللتینه یول گؤستردین.
بو گون – سنین ۷۰-جی ایلدؤنوموند‌ه – سئوه‌نلرین سنی بیر داها احتیراملا یاد ائدیر. سن فیزیکی اولاراق آرامیزدا اولماسان دا، قلبیمیزده، دوشونجه‌لریمیزده و میللتیمیزین یادداشیندا دایم یاشایاجاقسان. چونکی اؤلمزلیک – میللتینه خیدمتله قازانیلیر، سن ایسه بو اؤلمزلیگی چوخدان قازانمیسان.
هئچ شوبهه‌سیز کی، عؤمرونو صداقت و خالص نیتله اؤز دوغما میللتینه و وطنینه حصر ائتمیش اینسانلار بیر عؤمور یاشامیش دئیل، اثرلری و قویدوغو ایزلری ایله نسیلدن-نسیله یاشاییر. بئله اینسانلار ایکی اؤزللیگی ایله سئچیلیرلر:
۱- میللتینین ایچینده یاراتدیغی توپلومسال-بشری دگرلر و اخلاقی داورانیشلاری ایله؛
۲- گونلرینی آیلارا، آیلارینی ایللره قاتان فداکارلیقلاری و یازدیقلاری اثرلری ایله گله‌جک نسیللره اؤرنک اولاراق.
عاریف رحیم اوغلو آزربایجان تورک میللتینین دردی و قایغی‌سی ایله یاشامیش، یاراتمیش، عؤمرونو میللتینه باغیشلامیش او نادیر اینسانلاردان بیریدیر. اونون کیمی اینسانلارین بیر میللت اوچون دگری، قیسا عؤمورلری ایله دئیل، میللتین یاشادیغی سونسوزلوغا قدر اوزانان ابدیتله اؤلچولور.
منیم اوچون عاریف بئی یالنیز ۳۰ ایللیک بیر دوست دئیل، سونو گلمز بیر یول یولداشیدیر. چونکی بو یولداشلیق – بیر میللتین، بیر وطنین، بیر بایراغین، بیر دؤولتین دایمی یاشاماسی اوغروندا اؤلومسوز بیر روحسل‌لیکدیر. بو روحسل‌لیک بیزدن اؤنجه ده وار ایدی، بیزدن سونرا دا اولاجاقدیر – بیزله ده، بیزسیز ده!
عاریف جانیمیزدان بیر پارچانی اؤزو ایله آپاردی، اما یولو گئدرلی، آدی-سانی ۵۰ میلیونلوق میللتیمیزله ابدی یاشایاجاقدیر.
آد گونون میللتیمیزه قوتلو اولسون، اؤلمز عاریفیمیز!
گونئی آذربایجان قورتولوش پارتیاسی باشقانی ائلدار قاراداغلی
۲۰۲۵.۰۸.۲۳
