اولو تانرینین آدیلا
سلاملار و سایغیلار عزیز آذربایجان ملتینه، حؤرمته لاییق میللی حرکت فعاللارینا.
موعاصر دونیادا چوخلو مدنی موباریزه‌لر آزادلیق، انسانی حاقلار و عدالته دوغرو گئدیر و طبیعی کی بو هدفلر اوچون رسم اولان یوللار اؤزوده موعاصیر پرنسیپلره حائیز اولمالیدیر. دویغوساللیقدان ایراق، شورایی و جمعی مصلحته دایانمالیدیر. دونیانین گونده‌م اجتماعی حرکتلری پارتیالار رهبرلیگی آلتیندا نتیجه‌‌یه منتهی اولموش و بویوک اینسانلاری گئنیش کاریزمالار‌لا تربیت ائتمیش.
بوگون بیزیم تبعیضه معروض قالان وطنیمیزده بو گرکلی حقیقتدن آیریلمامالیدیر. نئجه‌کی ایلک دفعه دموکراتیک فرقه رهبرلیگی آلتیندا بیر ایل آزادلیق، عدالت و انسانی حاقلارین و هابئله اؤزگورلوگون عادتینه ال تاپیپ و هله‌ده او سعادتین لذتینی ذائقه‌سینده اونوتماییب.
بو گون بیزه چاتان خبرلر، میللی حرکته منسوب اولان جریانلارین بیرداها یوکسک اتحادلاریندان و ایش بیرلیگیندن دانیشیر.
آذربایجان میللی موطالیبه‌لری، سعادتی و اؤزگورلوگو یولوندا یارانان تشکیلاتلارا و پارتیالارا، سون درجه سایغیلار و سئوگیلر دیله‌یه‌‌رک و شووینیزمین اسارتینده اولساق دا، وطن سعادتی یولوندا و میللی حرکت اولکولری اوغروندا بیرلشیب متحد چیخیشلارا آددیم آتان عزیز دوستلاریمیزا قوت قلب وئرمه‌یی اؤزوموزه میللی وظیفه بیلیب و محبت و صمیمیتله اللرینی سیخیریق.
عزیز دوستلار نئجه‌کی دونیانین دیگر ترپه‌نیشلری دموکراتیک پارتیالار، تشکیلاتلار و جبهه‌لر پتانسیلی ایله اوزاق اوزاق یوللاری اؤز خالقلارینا یاخینلادیبلار، یئنی یارانان اتحاد و بلکه گلهجکده بؤیوک جبهه سویه‌سینه ایرتیقا تاپماق گوجونه مالک اولان بیرلیکلره صمیمی تبریکلریمیزی گوندریریک. هابئله گلهجکده بیرداها یارانابیلن یئنی پارتیالارا و جبهه‌لره ده اوره‌گیمیزین سئوینجی‌ایله اینتیظار چکیریک.
شوبهه‌سیز بو حقیقته ایناناراق دئییریک هر یئرده جمعی مصلحته دایانمیشیق، داغی داغ اوسته قویماق گوجونه مالک اولموشوق. شوبهه‌سیز کئچمیش گونلرده یارانان بیرلیگی ده بو یولدا گؤروب تقدیره لاییق بیلیب، بوتون قایغی‌کئش دوستلاریمیزا و اؤلکه‌‌میز آذربایجانا سعادت و اوغورلار دیله‌ییریک.
عدالت، آزادلیق و انسان حاقلارینا دایانیب اوز طالئعینی رقم ووران حرکتی کیمسه دایاندیرا بیلمز.
شعاریمیز اولان ائل گوجو، سئل گوجونو عمل درجه‌سینه چاتدیرمالییق.
یاشاسین وطن، یاشاسین وطن ائولادی.
ائوین زندانیندا محبوس اولان میللی فعال لار:
۱. ودود اسدی
۲. محمود اجاقلو
۳. مرتضی پروین
۴. سالار طاهرافشار
۵. عبدالعزیز عظیمی قدیم
۶. طاهر نقوی
