آزربایجان رئسپوبلیکاسینین پرئزیدئنتی ایلهام علیئو جنابلارینا گونئی آزربایجان قورتولوش پارتیاسینین (گاقپ) آچیق مراجعتی
۱۸ سنتیابر ۲۰۲۵
حؤرمتلی جناب پرزیدنت ایلهام علیئو،
۲۳ سئنتیابر/۱ مئهر/ – ایراندا یئنی تدریس ایلینین باشلانغیجیدیر. تأسف کی، بو تاریخ میلیونلارلا آزربایجانلی معصوم اوشاقلارا، گونئی آزربایجان تورکونه و عمومیتله ۵۰ میلیونلوق آزربایجان خالقینا و دؤولتینه بایرام یوخ، میللی آشاغیلانما گونو کیمی ایل به ایل تکرار اولونور:
جناب پرئزیدنت،
۵۴ ایل پهلوی، ۴۶ ایل ایسه اوزدن ایراق مؤوجود ایسلام رئژیمینده آنا دیلیمیزین تحصیل حقوقونو سیستملی شکیلده یاساقلاندیریلیر. آزربایجان یایلاسینین (فلات) یئراوستو-یئرآلتی ثروتلرینی تالاییر. گنج بئینلریمیزی اؤلکهمیزدن اوزاق سالاراق، اؤز علیهیمیزه آسسیمیلاسیا ائدیر. عینی زاماندا، گؤزوموزون اؤنونده رئگیونون حیات قایناغی و میللی سیموولوموز اورمو گؤلو دؤولت سیاستینین نتیجهسی اولاراق قورودولور.
جناب پرئزیدنت،
گونئین سایسیز پروبلئملرینی بیر کنارا بوراخساق، بو ایکی پروبلئم — دیل حقوقلارینین یوخ ساییلماسی و اورمو گؤلونون محوی — یالنیز لوکال دئیل، هم ده رئگیونال و هومانیتار مسئلهدیر. ایرانین تطبیق ائتدیگی سیاستلر هم اؤز کونستیتوسیاسینا، هم ده بئینلخالق اینسان حقوقلاری پرینسیپلرینه ضد حساب اولونور.
جناب پرئزیدنت، آزربایجانین آرتان گئوسیاسی نفوذو و میللی همریلیگی بو کیمی مسئلهلرین بئینلخالق موستویده دقته چیخاریلماسیندا بؤیوک اؤنم داشیر. بیز — گونئی آزربایجان قورتولوش پارتیاسی — سیزی و دؤولتیمیزی بوندان سونرا دا:
– گونئی آزربایجان تورکلرینین آنا دیلینده تحصیل حاقینین مدافعهسینی دیپلوماتیک گوندهمه داشیماغی،
– اورمو گؤلونون خلاصی اوچون رئگیونال و بئینلخالق پلاتفورمالاردا تشبوس گؤسترمگی،
– دؤولت دیپلوماتیامیزا اویغون گلدیکده بئینلخالق تشکیلاتلارلا بیرگه نظارت و موداخیله مکانیزملری فورمالاشدیرماغی،
– تورک دؤولتلری تشکیلاتیندا (ت دت) نفوذلو حضورونوزلا گونئی وارلیغینی گوندهمده ساخلاماغی خواهیش ائدیریک.
بو آددیملار گونئی آزربایجانلا همرای لیگی گؤسترمکله یاناشی، هم ده بؤلگه ده دایاناقلی باریشا و ائکولوژی ثابت لیگین قورونماسینا خیدمت ائدجکدیر.
حؤرمتله،
گونئی آزربایجان قورتولوش پارتیاسی (گاقپ)
باشقانی — ائلدار قاراداغلی
