«بیرلیک هاردا، دیریلیک اۏردا»
آذربایجان میللی حرکاتێ، پهلوی دؤورۆندن ایران آدلانان اؤلکهده یاشایان تۆرکلرین ایللر بۏیۇ گؤردۆکلری آیرێسئچکیلیک له آشاغێلامالارێن نتیجهسی اۏلاراق فۏرمالاشان گئنیش اجتماعی و سیاسی حرکتدی. بو حرکت بیر فیکیر و شخصلردن عیبارت دئییل؛ مختلف اینسانلار، فیکیرلر و تشکیلاتلارین چۏخونلوغو ایله قورولموش جمعی جریاندی و هئچکس ادعا ائده بیلمز کی، تکجه بیر شخصه یا بیردۆشۆنجهیه باغلی بیر حرکتدیر.
بو جریان، چاغداش (مدرن) حرکت کیمی دَیَرلندیریله بیلر. نیهکی سنتی و اسکی حرکتلرده داهاچوخ بیر شخصین آدی و فیکری اساس اولدوغو اوچون واختیله انحرافلار باش وئریب و حتی دیکتاتورلوق یارانیردێ. آذربایجان میللی حرکتی ایسه اؤز طبیعتی ایله بیر شخصه و تفکوره باغلی اولمایاراق دا، بوگۆنَه قدر چۏخلو انحرافلارین قارشێسێندا دایانا بیلیب. بو گۆج حرکتین میللتدن آلدێغێ انرژیدن قایناقلانیر.
حرکتده اۏلان فیکیر آیریلیغی حرکتی ضعیفلدن عامل دئییل؛ ترسینه، گۆجلندیرن اساسی محرکلردندیر. فیکیرلرین تۏقققوشماسی یئنی گؤروشلرین دۏغولماسینا سبب اولار. البته بو فرقلیلیک هئچ زامان اختلاف، توهین و داعوا سَوییَهسینه چئکیلمهمهلیدیر. فیکیر آیریلیغی حرکتده گئنیشلمه و گلیشیم یاراتمالێدێر، پارچالانما دئییل.
سۏن گۆنلرده وَدود اسدی و طاهر نقوینین آجلیق آکسییاسینا باشلاماسێ ، حرکتین ایچینده اؤنَملی بیر سێناق یاراتدی. فیکیر آیریلیقلارینا باخمایاراق، مختلف فعاللار و تشکیلاتلار بیر واحد جبهه ده توپلاناراق سسبیرلیگ گؤستردیلر. بو بیرلیک دۆشمنین جانینا قورخو سالان، حرکتین گلهجهیی اۆچون ایشێق ساچماغا عامل اولدو.
بو آجلیق قیرَوی (آکسیاسێ) حرکتین ائوین زیندانیندا اۏلان فعاللاری اۆچۆن حیات تهلوکهسی داشێسا دا، بیر گئرچهیی یئنیدن آیدێنلاشدێردێ:
میللتین منفعتی اۏرتایا گلدییی زامان، حرکتده اولان هر کس، هر فیکیر و اینانجدان اولاراق دا آذربایجان و تۆرک میللتینین حۆقوقو اوچون، بیر واحد جبههده دایانیر.
بو دا ایکی چال ایکی بیر حؤکمدۆر:
بیرلیک هاردا، دیریلیک اوردا.
حامد یگانهپور
