تورکیه و آزربایجان رئسپوبلیکالارینین گونئی آزربایجانا یؤنهلیک ایستراتئژیک باخیشی حاقیندا
گونئی آزربایجان قورتولوش پارتیاسینین (گاقپ) بیلدیریسی
سون گونلر بؤلگهده باش وئرن حربی و سیاسی گرگینلیک لر، ایران ایچینده آرتان قئیری-ثابت لیک و تئرور قروپلاشمالارینین سرحد بؤلگهلرینده حرکتلنمهسی قافقاز و اورتا دوغودا یئنی تهلوکهسیزلیک رئاللیقلاری یاراتمیشدیر.
ایراندا باش وئرن سون سیاسی پروسئسلر، اؤزللیکله رئژیمین فاکتیکی اولاراق اینقلاب قوروجولارینین (سپاه) طرفیندن یؤنه تیلن بیر «یومشاق چئوریلیش» نتیجهسینده داها سرت تهلوکهسیزلیک خطینه یؤنلدیگینی گؤستریر. بو پروسئس چرچیوهسینده مجتبا خامنه ای نین آتاسینین یئرینی توتاراق فارسچی-شعوبی رئژیمین زیروهسینه گتیریلمهسی ایران دیکتاتوراسینین داها قاپالی و سرت بیر آشامایا کئچدیگینی آچیقجا گؤستریر.
بو یئنی سیاسی دوروم بؤلگهده تهلوکهسیزلیک بالانسینی دییشدیرمکله یاناشی، گونئی آزربایجانین ایستراتئژی مؤوقعینی داها دا اؤن پلانا چیخارمیشدیر.
گونئی آزربایجان قورتولوش پارتیاسی حساب ائدیر کی، بؤلگهده ثابت لیگین، تهلوکسیزلیگین و اوزون مدتلی باریش اورتامینین یارانماسی اوچون گونئی آزربایجان فاکتورو اؤن پلانا چیخمادان هئچ بیر بؤلگه سل تهلوکهسیزلیک سیاستی اوغورلو اولا بیلمز.
بو باخیمدان تورکیه و آزربایجان رئسپوبلیکالارینین گونئی آزربایجانا یؤنهلیک ایستراتئژی باخیشی آشاغیداکی آنا پرینسیپلر اوزه رینده قورولمالیدیر:
۱. گونئی آزربایجانین تورپاق بوتؤولویو و تهلوکهسیزلیگی بؤلگه ثابت لیگینین اساس شرطیدیر.
تورکیه و آزربایجان بؤلگهده تئرور قروپلاشمالارینین و قئیری-قانونی سلاحلی ایستروکتورلارین یئرلشمهسینه امکان وئرمهملی، گونئی آزربایجانین تورپاق بوتونلویونو رئگیونال تهلوکهسیزلیک ایستراتئگیاسینین آیریلماز حیصهسی کیمی گؤرولمه لیدیر.
۲. تورک دونیاسینین گئوسییاسی بیرلیگی.
گونئی آزربایجان تورک دونیاسینین آیریلماز بیر پارچاسیدیر. بو سببدن آنکارا و باکی تورک دونیاسینین تهلوکهسیزلیک و امکداشلیق ایدئیاسیندا گونئی آزربایجان فاکتورونو نظره آلمالیدیر.
۳. اینسانجیل و سیاسی دستک.
گونئی آزربایجان تورکلرینین میللی، مدنی و سیاسی حقوقلاری بئینلخالق پلاتفورمالاردا مدافعه ائدیلمهلی، بؤلگه خالقینین لئگیتیم طلبلری دونیا ایجتیمایتینه چاتدیریلمالیدیر.
۴. بؤلگهده ثابت لیگین قورونماسی.
ایران ایچینده مومکون سیاسی دییشیکلیکلر و یا کئچید سورجینده گونئی آزربایجانین میللی حاقلارینین و تهلوکسیزلیگینین قورونماسی رئگیونال گوجلر اوچون باشلیجا گوندم اولمالیدیر.
۵. تورک میللتینین اورتاق گله جگی.
تورکیه و آزربایجان دؤولتلرینین ایستراتئژی امکداشلیغی گونئی آزربایجانین دا داخیل اولدوغو گئنیش تورک جوغرافیاسیندا باریش، رفاه و بیرلیکده یاشاماغین تامین اولونماسینی قارانتی آلتینا آلمالیدیر.
گونئی آزربایجان قورتولوش پارتیاسی اینانیرکی، بؤلگهده یارانان یئنی گئوسیاسی شرایط گونئی آزربایجانین گله جگینین و تهلوکسیزلیگینین اولوسلاراراسی آلاندا داها جدی شکیلده موذاکیره اولونماسینا ایمکان یاراداجاقدیر.
گاقپ بؤلگهده باریشجیل یاشامین، ثابتلیگین و خالقلار آراسیندا قارشیلیقلی سایغینلیغین یارانماسی اوچون یئنی بیر سیاسی دوزهنین قورولماسینی دستکله ییر.
گونئی آزربایجان قورتولوش پارتیاسی (گاقپ)
۲۰۲۶-۰۳-۰۹
