(۳۱ دکابر)
دونیا آزربایجان تورکلرینین بیرلیک گونو قوتلو اولسون.
(گونئی آزربایجان قورتولوش پارتیاسینین بیلدیریشی)
۳۱ دئکابر – دونیا آزربایجان تورکلرینین قودسال بیرلیگی، بوتؤو آزربایجان بیرلیگینین یئنیدن اومودلانماسی گونودور.
۳۱ دئکابر، میللتیمیزین ۱۸۲۸-جی ایلدن روسلارین آزربایجان تورکلرینه قارشی غلبهسی ایله باشلایان پارچالانما پروسئسینه سون قویما موجادیلهسینین سیمبولیک گونودور.
بو گونون آنلامی ایله دئسک ۳۱ دئکابر یعنی:
بیر میللت – ۵۰ میلیونلوق آزربایجان تورک میللتی،
بیر دؤولت – آزربایجان رئسپوبلیکاسی،
بیر بایراق – آی-اولدوزلو بایراق،
بیر پرئزیدئنت – ایلهام الیئو جنابلاری
بو تابلونون اوبیئکتیو اؤنونون آچیلیشی اوچون هانسی اؤن باشلیقلار گرکیر؟
۱- گونئیده ۴۰ میلیون سیویل سویداشیمیزین الی یالین اؤلوم-دیریم موجادیلهسی ۵۰ میلیونلوق آزربایجان تورک دؤولتی و میللتینین میللی داواسینا چئوریلمهلیدیر. بو داوادا دؤولت و میللتجه بیر اولماق گرکیر. گونئین قورتولوشو اوغروندا «آذربایجان میللی حرکاتی فوندو»نون یارانماسی ان اؤنملی آددیمدیر.
۲- آزربایجان میللی حرکاتینین ایگید گنجلرینین فارسچی-شعوبی زیندانلارینیدا بوغولان سسینی، اوشاقلارینین گؤزیاشلاری، آج قارینلاری دؤولتیمیزین گؤزوندن اوزاق توتولمامالیدیر.
۳- ایرقچی ایران رئژیمینین باسقیلاری اوزوندن ایللر بویو حبس چکمیش، ایشکهنجه گؤرموش، ان ایلکین میللی-اینسانی حاقلارینی ایتیرمیش، ایشینی-مالینی، جان گوونلیگینی ایشغالچی رئژیمه اودوزموش، دوغمالاریندان سورونموش چوخلو سویداشیمیز وار. آنا یوردوموزون قوزئیینه و تورکییه اوز توتان مینلر آزربایجانلی آکتیویست ب م ت قانونلارینین چوخ آشاغیسیندا ازگین دورومدا عؤمور سورورلر. ایکی دؤولتیمیز – اؤزللیکله اؤز به اؤز آزربایجان دؤولتی ایگید اؤولادلارینا جانلا-روحلا ییهلهنمهلیدیر. بو اونلارین ان دوغال حاقیدیر. یوخ،»بیز هله بیر میللت-دؤولت کیمی سوبیئکتیو و روحسل بیرلیکده دئیلیک» توتوم سرگیلنیرسه، اوندا گونئیلی ایگیدلریمیزین تالعینی ان آزیندان ب م ت اورگانلارینا بوراخماق گرکیر. حالبوکی، ایلگیلی دؤولت اورگانلارینین اینسانی و هومانیتار سورونلاردا ویجدانلی داورانیشی دؤولت و میللت اوچون ان اؤنملی قازانجدیر.
۴- بیر میللت، بیر دؤولت، بیر بایراق و بیر پرئزیدنت صاحبی اولماق اوغروندا ۵۰ میلیونلوق میللی دوشونجه طرزینده مئدیا، تئلئکانال، پروپاقاندا شبکهسی یولا سالماق گرکیر. بو آزربایجان رئسپوبلیکاسی دؤولتی اوچون ان آز هزینه ایله باشا گلندی. بئله کیچیک پرویئکتلر اوچون گونوموزون گوجلو، باشی اوجا آزربایجان دؤولتینین معنوی و سیاسی ایرادهسی یئترلیدیر. بئله گرکلی ایراده نین حیاتا کئچیریلمهسیله تکجه گونئین سسینین اوجالماسی دئیل، تئهرانین شعوبی سحر کانالینین دا زهر ساچماسینا یئترلی جاواب ایمکانی آچیلاجاقدیر.
۵- باشدا آزربایجان میللی حرکاتی اولماقلا، گونئی آزربایجان میللی-سیاسی قوروملارینا دوغما گؤزله باخماق، اونلارین ساواشینی اؤزونونکو بیلمک گرکیر. اونلارین مادی-معنوی یاردیمینا قوشماق همرایلیک آنلامینا گلیر. همرایلیک قورو تبریکله دئیل، ائوینده اوتوروب هوببی اولسون دئیه ساواشچیلارا یاشاسین دئمکله اونلارین عائلهسینین قارنی دویماز! جسارت ایله مالی پایلاشماق همرایلیک اردهمی دئمکدیر. شوعاردا دئیل، عملده دایانیشما ساغلانمالیدیر.
۶- آزربایجان دؤولتچیلیگینه باغلی دیاسپورا گوجونون یئنیدن توپارلانماسی، دونیا اوزره میللی بیرلیگین داها ساغلاملاشماسی اوچون، آزربایجان حاکمیتینین جدی دیاسپورا چاباسینا احتیاجی واردیر. غیری-حکومت و یا سیویل قوروملارین میللتلر آراسینداکی نفوذ دایرهسی چوخ گئنیشدیر. دونیا آزربایجانلیلارینین همرایلیک گونو، اصل آنلامدا میللی درنکلرین، آسسوسیاسییالارین، فئدراسیالارین و بو کیمی دونیا چاپیندا میللی پرویئکت اوزرینده سیستئملشمیش بیرلیکلرین ایللیک قورولتایی اولمالیدیر.
یاشاسین ۵۰ میلیونلوق آزربایجان تورک میللتی و دؤولتی!
یاشاسین ۳۱ دئکابر – میللی بیرلیک و همرای لیگیمیز!
گونئی آزربایجان قورتولوش پارتیاسی
۲۰۲۴/۱۲/۲۸
