آددیم-آددیم اورتا دوغو ساواشینا دوغرو!
ایران ووردو. ایسرایل قازاندی، غزه ایشی بیتدی!
گونئی آزربایجان بو ساواشین هاراسیندا؟
[سون بؤلوم]
“گونئی آزربایجانین بو ساواشداکی یئری و دورومو”
تهران و تل-آویو آراسیندا هر هانسی قارشی دورمانین تمل ایپلری آمریکا الینده‌دیر. ۴۴ ایللیک اؤلوم اولسون آمریکایا، اؤلوم اولسون ایسرایله شعارلاری کیمی سون اولایلاریندا ،سئناریا سیا و پئنتاگونا عاییددیر. تریلیونلار دلار سیلاحین، نارکوتیکانین و قان بازارینین مرکزی ساییلان اورتادوغونون زنگین یئرآلتی و اوجوز یئراوستو قایناقلارینین طالعی بوندان عبارتدیر. بعضن دئموکراتییا ، بعضن ایسه دئسپوتیزم آدی ایله بؤلگه‌نین نبضینی الینده توتان سؤمورگن دؤولتلرین بؤلگه‌میزه جیزدیغی خریته ده بو منوال‌لا تانیتیلمیشدیر.
ایرانین سون گونلرده کی ایسرایل ماجراسینیدا بو قاپسامدا گؤرمک گره‌کیر. اورتا دوغو پرویئکتی، چوخ قانلی بازار اولدوغو حالدا، عین زاماندا چوخلو آکتوروندا باییندیغی آلاندی. خامنه اینین ایرانی، نئتانیاهونون ایسه ایسرایلی بو آکتورلاردان ایکیسیدیر.
آمریکانین ایزنیله ایکی آکتورون بیر-بیرینه گیرمه‌سینین تابلوسو اولدوقجا آیدیندیر. بیر یاندان ایچه‌ریدن قدس قوه‌لرینین اینتیقام حیسسی، باشقا یاندان حماس، حزب الله، حوثی‌لر و حشدالشعبی کیمی تورلو تئررور قوروپلارینین تهرانداکی صاحب‌لرینه سیتم‌ده بولونماسی، دیگر یاندان ایسه، ایسرایلین گون اورتاسیندا قتل عام یولا سالماسینا قالخان اعتراضلارین قارشیسینی آلماق اوچون بؤلگه‌ده یئنی بیر ساواش تئاتروسونا احتیاج وار ایدی. واشنگتن‌ون یؤنتدیی سئناریو حیاتا کئچدی. اؤنجه‌دن قالیب-مغلوبون بللی اولدوغو فیلم ساعتلر ایچینده باشلادی و بیتدی. یئرده قالان ان اؤنملی سورولاردان بیری ایسه ایرانین ساواشدان سونرا نئجه اولاجاغی و اورادا یاشایان اسیر میللتلرین گله‌جه‌ییدیر.
آزربایجان تورک میللتی اورتا دوغونون ان بؤیوک توپلولوقلاریندان بیری اولاراق اؤز باغیمسیز و اؤزگور دؤولتینین قورولماسینی بوتون دونیا احتیماللاریندان اوستون توتماقدادیر. ایران، ایسرایل و یا هر هانسی اوچونجو انگلین بونا گوجو چاتمایاجاقدیر.
سؤزسوز کی، آزربایجان تورکلرینین بؤلگه‌ده اوز وئره‌جک بوتون اولایلاردان ائتکیلنمه‌سی مومکون دئییل‌دیر. اونوتماماق گره‌کیر کی، گونئی آزربایجان، فارسچی-شعوبی ایران رئژیمینین ایشغالی آلتیندادیر. بو اوزده‌ن وارساییلان ساواشین بوتون ائتکیلری آزربایجان تورک میللتینین ده پایینا دوشه‌جکدیر. آنجاق، کسینلیکله بو ساواشین سونوندا آزربایجان و ایران اوچون عین سونوج گؤزلنیلمیر.
“آزربایجان تورک گنجلیینین ساواشا باخیشی”
۱۹۸۰-۸۸-جی ایللر آراسی ایکی دیکتاتورون /خمینی-صدام/ قارشیلیقلی قیشقیرتمالاری ایله ایران-عراق ساواشی تاریخه دوشدو. میلیونلار اینسانین اؤلومونه نه‌دن اولان بو آنلامسیز ساواش‌دا ۱۰۰ مینلرجه آزربایجان گنجی جانینی ایتیردی. خمینی‌یزمه وورولان رادیکال تورک گنجلیگی دالغا-دالغا اؤلومه گئده‌رک یئنی یارانمیش ایران ایسلام جمهوریتینی کسین یئنیلگیدن قورتاردی. بؤلگه‌نین ان بؤیوک اوردوسو اولان عاشورا قوشونو(دوشونجه‌لری یویولموش یوزده ۹۵ گونئی آزربایجان تورکلریندن اولوشان! )تپه‌دن آیاغا فارس‌چیلیق، ایرانیچیلیک اوغرونا دارما-داغین اولدو. دونیا تاریخینده گؤرونمه‌ین بیر ایلکی- عاشورا قوشونو گؤستره‌رک تک باشینا ساواشین اینسیاتیوینی عراقین الیندن قوپاردی. شعوبی فارسچی ایدئولوگییاسینا آلدادیلمیش بیر قوربان کیمی اؤزونو خالقلار دوشمنی گئریچی بیر رئژیمه قوربان وئره‌ن بو قوشونون طالعی آنجاق اؤلوم اولدو. (او زامان، تهران فاشیزمینین گیزلی اوزو کوتله‌لر اوچون آچیغا چیخمامیشدیر. آنجاق، زامان کئچدیکجه رئژیمین چیرکین اوزو آچیغا چیخدی.)
بوگون یئنی تورک قورشاغینین او ساواشدان الده ائتدیی درین تجروبه بونو گؤستریر کی، آرتیق میللتیمیزین فارسچیلیغا وئردیی آغیر هزینه گئریده قالمیشدیر. میللتیمیزین آلوولو گنج کسیمی اؤزونو میللیتچی تورک آدلاندیرماقلا تکی اؤزلویونو، میللی کیملیینی و دؤولتچی لیک دوشونجه‌سینی منیمسه‌ییر. گنجلییمیز هئچ چکینمه‌دن تورلو ایرانچی توزاقلاری فارسچی رئژیمین باشینا ییخیر. تورک گنجلییمیز وارساییم ساواشین گئدیشاتی ایله دئییل، سونوندا ییخیلاجاق فارسچی رئژیمدن سونراسینا باخیر.
تورک گنجیمیز بعضی گونئی پارتییالاری کیمی بیر گؤزونده یاشیل ایشیق، بیر گؤزونده ایسه قیرمیزی ایشیق یاندیریب-سؤندورمور. گنج تورکوموز بو ساواشدان سونرا کسین ایستیقلال گؤزله‌ییر. اونا گؤره حاضرلانیر. اونا گؤره تشکیلات‌لانیر، اونا گؤره هر تورلو ایرانی لیگی رد ائدیر. اونا گؤره توران گؤزونو اولکوسو اوچون یولبای ائدیر. اونا گؤره، ایران ایچینده فئدئرالیزم دئییل، آزربایجان ایچینده بوتؤولوک گودور.
بوگون آزربایجان تورک گنجلیگی عین زاماندا بوتون ایرانی لییه، فئدئرالیزمه، فارسیزمه میدان آچماغا چالیشان بالونلاشمیش پارتییاچیلارا اؤزلرینه، اؤزلوکلرینه دؤنمک اوچون فورصت وئریر. کسینلیکله گنج حرکت‌چیلریمیزین بو سون چاغیریشلارینا اویاجاق ساغلام قوروملار دا واردیر.
«ساواش پیسدیر! بیز باریش ایستییریک. میللتیمیزدن ده ساواشدان اوزاق دورمالارینی خواهیش ائدیریک!»
دئین لره گنج میللت‌چیلریمیزین بیر سون سؤزو ده واردیر:
« اونسوز دا بیز ساواش ایچیندییک. بلکه سیزین بوندان خبرینیز یوخدور. بیز ساواش ایچینده اولدوغوموز اوچون ساواشدان قورخموروق! ساواشین سونوجوندان قورخوروق. قورخوروق کی، سیزین کیمی قورخاقلار اوزوندن یئنه ده ایستیقلال ساواشیمیزی اودوزاق! بو اوزدن سیزین قورخاقلیغینیزدان قورخدوغوموز قدر ساواشدان قورخموروق. سیز بیزیم ایشیمیزه بورون سوخمایین. ان یاخشیسی باریشجیل یاشامینیزی سوردورون. لطفاً!»
گونئی آزربایجان میللی قورتولوش حرکاتی،
اینفورماتیک و آراشدیرمالار بؤلومو
۲۰۲۴-۰۴-۱۵
