آوروپا بیرلیگینین فوتبول مافیاسی تورکلرینین سئوینجینه دایانامادی!
دونیا گونده‌مینه دوشن مئریح دئمیرال سئوینجینین بویودلاری بؤیودوکجه بؤیویور. ائورو ۲۴ یاریشلاری چرچووه‌سینده اوینانان تورکیه- اتریش ماچیندا تورک اویونچونون معصوم گول سئوینجی پارتلاق وئره‌رک بیر سیاسی آراجا چئوریلدی. تورکلرین سئوینجینی بیر تورلو قبول ائده‌مه‌ین سؤزده آوروپا دئموکراتیاسی میفولوژیک بیر سیمگه‌نی باهانا توتاراق تورک دونیاسینی قارشیسینا آلدی. تورک فوتبولچونون سئوینج هیجانی تاریخی، میللی-کولتورل و گلنکسل بوزقورد ایشارتیله اولونجا آوروپا فوتبول مافیاسی سیاسی لشرک اؤز اینسانجیل ایسپورت میسیاسینی آیاق آلتینا قویدو. بیر تورکون سئوینج سوچو کیمی آلقیلانان بوزقورد گؤستریسی ایرقچی بیر سیمگه اولاراق حؤکمه تاخیلدی. ائورو ۲۴ اورقانیزاتورلوغو ۴۰۰ میلیونلوق بؤیوک تورک وارلیغینین دایانیشما آنلامی اولان بوزقورد سیمگه‌سینین کیمه قارشی بیر ایرقچی‌لیک ایشارتی اولماسینا توخونمادان، اؤزونون تورکلره قارشی نه درجه ایرقچی اولدوغونو گؤسترمیش اولدو.
هئچ شوبهه‌سیز، بو گون دونیا اوزره ان چوخ بوزقورد ایشارتی توتان توپلوم گونئی آزربایجان تورکلری‌دیر. بوتون دونیانین بیلدیگی کیمی گونئی آزربایجان ایرقچی ایران فارسچی دؤولتین ایشغالی آلتیندادیر. دونیادا ۱۰۰ ایللیک ایشغال آلتیندا اولان بیر توپلومون ایرقچی اولما احتیمالی یوخدور. بوزقورد سیمگه‌سینی تورکیه‌نین بیر پارتیاسی ایله اؤزلشدیر‌ن آوروپا ذهنیتینین ان اوفاق بئله، بیلیمسل آرقومئنتی یوخدور. فوتبول مافیاسینین بو سوچلاماسی یالنیز تورکیه میللی‌سینین یولونو کسمکدیر. فوتبول مافیاسی سوچلو آختاریرسا یولونو تبریزین قورد دره‌سینه سالمالی و گونئی آزربایجانین قورتولوشو اوغروندا موجادیله ائد‌ن یوزمینلرجه گنج بوزقوردو گؤرمه‌لیدیر.
گونئی آزربایجان میللی قورتولوش پارتیاسی-یؤنتیم قورولو
۲۰۲۴-۰۷-۰۵
