ایران آدلانان فارسچی دؤولتین پرئزیدنت سئچکیلری تورک پزشکیانین ظفریله سونا چاتدی!
«گونئی آزربایجان میللی قورتولوش پارتیاسینین باخیشی»
باشدا آزربایجان تورک میللتینین بیر کسیمی اولماقلا، گنللیکله غیرفارس میللتلرین، اومیدسیز قادینلارین، گنجلرین و %۶۰-ای قاپسایان آجلارین نسبی سسیله سویداشیمیز مسعود پزشکیان ایران ایسلام جومهوریتینین یئنی دؤولت باشچی‌سی سئچیلدی. (ایران‌دا دؤولت حاکمیت، حاکمیت ایسه کلاسیک دؤولت آنلامینا گلیر. بو سیستئمده دؤولت موطلق فقیه دئیله‌ن دینی حاکمیتین آلت قولودور. باشقا آنلامی ایله دئسک ایران دؤولت سیستئمینده بوندان اؤنجه شاه، ایندی ایسه خامنه ایی موطلق دیکتاتورا و مملکت صاحبی ساییلیر.) آزربایجان موستقیل میللی فعاللاریندان آلینان بیلگیلره گؤره، سایین پزشکیانین آلدیغی اوی اورانی گؤستریله‌ن تابلونون چوخ اوستونده اولموشدور. اونون اویلارینین %۶۰-۶۵ اورانیندا اولماسینی دئیه‌ن دوغرو قایناقلارا گؤره، تئهران رئژیمینین ایلک باشدان ساختاکارلیق سیستئمی چؤکه رک آدایی نین (جلیلی نین) سئچیلمه‌سی اوچون یئترسیز قالمیشدیر.
بو سئچکیلر گؤستردیکی، هارداسا ایران آدلانان اؤلکه‌نین مرکزی ایالتلرینین سس اورانی بیراز جلیلی طرفینه آغیر باسسا دا، سینیر ایالتلرینین کسکین سسینی پزشکیان قازانمیشدیر. بو ایسه، ایران آدلانان دؤولتچیلیگینین گله جه گینین اولماماسینی گؤستریر. بلوجستان، عربستان، کوردوستان، گونئی تورکمنیستان، گونئی آزربایجان نیسبی ده اولسا اؤز گله‌جک دؤولت‌چیلیک نیتلرینی دولاییسیلا اورتایا قویماغا چالیشدیلار. غیری فارس میللتلرین موطلق حاکمیته قارشی اورتایا قویدوغو پزشکیان تابلوسونو گنل گؤرمک گرکیر. رئژیمین اعلان ائتدیی %۴۹ ایشتیراک اورانی اؤزلویونده موللا سیستئمینین چؤکوشونون سیقنالیدیر. رئژیم اوچون ایسته نیلمه‌ین بیر جومهورباشقانینین تحمّولو یوز قات %۲۰ اورانینین آلتیندا قالان کوتله طرفیندن قبول اولونماز بیر جلیلی نین اولماسیندا یاخشی‌دیر.
پزشکیان دا رئژیم اوچون اؤزگه بیریسی دئیل‌دیر. خامنه ای نین سون چاره‌سی یدک لرینین میدانا سورولمه‌سی ایدی. عصیانا حاضر اومودسوز زیندانیلارین اؤنله‌نمه‌سی اوچون یئنی-یئنی تاکتیکالار گرکیرسه باش دیکتاتورا دا او ایشی گؤردو. خامنه ای اؤز ایشینی گؤردوسه ایکینجی سئچکی آشاماسیندا پزشکیانی جومهورباشقانی سئچه‌نلرین ده ایشلرینه بیگانه گؤزو ایله باخماماق گرکیر. باش دیکتاتور اؤنده اولماقلا رئژیمین نفس بوروسو اولان سئپاه ائتکنلی سلاحلی قوه‌لری ده بو گئدیشاتین بیر کئچیجی تاکتیک اولماسینی یاخشی بیلیرلر. بو گئدیشاتین قارشی‌سینین آلینماسی خامنه ای ایله، پزشکیان ایله و هر هانسی گلر-گئدر سیاسی فیقورلارلا آلینمایاجاقدیر.
بو بؤلگه‌نین اؤز دوغمالارینا قایتاریلماسی قاچینیلمازدیر. بونو آزربایجان میللی حرکاتینا باغلی اولان بوتون پارتیا و شخصلر بیلیر. بونو دئمه‌یه احتیاج یوخدور. آنجاق، آزربایجان میللی حرکاتینا باغلی اولان سویداشلاریمیزین بیرلیگی، قارداشلیغی، بیر-بیریندن آسیلماسی، ایرانین فارسچی سیاستلرینه اویماماسی گرکیر. قارانلیق اوتاقدا قارا پیشیک آختاریشی بؤیوک خطادیر. اؤنجه ایشیقلا قارانلیق اودانی ایشیقلاندیرماق گرکیر. سونرا قارا پیشیک گؤزوموزون اؤنونده اولاجاق‌دیر! بیراز دؤزوملو اولماق، بیراز درین دوشونمک، منیم کیمی دوشونمه‌ین مندن دئیل منجیللیکدن اوزاق دورماق، دوشمه‌نین یاراتدیغی تملسیز آتموسفردن اوزاق دورمامیز چوخ گرکن میللی ارد‌مدیر. یاخین گونلرده اؤرتولو بیر چوخ پرده آچیلاجاقدیر.
اونوتمامالییق کی، آزربایجان تورک میللتینین بؤیوک اومیدلری واردیر. بو اومیدلرین اوفوقو ایران‌چیلیقلا دئیل، آزربایجان تورکچولویو اولکوسو ایله آچیلاجاقدیر. اولو میللتیمیزین بیر قیسمینین میدانا گلمه‌سیله ولایت چمبرینده عؤمور سور‌ن بیر تورکون دؤولت باشچی‌سی اولماسی گرچکلیک قازاندی‌سا، بوتونلویوموزون نلره قادیر اولماسی گؤز اؤنونده‌دیر. بیزیم بیرلیگیمیز دیریلیگیمیزدیر. مقصدیمیز قیزیل اولمادیرسا، قیزیل آلمامیزسا گونئی آزربایجان تورک جومهوریتی‌دیر. سیز اولو میللتیمیز بونا لاییق سینیز. تکی اؤزلویوموزه، اؤزوموزه ایناناق!
گونئی آزربایجان میللی قورتولوش پارتیاسی باشقانی ائلدار قاراداغلی
۰۶/۰۷/۲۰۲۴
