گونئی آزربایجان میللی قورتولوش حرکاتیندان
آلدادان و آلدانان کسیمه بیرگه مئساژ!
بیر نئچه گون سونرا (۰۴/۰۵/۲۰۲۴) آلمانییانین بئرلین شهرینده بیر کسیم ایران آزربایجانلیسی «قالیجی دئموکراسی» آدی آلتیندا وطنلری ایرانین گله جه گی اوچون حیاتی کونفرانس کئچیرهجکلر! ایرانی جانلاری باهاسینا قوروماغا آند ایچمیش «آلدادان» کسیمین هارادا، هانسی یئرده، کیملرین پاراسی و سفاریشی آلتیندا وطنلری ایران اوچون یوروش، کونفرانس، گیزلی-آشکار گؤروش کئچیرمهسی «آزربایجان تورک میللتینین» اوموروندا دئیل. آرتیق، ایستیقلال یانغیسی ایله گئجهسینی گوندوزه قاتان تورکچو گنجلیگیمیزه گؤره آلدادیجی ایرانچیلیق اویونلارین ان اوفاجیق بئله،
ده یری یوخدور. لوس آنجلسده رضا خانلارینین، آوروپادا ایسه چئشیدلی جانلارینین آلقیشینی قازانان بو کسیم اوچون «آزربایجان تورک میللتی» و «آزربایجان میللی حرکاتی»ندان سادهجه قارقیش و لعنت مئساژی گؤنده ریله بیلر! بو ایسه، هرکس اوچون یئترلی درس ساییلمالیدیر.
سوموت (کونکرئت) اولاراق، بو قیسسا یازیدا آلدادان و آلدانان کسیمه ایشاره ائدیلیر.
بو، گونئی آزربایجان میللی قورتولوش حرکاتینین گؤروشودور. بو گؤروشه یانلی و قارشی چیخانلار اولاجاقدیر.
گامقح-نین باخیش آچیسی ۵۰ میلیونلوق آزربایجان تورکلویونون “میللتی و دؤولتی” ایله باغلیدیر. قورتولوشچو باخیش زاماندان، مکاندان، گودومدن، حساب-کیتابدان آسیلی اولمایاراق اؤزگور، باخیمسیز، آچیق، آیدین و جسوردو. ائله بو اوزدهن ده، بوتون قارداش قوروم-قورولوشلاری بئله اولماغا چاغیریر.
ایلک اؤنجه بیر نئچه آلدادان کسیمه گؤز آتالیم:
– ایرانین فارسچی موللا رئژیمیندن سونراکی ایران دؤولتینین یاشاماسیندا اورتاقلیق ائدن و اوندان پای دیلهین کسیم.
– «آزربایجان میللی حرکاتی»نی رد ائدرک، آلتئرناتیو قوندارما «ایران تورکلری حرکاتی» یولا سالماغا چالیشان، ۴۰% فارس و ۴۰% تورک اولاراق ایکی ائتنیکلی «ایران فئدئرال دؤولتینین» پئشینده اولانلار.
– «آزربایجان میللی حرکاتی» ایچینه سیزمیش ایرانچی سول تشکیلاتلارا (توده، فدای) باغلی اولان کسیم. بو کسیم شعوبی سیزما جریانی قدر سینسی و تهلوکهلیدیر.
– بیر گون ایران آدی آلتیندا «ایران میللی کونگرسی»، بیر باشقا گون «ایران میللی کئچید شوراسی» یاشماغی آلتیندا، باشقا بیر گون ایسه «تصمیم کئچید شوراسی»چاتیسیندا اوتوران و حتی آزربایجانلی اولدوغونو دانان سئمینارین آغ ساققاللاری ساییلان پان ایرانیستلر.
– تورکیه و آزربایجان رئسپوبلیکالارینا قارشی گئجه-گوندوز ایهانت، ایفتیرا یاغدیرماقدا دوشمن پان ایرانیزمی گئریده بوراخانلار.
– آلدادان کسیمی اؤزلری قدر یاخیندان تانییان، لاکین اونلارین ایرانچیلیغینا اوزاقدان یاشیل ایشیق توتان اوپورتونیست آزربایجانلی پارتیا و قوروملار.
– بئله توپلانتیلار آدی ایله ایسپونسورلوق پرویئکتلری اورتایا قویان سیاسی دللاللار. بو کسیمین آلدادیجی رولو آراشدیریلمالی و ۵۰ میلیونلوق آزربایجان توپلومونا (میللت و دؤولت) ایفشا ائدیلمهلیدیر.
– گونئی آزربایجنین قودسال قورتولوش یولو سیاسی آلیش-وئریشچیلرین آلانی اولمامالیدیر. آزربایجان میللی حرکاتینا باغلی اولان قورتولوشچو-ایستیقلالچی و بوتؤوچو قوروم-قورولوشلار بونا ایزین وئرممهلیدیر.
ایندی ایسه آلدانان کسیمدن اؤرنکلر:
– بئرلین توپلانتیسینا اومید گؤزو ایله باخان، تمیز نیتله اورادان بیر اولوملو سونوج گؤزلهینلر.
– اوره گی صاف، لاکین سیاسی فیقورلاری یاخیندان تانیمایان و اونلاری دیرلهندیرمه گوجوندن اوزاق اولانلار.
– توپلانتینین آزربایجان آدی آلتیندا کئچیرمهسینین تملینده ایران کیملیگینین اولماسینی تشخیص وئره مه یهنلر.
– توپلانتینی فئدئرالچیلار ییغیناغی ساناراق، تپهدن-دیرناغا ایرانیلشمیش داش قافا شیرین عبادی لردن، حسن شریعتمداری لردن، صدرلاشرافی لردن آزربایجانا فئدئرال شانسی اومماق قدر ساده لؤح سویداشلار!
– اوزون ایللردن بری ایدئولوژیک باغلانتیسی اولان ساکین و غیری فعال کسیم ایله یاناشی عائله باغلارینی سیاسی باخیشلاردان اوستون توتانلار.
– آزربایجان میللی حرکاتینین اؤزللیگینی درک ائتمکدن عاجیز قالان، ایللرینی فارسچیلیق چمبرینده چوروتموش اسکی سیاسی کسیم.
– تورک وارلیغینی ایرانیلیکده دویان، گونئی آزربایجانین ایستیقلال دوشونجهسیندن قورخویا دوشن ائلینه اولموش وطنداشلار.
– اؤزونو فارس کیملیگینین بیر پارچاسی گؤرهن سولچو آذری کسیم. همین باخیش آچیسی اوزوندن آسسیمیله اولموش، وطنسیزلیگه آلیشانلار.
– و سیاسی دللاللارین باسقیسی آلتیندا بو آنتی-آزربایجان توپلانتیسینین کئچیریلمهسینه مالی یاردیم ائدن ایمضا صاحبیلری!
گونئی آزربایجان میللی قورتولوش حرکاتی باشفانی
ائلدار قاراداغلی
۲۰۲۴/۰۵/۰۱
