»تئررور راکئتی تئررور مرکزینی ووردو«
ایسماعیل هنیهنین تئهراندا تئررور اولماسی ایله باغلی
گونئی آزربایجان میللی قورتولوش پارتیاسینین بیلدیریشی
ایران تئررور دؤولتینین باش دیکتاتورو – علی خامنه ای، تئهران جومعه نامازیندا بئله دئمیشدیر: « سیونیست رئژیمین ایران میللتینین دوشمهنلری سیراسیندا اولماسی اوچون یئترلی گوجو یوخدور… اگر اونلار بیر غلط (یالنیش) ائتسهلر، ایران تل-اویو و هایفانی یئرله-یئکسان ائدهجک!» بو بؤیوک لافدان آز کئچمیشدی کی، ایسراعیل فارسچی-شعوبی رئژیمین دمشقدهکی سپاه قرارگاهینی (سؤزده کونسولونو) یئرله-بیر ائتدی. سپاهین سورییا باشچیسی و ۵ سپاه یوکسک یئتکیلیسی اؤلدو. یئنه خامنه ای نین حدهلری سوررکهن بئله چیخیش ائتدی: « بیز، پیسلیک و آلچاق رئژیمین یالنیشینا سرت جاواب وئرجه ییک. اونلارا گؤز آچتیرمایاجاییق!» کیمی سؤزلرین تکرار-تکرار خامنه ای دیلیندن سوررکهن، حاظیرکی «ایطلاعات» ناظری – موللا ایسمایل خطیب، ژورنالیستلر قارشیسیندا پوز وئرهرک بئله دئمیشدیر: «موسادین ائتکی شبکهسینین قیریلماسی (ایرانین) «ایطلاعات» ناظیرلیگینین پرئزیدئنت رییسی دؤولتینین استثناسیز خیدمتی اولموشدور.» او آرتیرمیشدی: «حیاتی مرکزلریمیزده تخریبات تؤرهدن، بیلیم اینسانلاریمیزی قتله یئتیرهن موسادین سیزما گوجو آرتیق محو ائدیلمیشدیر.»
آنجاق، بؤلگهده گئدن اولایلارین تئهران تئررور دؤولتیله ترس دوشمهسی بیر داها فارسچی-شعوبی رئژیمین چوروموشلویونو دونیا گؤزونه سرمیش اولدو. حماسین سیاسی بوروسونون لیدئری ایسماعیل هنیهنین تئهرانین قلبینده تئررور اولماسینین سادهجه بیر فلیسطین باشچیسی دئیل، تئهران تئررور دؤولتینین ده بوتون باشچیلارینین موساد سونگوسونون توشوندا اولماسینین گؤسترگهسیدیر. فارسچی ویلایت موطلقیه تینین کئچمیش خاتمی دؤولتینین «ایطلاعات» ناظری – موللا علی یونیسی،نین دقت چکهن سؤزلرینه گؤره: »موساد ایران ایسلام حاکمیتینین بوتون اورگانلارینا سیزمیشدیر. بو سیزما ائله دریندیرکی، آرتیق بوتون باشچیلارین هامیسینین جانی و وارلیغی تهدید آلتیندادیر. ایسراعیل ایسته دیگی زامان ایسته دیگی یئرده ایران لیدئرلرینی اؤلدورمهیه قادیردیر. بو قاچیریلمازدیر!»
ده یرلی آزربایجان تورک میللتی!
سؤزسوز کی، هانسی بویادان اولماسیندان آسیلی اولمایاراق تئررور آکتی قینانمالیدیر. آنجاق، تئررورا قارشی تئررور آکتکلاری یاشادیغیمیز بؤلگهنین واز کئچیریلمزی اولاراق گون کئچدیکجه گئنیش بویودلار آلماقدادیر. بو تئررورلارین بیر ده، آزربایجان تورک میللتینه وئردیگی مئساژی اونوتماماق گرکیر. بئله کی، گؤروندویو کیمی تورک دوشمهنی ایشغالچی رئژیم گون کئچدیکجه ایچدهن، دیشدان سؤکولمکدهدیر. سیاسی، ائکونومی، سوسیال و اخلاقسل آلانلاردا چؤکموش بیر دؤولت سیستئمینین مرحمتینه اینانماغین اؤزو ده تئررور دؤولتینین یاشاماسینا یاردیمچی اولماق آنلامینا گلیر.
نه یازیق کی، آزربایجانین یوخ ائدیلمهسی اوغرونا آند ایچمیش بیر آنتی-تورک فارسچی رئژیمینین اؤلوم سیقناللاری وورورکن، بیر کسیم آزربایجان میللی حرکاتچی سینین هله ده بو چوروموش رئژیمه اینانماسی سورمکدهدیر. آزربایجان میللی حرکاتی، م. پزشکیانین ایلک ایش گونونده قوناغی ا.هنیهنین تئرروروندان چوخلو درسلر چیخارمالیدیر. هله پزشکیانین توتو قوشو کیمی دیکتاتور ا. خامنه ای نین سؤزلرینی نقطه به نقطه تکرار ائتمهسینی دقته آلارکن.
گونئی آزربایجان میللی قورتولوش پارتیاسینین باشقانی ائلدار قاراداغلی
۲۰۲۴/۰۷/۳۱
