ایران رئژیمی نه دن زنگه‌زور دهلیزینین آچیلماسیندان قورخور؟
زنگه‌زور دهلیزی ساده بیر یول آچیلیشی دئییل، تاریخین درینلریندن گلن معنوی بیر یارانین اوستونون آچیلماسی دیر.
زنگه‌زور دالانی استراتژیک بیر بؤلگه اولاراق،
تورکیه، گونئی-قوزئی آزربایجان و تورک دونیاسی مناسبت لرینده اؤنملی یئره صاحیب دیر، بو اوزدن بؤلگه‌سل لیک دن چوخ، دونیانین گوندم قونوسو حالینه گلیب و تکجه نئچه دؤولت طرفیندن آچیلیشی دستکله‌نیر .
او خیرداجا آما استراتژیک بیر یئرده، ایرانین و دونیا گوجلرینین منفعتی اولمادیغی اوچون ، انگل اولماغا چالیشیرلار .
(ایرانین تورک دوشمنلیینی و ناتو دهلیزی -توران دهلیزی آدیلا شانتاژ آتماسی دا آیدین اولور.)
روسیه، زهرلی قونشو اولاراق بو تاریخی و استراتژیک کئچیدین ناتونون و باشقا رقیبلرین الینه کئچمه‌سیندن قورخاراق ،آچیلماسینا نظارت و کنترل ائتمک ایسته‌ییر.
.روس‌لار ۱۸۲۸ ایلده آزربایجانین ایکیه بؤلونمه‌سینده اؤنملی رول‌لاری واریدی، حتی ۱۹۴۳ ایلده تهران کنفراسیندا ،گونئی-قوزئی آزربایجانین شعرلرده و دیل‌لرده تکرار بیرلشمه پیچیلتیلاری اسناسیندا، فارسلارلا روسلارین ایش بیرلییی داهادا سیخلاشدیریلدی .
اگر اوزامان گونئی آزربایجان سوئتلر بیرلیینه (شوروی )بیرلشدیریلسیدی، بوگون ایرانین مستعمره سی دئییلدی و ایکی آزربایجان بؤلونموش میللت کیمی آنیلمیردی .
ایران رئژیمی زنگه‌زور دهلیزینی ساده جه بیر دهلیز کیمی گؤرمور، آزربایجانین بؤیومه‌سی [بوتؤو آزربایجان ]کیمی گؤرور و کئچمیش ده ائرمنیستانی بیر باسینج (تزییق) آلتی اولاراق ۳۵ میلیونلوق گونئی‌لییه بیر خوخان کیمی گؤرسه‌دیردی و دئییری آللاهیزا (فارس فاشیزمینه)شوکور ائدیب، فارسلارا بیعت ائدین و مستقیل‌لیک فیکرینی ائتمه‌یین یوخسا ائرمنی گلر سیزی ده اؤلدورر، سیزین ده تورپاقلارینیزی آزربایجان کیمی پارچالار!
آما بوگون ائرمنی تهدید آلتی ایرانین الیندن چیخیب و ایران آدلانان جغرافیادا یاشایان اسیر تورک آزربایجانلی‌لار و باشقا میللت‌لرده گؤردولر آزربایجان نه قدر ایقیدارلی و باشاریقلی دیر و ایشغالدا اولان تورپاقلارینی روس-ائرمنی دن آزاد ائتدی و گونئیی ده آزاد ائده‌بیلر.
شعوبی ایران رئژیمی بئله دوشونور، اوچونجو قاراباغ ساواشی چیخماسی اوچون ائرمنیستانی هر طورلو گوجلندیرمک لازیم دیر بلکه آزربایجان تورپاقلاری و ۴۲ کیلومترلیک زنگه‌زور داخیل اولماقلا، دهلیز تام آزربایجانین کنترولونا کئچمه سین یوخسا تورکلر ائرمنیستانی دا آزربایجانا قاتاجاقلار ( بونا راغمن ائرمنیستان ،تاریخاً آزربایجان تورپاغیدیر )،سونوندا ائرمنیستانین ضعیف‌له‌مه‌سینی و آزربایجانین گوجلنمه‌سینی ،ایران اؤزونه تهدید کیمی گؤرور و زنگه‌زور’ون آچیلماسیلا ایران، ائرمنیستانا سیلاح و مخدره یوللایا بیلمه‌یه‌جک.
16.9. 2024
گامقپ-نین میللی آراشدیرمالار باشقانی; آکین دیلمقانی
