«آذربایجان تورک میللتی»نی ایرانچیلیغا باغلاماغا چالیشانلار اوتانسین!
دونیایا اینسانلیق، باریش و دینج یاشام سونان تورکلر، دونیانی سؤمورمه‌یه چالیشانلارا سینه گر‌ن تورکلر بو گونلرده درین چیخمازدادیر. میللتیمیزین قارشی‌سیندا دایانان بوتون رئژیم وآنتی رئژیم شعوبیلر، فارسچیلار، ایرانچیلار و اونلارین یاخین-اوزاق اربابلاری بیر یانا قالسین، ساپی اؤزوموزدن اولان یئنی ارانیلر، کسرویلر، تقی‌زاده‌لر کیمی بالتالار ظهور ائتمه‌یه باشلامیشدیر.
بو یئنی تاپینتیلاردان بیری اؤزلرینی معلوم دئموکراتلارا بنزه دن (کانون دموکراسی و توسعه آزربایجان) دیر کی، تورکجه‌سی »آذربایجان دئموکراتیا و اینکیشاف مرکزی» آنلامینا گلیر. بو کسیم اؤزلرینی اصیل دئموکرات، بیلیم اینسانی، جهان وطنی، سیاست خوجاسی و بؤیوک لافلا »تام کیفیت» فرض ائد‌رک، سرخوش خولیالاریندا قورتولوشچو بیر میللتین گله جه گینی ایران‌چیلیق چمبرینده ساخلاماغا چالیشیرلار. اونلار بیله‌رکدن و یا بیلمه‌دن گونئی آزربایجانین اؤزگور، باغیمسیز گله جگی قارشی‌سیندا اینجه روحلارینی ایرانشهریلره تسلیم ائدیبلر. اونلار اوچون بوزقورد وحشی بیر جاناوار اولاراق ایرانشهری قارداشلاری قورخودور. یئنه اونلار اوچون اورمودا ۵۰۰،۰۰۰- لیک میللی میتینگده سسله‌نیلن »اورمو آزربایجان‌دیر!» »بو تورپاقدان پای اولماز، اورمو کوردوستان اولماز!» و یا »تبریز-باکی-آنکارا، بیز هارا فارسلار هارا» کیمی میللی سلوقانلارین گله‌جک دئموکراتیک ایرانین قورولماسینا اولومسوز سیقنال وئریر!
بو ذاتلار اوچون قورولان دئموکراتیک توپلانتیلاردا آنجاق فارسجا دانیشماق گرکیر. چونکی، دئموکراتیک عطریله جلالانان بو توپلانتیلارین شاه مهره‌سی فارس دیللی دئموکرات جنابلاری اولمالی و یا سایغیلی قوناقلار اوچون فارس دانیشان اینجه روحلو اینسان سئور ایران تورکلری (؟) اولمالی‌دیر. بو ذاتلارا گؤره، گونئی آزربایجانلیلار آنجاق ایندیکی رئژیمدن سونرا گلن احتیمالی دئموکراتلار بیرلیگی چاتیسی آلتیندا اؤز مد‌نی !– دوغرو بیلدینیز مد‌نی- حاقلارینی باریش یولو ایله ایسته‌مه‌لیدیر.
بو ذاتلارا گؤره، اساس هدف مؤجود ایرانی قوروماق، اونو، یعنی عزیز ایرانین (!؟) بوتونلویونه قارشی چیخان خاین، جاهل پانتورکیزمین، سپئراتیزمین و تک آنلاملا میللی قورتولوشچو ایستیقلالچیلارین چمبریندن ساغ-ساغلام قورتارماق‌دیر؟! سؤزسوز کی، بو دا اؤز یئرینده بؤیوک تاریخی بیر میللی خدمت اولاراق اونلارین آدینی بابالاری کسرویلرین آدی ایله عینی سیرادا یئرلشدیر‌جکدیر. نه اولاجاق اولسون باشدا حسن شریعتمداری کیمی مانقوردلار اولماقلا ‘کئچید یؤنتیم شوراسی’ (شورای مدیریت گذار از جمهوری اسلامی ) اونلاری دا اؤز آرالارینا آلسین! اؤرنگین اورمونون یاریم میلیونلوق آنتی تئرور و کورد گرنشمه‌سی قارشیتلی میتینگینده اینسیاتیوی اله آلان میللتچی گنجلرین بو ذاتلار طرفیندن شدتله قینانماسیدیر.
(با وجود تمام جنبه‌های مثبت تظاهرات، لازم به ذکر است که در بین جمعیت، گاها برخی شعارهای نژادپرستانه از سوی تعدادی محدود سر داده شد، که آنها را قویا محکوم می‌کنیم.)/ تورکجه‌سی: (میتینگده بوتون اولوملو بویودلارا رغمن آز سایلی کسیم طرفیندن سسله‌نیلن ایرقچی (فاشیستی) شعارلارین وئریلمه‌سینی کسینلیکله قیناییر، محکوم ائدیریک. / ستاد: اورمو میتینگیله باغلی، قورومون فارسجا یاییلان بیلدیری‌سیندن/) بو بیر حالدا اوز وئریر کی، میتینگ بیتر-بیتمز بوتون ایرانچی، شاه‌چی، ایسلامچی، کوردچو مئدیا و سیاسی قوروملار عئین هیجانلا اورمو میتینگیندن قورخویا دوشه‌رک بیر آغیزدان اونو کسکین دیلله قینامیش و هله ده دوام ائدیرلر. گؤرونن بو کی، آزربایجان میللی حرکاتینین میللتچی گنجلری طرفیندن سسله‌نیلن »تبریز-باکی-آنکارا، بیز هارا فارسلار هارا» کیمی کؤکلو سلوقانلار و گؤستریلن بوزقورد سیمگه‌سی اؤزلرینی میللی-سیاسی اؤنده رلر آدلاندیران اوره گی شوشه‌دن قیریلقان خاص وطنداشلاری دا میللتیمیزین دوشمنلری قدر چوخ اینجیدمیشدیر!
بیزه گؤره، هر هانسی قورومون ایران سئوگی‌سی اولابیلر. حتی بو سئوگی اوزوندن دریدن-قابیقدان چیخاراق ایرانچی، فارس‌چی، کوردچو سنتزیستلر کیمی بیلینن شریعتمداریلرله، مهتدیلرله، آهی لرله، براتی لرله، سازگارالارلا و بونا بنزر سیاست یورقونو اولان لوسانجلس لی، پاریس‌لی امکلیلرله یول بیر اولاراق میللتیمیزین ایستیقلال یولونا داش قویا بیلرلر. آنجاق، آزربایجان آدی ایله پوپولیست داورانیشلاردان آسیلاراق ایران‌چیلیق آماجلاری ایره لی سوره‌نلرین ایچه ریسینی ائشیگه چیخارماق دا بیز قورتولوشچولارین میللی گؤره وینه دوشمکده‌دیر. او افندیلرین یول آلدیقلاری ایران‌چیلیقدیرسا، بیزیم ده یولوموز قورد دره‌سینده (سهند ایستادیندا) سرگیلنن ۲۰ متر‌لیک اینگیلیسجه یازیلان »گونئی آزربایجان ایران دئییل!» یولودور. بیزیم بو یولدا هر هانسی قوروم-قورولوش و کیمسه ایله اؤزل سئودامیز یوخدور.
بیزیم دییشمز سئودامیز یالنیز و یالنیز بؤیوک آزربایجان تورک میللتینین اؤزگور، باغیمسیز و ایران آدلی تاریخی قوندارمالیقدان آزاد اولان میللی دؤولتینه‌دیر. بیز، آزربایجان آدی آلتیندا فارس‌چی-شعوبی موللا فاشیزمینین عمرونو پیپلی، کراواتلی پانفاشیزمیله دییشمه‌یه چالیشانلارا نفس آلدیرمایاجاییق.
دوغروکی، مئدیامیز یوخدور، پارامیز، گوجوموز، پروفئسیونال تشکیلاتلانما ایمکانلاریمیز آزدیر. آنجاق، میللت بویدا ویجدانیمیز، شرفیمیز و یوز مینلرله اؤلمه‌یه-اؤلدورمه‌یه حاضر بوزقوردلاریمیز واردیر. بو ایسه، بیزی بوتون دونیا چاپولچولاریندان، سؤمورگه‌چیلریندن اوزاق توتماغا یئتیر. بیز، ترامپی تانری قدر قودساللاشدیران، آز قالا آدینا خطبه اوخودانلارا، میللتیمیزین گوجونو هئچه سایانلارا دا بنزه میریک. بیز، سازیگارالارین، شریعتمداریلرین دیلینجه بؤیوک اولوسوموزو قوم آدلاندیرمیریق. میلیونلارجا اؤزونو آزربایجان تورک میللتی آدلاندیرانلارین گؤزونه باخا-باخا: «سیز قوم سوز، اقوام سینیز» دئیه، بؤیوک تورک میللتینی ایرانی اقوام کیمی آشاغیلامیریق. ترسینه اولو میللتیمیزین مین ایللیک دؤولتچیلیگینه دایاناراق، یئنی‌دن ایستیقلال اومودونو یوکسلتمه‌یه چالیشیریق. میللتیمیزین بؤلگه‌نین آلتین چاغینین قیزیل آچاری اولدوغونو یادینا سالیریق!
سیز، ایکیلی سیاستینیزی – اصلینده ایرانچی سیاستینیزی – سوردورون! ایران اوغرونا کنفراسلار چاغیرین. هر نه اولورسا آرخانیزدا بیر ۵-جی کالون واردیر! بیز، میللتیمیزین سؤنمز ایشیغینا، سونسوز گوجونه دایاناراق، (گونئی) آزربایجان میللی حرکاتی،نین قورتولوش یولونو آچیق ساخلاماغا چالیشاجاییق!
یاشاسین «گونئی آزربایجان تورک جومهوریتی»
گونئی آزربایجان قورتولوش پارتیاسی-
اینفورماتیک و آراش‌دیرمالار بؤلومو-
سوروم‌لو اکبر (آکین) دیلمقانی
۲۰۲۵-۰۴-۲۰
