29 مهر ۱۳۹۰ اوستاد دوکتور یحیی شیدانین ایل دؤنومو مناسبتیله قلمه آلینمیشدیر.
دوکتور یحیی شیدا بیر ادبیات خادیمی و آنادیلیمیزین سارسیلماز قالاسی ایدی. شیدا آغیر شرط لرده بیر واقعی انسان کیمی یاشادی و بوتون سیناقلاردان باشی اوجا چیخدی .
یحیی شیدا ، مرحوم حسن یوز باشی [صفی بازاریندا قصاب و پی ساتان دوکان وار ایدی ، آدلیم مشروطه چی] یحیی شیدا ۱۳۰۳ ده تبریز شهرینده چرنداب محلله سینده بیر مشروطه چی عائله ده دونیایا گلدی . یحیی شیدا ١٣٩٠ مهر آینین ٢٩ زوندا آخشام چاغی همان دوغولدوغو چرنداب محلله سینده ابدیته یورودو.
شاعیر شیدا چوخ پاک نفس و پاک داورانیش و قانع و متواضع انسان ایدی. بو کونودا دئماق اولار کی مرحوم شیدا عمرو بویو بیر نفر دن حتی بیر آجی چای دا ایچمه دی . او پاک سابقه لی ساف و دوز عمللی واصیل بیر تبریزلی ایدی ، دده باباسی الی آغزینا چاتان انسانلار ایدیلر. مرحوم اوستاد دوکتور یحیی شیدا تبریزین[ ایندی کی آدی] فردوسی( اسگی آدینی خاطیرلیا بیلمه دیم ، الله پهلوی رژیمینه لعنت ایله سین بوتون سابقه لی و اسگی آدلاریمیزی دگیشدی) اوخودو. دیپلم آلدی ، تورکو ، فارسی ، عربی، آلمانی و روس دیللرینده ماهر و بیلیجی و( اوزمان) ایدی. مرحوم یحیی شیدا ، گؤستردیغی چابالار کؤلگه سینده آذربایحان دولتی، دانشگاهی طرفیندن دکترای افتخاری مقامینا لایق گؤروندو . شیدا بیر یوخاری عائله یه منصوب و بو قدر یؤکسک و یوخاری مقام لارا و ادبی و علمی مرتبه لره مالک اولدوغونا رغما ، او قدر الی دوز انسان ایدی کی ، عمرو نون سونونا قدر حتی بیر دوچرخه سیده اولمادی ، ( عین مرحوم حاج سید اسماعیل پیمان مدیر روزنامه مهدآزادی کی ٩٠ ايل برکتلی عومروندن سونرا فوت اولان گونو حتی بیر متر مربع یئر آدینا یوخ ایدی. ) منجه مرحوم ، حاج سید اسماعیل پیمان و عینا مرحوم شیدا دده ماللارینیدا آذربایجانین دیل و کولتور و ادبیاتینا اوغروندا فداکار لیق ایله خرج ایله دیلر. اگر اوستاد شیدانین، محترم خانیمی سینین ائوی و آموزشگاه خیاطی سی اولماسایدی، مرحوم شیدا بونداندا داها آرتیق زورلوقدا یاشایاجاق ایدی، مرحوم شیدا چوخ سخرخیز و ساغلام بیر انسان ایدی، یوخو کیمی بیر خاطره لر یادیما گلیر کی بعضی گونلر سحر چاغلاری اوستاد شهریار و اوستاد اقبال السلطنه و شیدا ، چرنداب محلله سیندن یوللانیب یورویه یورویه تربیت خیاوانیندا مرحوم غلام قصاب ( عدادی) نین دوکانیدا توپلانیب “قاین آلتی” (صبحانه) ییردیلر.
مرحوم شیدا چوخ تمیز و شیک گییم و گیدیغی پالتارلار دایما اُتولو ایدی، قیافه سی دایما بوغ سوز و اوزو دایما قیرخیلی ایدی. من چوخ کیچک یاشلاریمدان، اوستاد شیدانین کناریندا مطبعه ده چالیشمیشام. شیدا مرحوم پیشه وری زامانی شاعیر لیغه باشلامیش و باشارمیشدی آدینی و شعرلرینی” شاعیرلر مجلسی” کیتابیندا باسدیرماسی باسدیرماسینا نایل اولموشودو . بو نائلیتینده عذابینی اؤلن گونه قدر مرد مردانه بدلین اؤده دی . زیندان ، تبعید ، قاچاق لیق ، ایش سیز لیق ، الی بوش لوقلاردا شیدانی سارسیلمادی. شیدا دان گونوموزه ٢٢ مين بیت فارسجا شعر و ١٨ مین بیت تورکجه شعر قالیر. ( اوستاد شهریاردان یالنیز ١٩٠٠ يوز بیت حدودوندا تورکو شعر قالیبدیر ، چونکی شهریارین مكمل تورکجه دیوانی اقتدار طرفیندن امحا اولونوبدور ) شیدا باشاردی بیر چوخ اونودولموش شاعیری یئنی دن احیا و تانیتسین، “علی اکبر حداد تبریزی ” و “سیژیم قولو” او سیرا دان دیر . اوستاد شیدا باشاردی ایلک اولاراق شهریارین تورکو شعرلرینی باسدیرسین ، (منیم اعتقادیما گؤره شهریارین تورکو شعرلرینی مکمل صورتده، اوستادیم آقای محمدعلی نقابی توپلامیشدی ، نئجه کی مرحوم میرزا علی موجوزون نادر و چاپ اولمامیش شعرلرینی توپلامیشدی، نقابی بو اثرلری ، تمناسیز مرحوم شیدانین اختیاریندا قویدو ) او اوزدن نظره گلیر کی شهریارین تورکو شعرلرینده، آقای نقابی نینده قلمینین زحمتی اونودولمامالیدیر. ( اوستاد نقابی ده اصلا آدینین آباریلماسینین فیکرینده دگیل ).
شیدانین بیر داها گؤزل ایشی ، مرحوم “بیریا”( دموکرات فرقه سینین معارف وزیری) نین تورکو شعرلرینین باسدیرماسی ایدی، “بیریا”نین گئچمیشی و آذربایجانا دؤنوشو و اقتدارین و پان فارسلارین توطئه لرینه رغما ، و حتی شیدا اؤز سابقه تاربخیسینی نظره آلمیاراق، بیر حقیقی فرقه چی کیمی تام قدرتی و سون گؤره وینی یئرینه قویوب و بیر پروانه گیبی اؤزونو اوددان اودا وئردی، و هرجور خطر و بلاني نظره آلمیاراق، تاریخی گؤروی یئرینه قویدو . اما یئنه یئتمه دی شیدانین شاهکار لاریندان بیریده، ایراندا تورک و معاصر شاعیرلرین تذکره سی ایدی . شیدانین پارلاتدیغی ادبی اولدوزلاری سایماقلا بیتمز، دوکتور شیدا ٢٢ ادبي کیتابین مولفی دیر. او ذات عالی انقلابدان سونرا، “فروغ آزادی” ، “مهدآزادی”، “عصرآزادی” درگیلرینده، بیر صفحه تورکجه دیلینده یایدی. او تورکو صفحه ده آردیسی کسیلمه دن اؤلن گونه قدر تورکجه دیلینده مقاله و شعرلر یایدی.
(بو کونودا پیمان عائله سینین فداکارلیغی اوچ نسل بویوندا تقدیره لاییق دیر منجه آذربایجان دموکرات فرقه سیندن سونرا بو درگی لرین و پیمان عائله سینین خدمت لری اونودولمامالیدیر. دوکتور شیدا یوزده دوخساندوقوز ادبی یاراتدیقلارینی بو عائله نین مادی و معنوی حمایتی آلتیندا یایمیشدی ).
دوکتور شیدا بوتون بو ادبی ایشلرینی ، شعارسیز و اؤزونو آبارتمازسیز و چوخ آلچاق کؤنول لوق ایله یایدی ، منجه آذربایجاندا شیدا او نادر انسانلاردان دیر کی آنادیلیمیزین اوغروندا ان سون نفسيته قدر فداکارلیق ایله دی، او داغ قدر یؤکسک انسان ، بیر چانقیل قدر ده اؤزونو تعریف و اؤیمه دی.
ایندی تبریزین شورای شهرینین گؤروی( وظیفه) دیر کی بو ذات عالی نین آدینا، خیاوان، کولتور مرکزی، تورکو فرهنگستان، مدرسه و دانشگاه قویوب و مجسمه سی نی شهریمیزین میدانلاریندا قالدیرسین منجه هر شاهین مجسمه سی یئخیلا بیلر ، اما هیچ مللی وحقیقی شاعر و یازارین مقامی ازیلمز ، یخیلماز ، داغی داغیلماز. او اوزدن شیدانین مقامی گونون اوجالار، یؤکسلر، کؤنوللری فتح ائدر.
روحو شاد اولسون.
بیر شعر اؤزومدن و بیر عکس دوکتور شیدادان مطبعه ایشچی لری ایله گؤسذریب، سؤزوموزه سون قویوروق.
حمید احمدزاده
اوستاد شیدانین ماتمینده
خسته قوش
ای خسته قوش قوتولدن
شیطان قوران کلک دن
خوش گون هاچاغدا گؤردون
سن گردش فلکدن
دوغما آنا دیلنده
سایسیز اثر یاراتدین
تا جان وارایدی چالدین
گئچدیم بوران کولکدن
تا جان بدنده وار دیر
قلبیم سنین یئریندیر
گئتدیکجه عشقیم آرتیر
اسگیلمیسن دیلکدن
شاد اولسا روح «شیدا»
شیدا اولار «تیلیمخان»
روحو‌بیزی اونوتماز
هئچ قایغیدان کؤمک دن
23.10.2025
١٤٠٤آبان آينين بیری استانبول
