Moskva rejiminin Azərbaycan Türklərinə qarşı son cinayətləri ilə bağlı Güney Azərbaycan Qurtuluş Partiyasının Bəyanatı
Son günlər Rusiya Federasiyasında yaşayan soydaşlarımıza qarşı həyata keçirilən sistemli təzyiqlər, kütləvi həbslər və işgəncə xəbərləri bizi dərin hiddətə və narahatlığa sürükləmişdir. Xüsusilə son iki gün ərzində iki Azərbaycan Türkünün həyatına son qoyulması artıq sadəcə repressiya deyil, etnik təmizləmə və dövlət səviyyəsində həyata keçirilən bir terror kampaniyasıdır.
Biz – Güney Azərbaycan Qurtuluş Partiyası olaraq, bu cinayətləri beynəlxalq insan haqları hüququnun, Cenevrə Konvensiyalarının və BMT nizamnaməsinin açıq-aşkar pozuntusu hesab edir və Putin rejimini qətiyyətlə qınayırıq.
Rusiya dövləti anlamalıdır ki:
• Azərbaycan Türkləri bu coğrafiyada əsrlərdir var olmuşdur və var olacaqdır.
• Zorakılıqla, qorxu ilə və ya repressiya ilə bir millətin kimliyini və varlığını susdurmaq mümkün deyil.
• Biz bu cinayətləri heç vaxt unutmur, heç zaman bağışlamır və tarix qarşısında cavabdeh tutacağımızı buradan elan edirik.
Eyni zamanda, Azərbaycan Respublikası dövlət rəhbərliyini, Türk Dövlətləri Təşkilatını və beynəlxalq insan haqları təşkilatlarını bu məsələ ilə bağlı dərhal və qətiyyətli reaksiya göstərməyə çağırırıq.
Biz Güney Azərbaycan Qurtuluş Partiyası olaraq, soydaşlarımızın hüquqları uğrunda mübarizəni, istər Güney Azərbaycanda, istərsə də Rusiyanın müxtəlif bölgələrində, siyasi, diplomatik və hüquqi cəbhədə davam etdirəcəyik.
Soydaşlarımızı qorumaq, cinayətkarların cəzalandırılmasını tələb etmək və beynəlxalq ictimaiyyəti hərəkətə keçirmək bizim vicdani və milli borcumuzdur.
Yaşasın Azərbaycan Türklərinin birliyi!
Yaşasın Güney Azərbaycanın mübariz ruhu!
Zalım rejimlər tarixin zibilliyinə atılacaq!
Güney Azərbaycan Qurtuluş Partiyası
Siyasi Departaman – BalaTürk
