گۆنئی آزربایجان تشکیلاتلارؽ‌نین امکداشلؽق شۇراسی‌نین آمبلئمی‌نین قبۇلونا دایر بَیاناتؽ
گونئی آزربایجان تشکیلاتلارؽ‌نین امکداشلؽق شۇراسی بۇ بَیاناتلا شۇرانین رسمی آمبلئمی‌نین قبۇل ائتدیگینی اعلان ائدیر. قبۇل ائدیلن آمبلئم، شۇرانین ایدئوْلوژی و مدنی کیملیگینی، ائله‌جه‌ده آزربایجان تۆرک میلتی‌نین تاریخی و میللی دگرلرینی اؤزونده توپلاییر. آمبلئمین بۆتوولوگو آزربایجان خالچا صنعتینه خاص اوْلان «ایلمک» سیمووْلوندان ایلهاملانمؽشدیر. «ایلمک» — بیرلیگی، هم‌رأیلیگی و بیر-بیرینه باغلؽ اوْلماغی سیمووْلیزه ائدیر. شکلین مرکزینده یئرلشن قؽرمیزی خطلر محض بۇ «ایلمک» سیمووْلونو تجسۆم ائتدیریر. آمبلئمین اوْرتاسینداکی دایره شۇرانین، بیرلیگین و اوْرتاق قرار ماساسؽ‌نین رمزیدیر. بۇ ماسا، عۆضو تشکیلاتلارؽن برابرلیک و قارشؽلیقلی حؤرمت پرینسیپلری اساسؽندا بیر آرایا گلدیگی پلاتفوْرمانی ایفاده ائدیر. ماسانؽ و ایلمه‌گی احاطه ائدن قؽرمیزی و ماوی خطلر، سککیز بوجاقلی اۇلدوز فوْرماسیندا ترتیب اوْلونموشدور. بۇ فوْرما هم آزربایجان بایراغؽ‌نین رمزی اوْلان اۇلدوزو، هم‌ده میلتین بیر آرادا اوْلما ایراده‌سینی تمثیل ائدیر.
آمبلئمده‌کی قؽرمیزی، یاشؽل و گؤی رنگلر، آزربایجان بایراغؽ‌نین رنگلرینی و اوْنلارین داشؽدیغی معنوی دَگرلری عکس ائتدیریر:
•گؤی — تۆرکلوگو،
•قؽرمیزی — آزادلؽق و مۆعاصیر‌لیگی،
•یاشیل — آزربایجان تۆرکلوگونون اینانج و معنوی کؤکلرینی سیمووْلیزه ائدیر.
بۇ آمبلم، گۆنئی آزربایجان تشکیلاتلارؽ‌نین امکداشلؽق شۇراسی‌نین میللی کیملیک، بیرلیک و گلجه‌گه اینام پرینسیپلرینه صادیقلیگی‌نین گؤرسل ایفاده‌سیدیر.
«گۆنئی آزربایجان تشکیلاتلارؽ‌نین امکداشلؽق شۇراسی»
۱. آزربایجان دئموْکرات فیرقه‌سی – آدف
۲. آزربایجان مرکز پارتیاسؽ – آم‌پ
۳. آزربایجان میللی دیرنیش تشکیلاتؽ – دیرنیش
۴. آزربایجان اؤیرنجی حرکاتؽ – آزوح
۵. گۆنئی آزربایجان جۆمهوریت پارتیاسؽ – آج‌پ
۶. گۆنئی آزربایجان دئموْکرات پارتیاسؽ – گآدپ
۷. گۆنئی آزربایجان ایستیفلال پارتیاسؽ – گایپ
۸. گۆنئی آزربایجان میللی دؤلت آلیانسؽ- مدا
۹. گۆنئی آزربایجان قۇرتولوش پارتیاسؽ – گآق‌پ
