آزربایجان پرئزیدنتی
جناب ایلهام علیئوه
آچیق مراجعت
جناب پرئزیدنت،
ایلک اؤنجه ایجازه وئرین، سیزی ۵۰ میلیونلوق آزربایجان تورک میللتی و دؤولتی آدیندان قازاندیغینیز دئیرلی بن زاید باریش مکافاتی ایله باغلی اورکدن تبریک ائدک.
بو گون سیز یالنیز آزربایجان رئسپوبلیکاسینین دئیل، بوتون دونیا آزربایجانلیلارینین دؤولت باشچی سی کیمی بؤیوک و تاریخی بیر مسئولیت داشییرسینیز. بو مسئولیت سیاسی سرحدلری آشاراق، اورتاق دیل، تاریخ و میللی کیملیک اساسیندا بیرلشن ۵۰ میلیون سویداشیمیزین تالعینی احاطه ائدیر.
سون ایللرده ایران ایسلام رئسپوبلیکاسی چرچیوهسینده گونئی آزربایجاندا میللی، سیاسی، اقتصادی، اجتماعی و ائکولوژی ساحهلرده سون درجه داغیدیجی بیر وضعیت فورمالاشمیشدیر. خصوصیله اورمو گؤلونون تهران حکومتی طرفیندن قصداً قورودولماسی بؤلگهمیزی درین بیر بحرانا سوروکله میشدیر. رئژیم بؤلگهنین حیات دامارلاریندان بیری اولان بو ائکوسیستمی محو ائتمیش، نتیجهده دوز فیرتینالاری اکینچیلیگه و حیواندارلیغا جدی ضرر وورموش، مینلرله یئرلی عائله مجبوری کؤچه معروض قالمیش، بؤلگهنین دموقرافیک ترکیبی نین ده یشمهسینه زمین یارادیلمیشدیر.
عینی زاماندا، بؤلگهنین طبیعی ثروتلرینین سیستملی شکیلده ایستیثمار ائدیلهرک مرکزه داشینماسی، یئرلی صنایع و کند تصروفاتینین ضعیفله دیلمهسی، اقتصادی پوتئنسیالین و اهالینین دیگر بؤلگهلره یؤنلندیریلمهسی پروسسی داوام ائتمکدهدیر. نتیجه اعتباریله بو سیاست بؤلگهنین سوسیال دایاقلارینی سارسیدیر. بونونلا یاناشی، بوشالدیلان تورپاقلارین کورد کؤچمنلرینه ساتیلماسی گلهجکده قارشیسی آلینماز اتنیک گرگینلیک ریسکینی آرتیریر. بو وضعیتین اساس مسئولیتی فارس حاکمیتی نین اوزرینه دوشور.
معلوم اولدوغو کیمی، تهران رئژیمینین سیاستی بؤلگهده ثابت لیک یاراتماق دئیل، ایداره اولونان کائوس فورمالاشدیرماقلا خاراکتریزه اولونور. سون دؤورلرده ایران داخیلینده باش وئرن کوتله وی اعتراضلار، رئپرئسسیالار و آغیر اینسان ایتکیلری وضعیتین نه قدر کریتیک اولدوغونو بیر داها گؤسترمیشدیر.
حؤرمتلی پرئزیدنت،
گونئی آزربایجان میللی حرکاتی دینج، دموکراتیک و چاغداش ده یرلره اساسلانان عموم خالق حرکاتیدیر. کوتله وی کاراکتر داشیماسینا باخمایاراق، بو حرکات بئینلخالق دستکدن محرومدور. رئپرئسسیالار و تضییقلر فونوندا میلیونلارلا سویداشیمیز یوخسوللوق، ایشسیزلیک و حقوقسوزلوق شرایطینده یاشاماغا مجبور ائدیلیر.
بو چرچیوهده اساس سوال اوندان عبارتدیر کی، ممکون سیاسی ده ییشیکلیکلر فونوندا میلیونلارلا گونئی آزربایجانلی نین تهلوکهسیزلیگی و حقوقلاری هانسی مئخانیزملرله تامین اولوناجاقدیر؟
گلهجکده باش وئره بیلهجک هومانیتار بحرانلارین قارشیسینی آلماق مقصدیله، آزربایجان دؤولتینین موجود دیپلوماتیک موناسیبتلرینه خلل گتیرمهدن، آشاغیداکی ساحهلر اوزره داها سیستملی و اینسانی دستک مخانیزملرینین فورمالاشدیریلماسینی واجیب حساب ائدیریک:
دؤولت سرحدلریندن کناردا یاشایان سویداشلار اوچون موستقیل تئلئویزییا کانالینین یارادیلماسی
گونئی آزربایجانین قرب بؤلگهلرینی تهدید ائدن سلاحلی تئررور قروپلاشمالارینین فعالیتینه رئگیونال تهلوکه پریزماسیندان یاناشیلماسی
مدهنی، تحصیل و آکادمیک علاقهلرین گئنیشلندیریلمهسی
هومانیتار و سوسیال لاییحهلرین اینکیشاف ائتدیریلمهسی
فوق العاده حاللاردا گونئی آزربایجاندان اولان سرمایه دارلارین، گنجلرین و متخصصلرین قوزئی آزربایجانا یؤنلمهسی اوچون حقوقی و پروسهدور ایمکانلارین حاضرلانماسی
سؤزسوز کی، بو مراجعت هر هانسی دؤولتین داخیلی ایشلرینه مداخیله طلبی دئیل، عینی میللتین بیر قولونون دیگر قولونا عنوانلادیغی تاریخی، معنوی و اینسانی بیر چاغیریشدیر.
حؤرمتله،
ائلدار قاراداغلی
گونئی آزربایجان قورتولوش پارتیاسینین (گاقپ) باشقانی
۲۲.۰۱.۲۰۲۶
