۱۳۸۵خورداد (۲۰۰۶ مای) حرکاتی — میلی اویانیشین دؤنوش نؤقطهسی
گونئی آزربایجان قورتولوش پارتیاسی نین بیلدیریشی (GAQP)
۲۰۰۶جی ایلین مای آییندا گونئی آزربایجانین باشدا تبریز اولماقلا بیر چوخ شهرلرینده باشلایان خالق آیاقلانماسی تاریخه «خورداد حرکاتی» اولاراق یازیلدی. بو حادثهلر یالنیز تحقیرآمیز و آشاغیلاییجی بیر کاریکاتورایا قارشی آنی رئاکسیا دئیلدی؛ بو، اون ایللرله دوام ائدن میلی آیریسئچیلیک، کیملیگ اینکاری، سیاسی باسقی و سیستملی آسیمیلاسیون سیاستلرینه قارشی آزربایجان تورک میللتینین توپلو اعتراضی ایدی.
تبریزدن یوکسهلن میلی هایقیریش قیسا زمان ایچینده اورمویا، اردبیله، زنجانا، سولدوزا، خویا، مراغایا و دیگَر تورک شهرلرینه یاییلدی. کوچهلرده یوکسهلن سسلر بوتون دونیایا بیر حقیقتی گؤستردی:
گونئی آزربایجان تورکلری اؤز میلی کیملیگینی، دیلینی و تاریخی وارلیغینی قوروماغدا قرارلیدیر.
«هارای-هارای من تورکم!» شعاری ایسه خورداد حرکاتینین سیمبولونا چئوریلرک سونراکی ایللرده گونئی آزربایجان میلی حرکاتینین کوللئکتیو یادداشیندا میلی کیملیگین آچیق و قورخوسوز ایفادهسینین تاریخی نیداسی کیمی یاشاماغا دوام ائتدی.
خورداد حرکاتینین اساس اؤزللیگی اونون میلی خصلت داشیماسی ایدی. بو آیاقلانما:
• ایران فارسچی-شعوبی سیستمینه تورک دیلینین حقوقلارینین دانیلماسینا،
• تورکلر باشدا اولماقلا غیرفارس میللتلرین میلی لیاقتینین سیستملی باسقیلارا معرض قالماسینا،
• مرکزچی و راسیست دولت سیاستلرینه قارشی آزادلیق ایرادهسینین یوکسهلشینه،
• گونئی آزربایجانین تاریخی، سیاسی، اقتصادی و اجتماعی وارلیغینین اینکار ائدیلماسینه
قارشی خالقین اؤز دیلی ایله وئردیگی آچیق میلی جاواب ایدی.
فارسچی-شعوبی ایران دولت سیستمینین سرت قارشی وئرمهسی، گئنیش حبسلر، امنیتلیک باسقیلاری و سیلاحلی مداخیلهلری آزربایجان تورک میللتینین ایرادهسینی قیرا بیلمهدی. عکسینه، خورداد حرکاتی گونئی آزربایجاندا میلی شعورون داها دا گوجلَنمهسینه و آزربایجان میلی حرکاتینین یئنی مرحلهیه داخل اولماسینا سبب اولدو.
بو آیاقلانمادان سونرا:
• آزربایجاندا، تهراندا و قاشقای بؤلگهسینده میلی اؤیرنجی حرکتری گئنیشلنمهیه باشلادی؛
• ایران ایچینده و دونیا میقیاسیندا میلی دیاسپورا تشکیلاتلانمالاری جانلاندی؛
• میلی مدیا و اینترنت شبکهلری یورد ایچینده و دیشیندا داها فعال سیاسی-مدنی خط قازاندی؛
• تورک کیملیگی اوغروندا کولتور موباریزهسی کوتلویلشرک فارسچی ایدئولوژینین قوندورما «آذری» پروژسینی جدی شکلده سارسیتدی؛
• چوخ ساییدا میلی فعالین تعقیبه معرض قالماسی ایله یئنی «اؤزونو سورگون» دالغاسی باشلادی.
خورداد حرکاتینین تاریخی حؤکمو
خورداد حرکاتی گؤستردی کی:
بیر میللتین دیلی یاساقلانابیـلر.
اؤنون فعاللاری حبس ائدیلهبیلر.
اؤنون گنجلری سورگونه مجبور ائدیلهبیلر.
آمما بیر میللتین میلی یادداشی اصلا یوخ ائدیله بیلمز.
مین ایللرله بو جغرافیایا دولتچیلیک، عدالت، اؤزگورلوک، ائشیتلیک و یئرلی دیللرین یاشاما حقی قازاندیرمیش آزربایجان تورک میللتینین میلی حافظهسینی سیلمک هئچ بیر باسقی رژیمینین گوجو داخلینده دئییلدیر.
بو گون خورداد حرکاتی یالنیز کئچمیشین بیر خاطیرهسی دئییل؛ او، گونئی آزربایجان میلی حرکاتینین چاغداش تاریخینده میلی دیرنیشین، سیاسی اویانیشین و آزادلیق ایرادهسینین یاشایان سیمبولودور.
یاشاسین گونئی آزربایجان!
یاشاسین آزربایجان تورک میللتینین آزادلیق ایرادهسی!
میلی شهیدلریمیزین خاطیرهسی اونودولماز!
گونئی آزربایجان قورتولوش پارتیاسی(GAQP)
2026-05-20
