“ایران و حزب‌الله ۲۴ ایله ۴۸ ساعات ایچینده ایسرائیله هوجوم ائده‌بیلیر”
بلینکن، گ۷ اؤلکه‌لرینین خاریجی ایشلر ناظیرلری ایله اورتا دوغودا گرگینلیگین آزالدیلماسینا قارشی “عاجیل احتیاجی اله آلماق اوزره” تلفندا دانیشدی
آمریکا بیرلشمیش دؤولتلری خاریجی ایشلر ناظیری آنتونی بلینکن، ایران و حزب‌الله‌ین ۲۴ ایله ۴۸ ساعات ایچینده ایسرائیله هوجوم ائده‌بیله‌جگینی سؤیله‌دی.
بلینکن، گ۷ اؤلکه‌لرینین خاریجی ایشلر ناظیرلری ایله تلفندا دانیشدی.
آمریکا مرکزلی اینترنت سایتی آکسیوسا دانیشان، تلفن دانیشماسی ایله باغلی معلومات صاحبی ۳ نفره گؤره، آمریکا ایران و حزب‌الله‌ین قارشیلیق وئره‌جگینه اینانیر.
گ۷ اؤلکه‌لرینین خاریجی ایشلر ناظیرلرینه ایرانین نئجه بیر قارشیلیق وئره‌جگینین نامعلوم اولدوغونو بیلدیره‌ن بلینکن، هوجوملارین تام زامانلاماسینی بیلمه‌دیکلرینی آنجاق “اؤنلرینده‌کی ۲۴ ایله ۴۸ ساعات ایچینده باشلایابیله‌جگینی” ایفاده ائتدی.
بلینکن، آمریکانین ایران و حزب‌الله‌ین هوجوملارینی ممکن اولدوغونجا محدودلاشدیرماق و آردیندان ایسرائیلین تپکیسسینی انگلله‌مک و گرگینلیگی آرتیران دؤورو قیرماق مقصدی ایله چابا صرف ائتدیگینی قئید ائتدی.
گ۷ خاریجی ایشلر ناظیرلرینی ایران، حزب‌الله و ایسرائیله اعتیداللی اولمالاری اوچون دیپلوماتیک تضییق قورماغا چاغیران بلینکن، بؤلگه‌ده‌کی آمریکا گوجلرینین ساییسینداکی آرتیشین مدافعه مقصدلی اولدوغونو ایفاده ائتدی.
آمریکا خاریجی ایشلر ناظیرلیگیندن وئریله‌ن یازیلی آچیقلامایا گؤره بلینکن، گ۷ اؤلکه‌لرینین خاریجی ایشلر ناظیرلری ایله اورتا دوغودا گرگینلیگین آزالدیلماسینا قارشی “عاجیل احتیاجی اله آلماق اوزره” تلفندا دانیشدی.
ناظیرلر، اسیرلرین سربست بوراخیلماسینی و غزه‌یه اینسانی کؤمگین چاتدیریلماسینی تامین ائد‌جک آتیش‌کسین تامین ائدیلمه‌سینه دایر چابالاری اله آلدی.
غزه‌ده تاسیس ائدیله‌جک آتیش‌کسین، ایسرائیل ایله لبنان آراسیندا “گؤی خط” اولاراق تعبیر ائدیله‌ن سرحد خطی داخیل بؤلگه‌ده باریش و ثابیتلیگین اؤنونو نئجه آچاجاغینی دانیشان ناظیرلر، “ایسرائیلین تهلوکسیزلیگینه باغلیلیقلارینی” تکرارلادی و چاتیشمانین آرتماماسی اوچون بوتون طرفلری ماکسیموم اعتیدالا چاغیردی.
بو آرادا، گ۷ اؤلکه‌لری خاریجی ایشلر ناظیرلرینین نوماییش ائتدیگی اورتاق آچیقلامادا دا، “بیز، کانادا، فرانسا، آلمانیا، ایتالیا، ژاپن، اینگیلتره، آمریکا و آوروپا بیرلیگی یوکسک نماینده‌سی اولاراق اورتا دوغودا، بؤلگه‌ده داها گئنیش بیر چاتیشمانی آلوولاندیرما تهدیدینده اولان آرتان گرگینلیک سویه‌سیندن درین قایغی دویدوغوموزو بیلدیریریک” ایفاده‌سینه یئر وئریلدی.
آچیقلامادا، هئچ بیر اؤلکه یا دا خالقین اورتا دوغودا گرگینلیگین داها دا آرتدیریلماسیندان قازانجلی چیخمایاجاغی وورغولاندی.
