آسیمیلاسیون
آسیمیلاسیون یا کولتورل بنزتمه، سیاسی گوج‌ده بولونان بیر
ائتنیک و اجتماعی گروپون انتگراسیون(ادغام) اوچون باشقا ائتنیک و اجتماعی گروپ‌لار اوزره اویغولادیغی کولتورل سیاست‌لره دئییلیر.
بو سیاست‌لرین نتیجه‌سینده سلطه‌ده بولونان گوجلو ائتنیک باشقا ائتنیک‌لری، یاسا(قانون)، جزالاندیرما، پروپاگاندا(تبلیغات)، تاریخی روایت‌لر، پسیخی باسغی(فشار روانی)، اجتماعی و اقتصادی محرومیت‌لر، قاداغا و یاساقلامالار، سیمگه‌سل(نمادین) و ذهنی آراج‌لار(ابزار) ایله اَریدیب اؤزونه بنزه‌دیر.
آسیمیلاسیون سیاستی گئنل اولاراق اوچ ائوره‌ده(مرحله) گرچکله‌شیر.
ایلک ائوره‌ده هدف آلینان ائتنیک و اجتماعی گروپون کولتورل ایچه‌رییی(محتوا، مضمون) پیسله‌نیب، دَیرسیزلشدیریلیر.
اونلارین تاریخی روایت‌لری، شخصیت‌لری، دیل و کیملیک‌لری، جغرافیالاری، اینانج و سیمگه‌لری بوتون آلان‌لاردا(ساحه) سیستماتیک شکیلده هجوما معروض قالیرلار.
بو ائوره باشاری ایله گرچکلشیرسه هدف آلینان ائتنیک اینسانلاری اؤز وارلیق و کولتورلریندن اوتاناراق وازگئچیرلر و ائتنیک‌لریندن اوزاقلاشیرلار.
تامامیله ایچدن بوشالمیش بو اینسان توپلوسو ایکینجی ائوره اوچون حاضیرلانمیش دوروما گلیرلر.
ایکینجی ائوره‌ده مسلط ائتنیک، کولتورل و ائتنیکی وارلیغیندان اوزاقلاشان ائتنیک اوچون اؤز کولتورل ماتریال‌لارینی اورتایا قویور. شیشیردیریلمیش، اویدورولموش و قوندارما روایت‌لر، شخصیت‌لر، مدنیت گؤستریسی و سیمگه‌لر، ایچیندن بوشالمیش ائتنییین اونور دویدوغو و فخر ائتدییی اوچون ان اؤنملی احتیاج‌لار ساییلیر، او اوزدن ده سرگیله‌نن کولتورل ماتریال‌لارا
اَل آتیب منیمسه‌مک قرارینا گلیرلر.
اوچونجو ائوره ده ایسه انتگراسیون کامل‌له‌شیر و هدف آلینان ائتنیک و اجتماعی گروپ سلطه اویغولاماق ایسته‌ین گوجلو ائتنیک ایچینده اَریییب اونلارا بنزه‌دیلیر.
آسیمیلاسیونا معروض قالان ائتنییین بعضی شخص‌لری داهادا ایره‌لی گئدیب اؤز میللی و ائتنیکی وارلیق‌لارینا هجوم ائدیرلر.
بو قدر ایره‌لیله‌ین شخص‌لرین آدینا مانقورد دئییلیر، اونلار مسلط ائتنییین ان قاباریق سلاح‌لاری‌دیرلار، دشمن الینده اولان رو سلاح‌لار اؤز میللی و ائتنیکی وارلیق‌لارینین باغرینا توشلانیب آتش آچیرلار…
سیامک میرزایی
