سلطه و سلطهسیزلیک
بیرچوخ دوشونورلر سلطهنی بئله تانیملاییرلار؛
الینده گوج بولوندوران طرف، گوجسوز اولان بیر طرفین ایشلرینه مداخله ائدیر، اونون یئرینه قرارلار وئریر و اونون عوضینه سئچیم یاپیر.
همده بو مداخله، قرارلار و سئچیملر گوجسوز اولان طرفین دئییل گوجلو اولان طرفین منفعتلرینی ساغلاییر.
بئله بیر ایلیشکییه سلطه دئییلمکدهدیر.
سلطه ایلیشکیسینی ارباب-کؤله ایلیشکیسی ایله آچیقلاماق اولار.
ارباب گوج واسطهسی ایله کؤلهنی ایشلهدیر، اونون ایشلرینه مداخله ائدیر و اونون قرار، سئچیم یاپماغینا هئچ بیر اذن و اختیار وئرمهییر.
بو ایلیشگی سورهجی سوردوکجه کؤله ذهنینین یئتکینسیزلییینه ایناناراق اؤزونو آشاغی سانیر و روحو آلچالیر.
بو دورومون ندنی ایله کؤله اؤزونو بوش و اؤنمسیز یارادیق اولاراق آلقیلاییر.
؛الیندن هئچ بیر ایش گلمهین، هئچ بیر باجاریغی اولمایان، ذهنی باخیمدان گئریده قالان بیر کؤله، ارباب و آغانین اختیاریندا اولدوغونا و اونونلا اولان ایلیشکی سایهسینده یاشادیغی اوچون ممنون بیله اولوب سئوینیر ده؛
او آنلامیرکی اونو بئله بیر آشاغی دوروما گتیرن، گلیشمهسینی انگللهین ائتکن(عامل) ائله او اربابین وارلیغیدیر.
ارباب واردیرسا کؤلهده اولمالیدیر و یا کؤله واردیرسادا اربابدا اولمالیدیر.
اؤزگورلوک ایسه سلطهسیز بیر ایلیشگی ایله گرچکلهشیر.
اؤزگور اینسان اؤز عاغلینا و اختیارینا دایاناراق قارشیسیندا هئچ بیر انگل اولمادان ایستک و قرارینی وئرن اینسانا دئییلیر.
اؤزگورلوک اینسانلاری گوجلندیریر، گلیشدیریر و آیدینلیغا ساری گؤتورور.
اؤزگورلوک، اینسانلاری باشقالارینین ائتگی، مداخله و سلطهسیندن قورتارماق و اؤز اختیاراتلارینی اللرینه آلماق دئمکدیر،
اؤزگورلوک ایله اینسانلارین ذهنلرینی بؤیویور، یئتهنکلرینی سرگیلهنیر، روحلاری یوکسهلیر، او اوزدن ده اؤزلرینی اؤنملی و یارارلی یارادیق بیلیرلر و بیر سؤزله گلیشهرک، گرچک اؤزلری(خودواقعی) اورتایا چیخیر.
میللی سلطه ده ایسه بو دوروم داهادا بؤیویوب گئنیشلهنیر، نییهکی بیر میللتین سلطهسی سؤز قونوسو اولور.
سلطه آلتیندا یاشایان میللت اختیار و یئتکیدن یوخسون بیر میللتدیر، اونون میللی کؤلهلییی سلطه اویغولایان میللتین منفعت و ایدولوگییاسینی ساغلاماقدادیر، او اوزدن ده میللی و اینسانی وارلیغی سلطه آلتیندا ازیلیب یوخ ائدیلمکدهدیر.
سلطهنین آرادان گئتمهسی اوچون ایلک اولاراق هر طرفین گوجلنمهسی گرهکیر، گوج یالنیز بیر طرفده اولورسا ایستر-ایستهمز سلطهنین یاشاماسی دئمکدیر، ایکینجیسی اولاراق ائشیت حقوقو یانسیدان یاسالارین یازیلیب اویغولانماسی ایله گرچکلهشیر، یاسالار بیر طرفین اختیار، گوج و هگمونییاسینی ساغلادیقجا سلطهده داوام ائدر، و اوچونجوسو ایسه اؤزگورلویون دوغرولماسی ایله گرچکلهشیر.
اؤزگورلوک یاراندیقدا اینسانلار باشقالارین ائتگی، مداخله و کؤلهلیییندن قورتاریب اؤز اختیار و یئتکیلری ایله دوشونجه و ائیلملرینی عاغیلا و حقوقلارا دایاناراق سوردوره بیلیرلر.
سیامک میرزایی
