(گونئی)
آزربایجان میللی حرکاتی اوزره اورتاق یول خریته‌سی
گونئی آزربایجان قورتولوش پارتیاسی (گاقپ) دؤولت پروگرامیندان آلینمیش تاسلاقدیر.
ائدیتؤر: ائلدار قاراداغلی
گونئی آزربایجانین اورتاق یول خریته‌سی اونون سیاسی، اقتصادی، مدنی و سوسیال آسپئکتلرینی احاطه ائد‌ن اوزون مودتلی بیر ایستراتئگیا ایله معین اولونمالی‌دیر. بو یول خریته‌سی آشاغیداکی اساس ایستیقامتلرده ترتیب ائدیله بیلر:
۱. اورتاق سیاسی یول خریته‌سی:
– گونئی آزربایجانین میللی کیملیگینین و اولوسال حاقلارینین تانینماسی: گونئی آزربایجان تورکلرینین آنا دیلینین ائگیتیمی، سیاسی، اقتصادی، مدنی و جغرافی وارلیغینین رسمیلشمه‌سی.
– میللی سیاسی تشکیلاتلانما اؤزگورلویو: گونئی آزربایجاندا میللی تشکیلاتلارین یارانماسی اؤلکه‌نین رسمی یاسالاریندا قئیده آلینمالیدیر.
– اولوسلاراراسی ایلیشکیلرده اؤزگورلوک: گونئی آزربایجاندا فعالیت گؤستر‌ن تشکیلاتلارین اولوسلاراراسی ایلیشکیلری مرکزی دؤولت انگلیندن آزاد اولمالیدیر.
– مستقیل‌لیک، فئدرالیزم و اؤزرکلیک: گونئی آزربایجانین گله‌جک دؤولت قورولوشونون نئجه لیگینی ایستراتژیک گلیشمه‌لر بللی ائده‌جکدیر.«آزادلیق-عدالت-میللی حکومت»شوعاری آلتیندا توپلاشان میللی سیاسی تشکیلاتلارین موستقیل‌لیک، فئدرالیزم و اؤزرکلیک اوزرینده شکیللنن دونیا گؤروشلری سایغی چرچوو‌سینده قبول ائدیلمه‌لیدیر.
۲. اورتاق اقتصادی یول خریته‌سی:
– گونئیین یئرآلتی-یئراوستو وارلیغینین بؤلگه‌دن چیخماماسی گرکیر: گونئی آزربایجانین ائکونومی قالخینماسینین ان تمل یاتیریمی یوردون دؤرد یانیندا وار اولان معد‌نلر مؤوجوددور. بو سینیرسیز ثروتین میللی ائکونومیه قاتقیسی ایچ و دیش یاتیریملارین جلب ائدیلمه‌سی ایله مومکوندور.
– تورکیه و آزربایجان جومهوریتلریله ایستراتئژیک ائکونومی امکداشلیغی: گونئیین برکتلی تورپاقلارینین بارلانماسی، تیجارت و ائنرژی ساحه‌سینین اینکیشافی اوچون تورکیه و آزربایجان جومهوریتلریله اوزون سوره‌لی ایستراتئژیک امکداشلیق اولمالیدیر.
– تهراندان باغیمسیز ائکونومیک مدل: تهرانین آزربایجانا قارشی اقتصادی باسقیسینا سون وئرمک گرکیر. بو ایسه، یئرلی بورژوا گوجونون آرتیریلماسی، اورتا صنایع، مودئرن کند اورتکن لیگین و آزاد تیجارتین گئنیشلنمه‌سیله اولاسی‌دیر.
۳. اورتاق میللی کیملیک یول خریته‌سی:
۳.۱. دیل و ائیتیم؛
– تورک دیلینده ائیتیم حاقلارینین قازانماسی اوچون بوتون میللی قوروم و شخصیتلرله بیرگه مباریزه.
– آنا دیللی اوشاق ائولرینین، اوخوللارین و بیلیم یوردلارینین آچیلماسی اوچون دیلچی، فئدرالچی، ایستیقلالچی قوروملار و بیرئی میللی داواداشلارین بیرگه امکداشلیغی اولمالیدیر.
-تورک دیلینین قوْرونماسی، چیچکلنمه‌سی و یایغینلاشماسی اوچون گیزلی، آنلاین و آچیق ائیتیم ایمکانلاری گئنیشلنمه‌لی‌دیر.
۳.۲. مدنیتین و میللی کیملیگین گوجلندیریلمه‌سی
– آزربایجان تورکلرینین تاریخینی، کولتورونو، میللی کیملیگینی تانیتماق یؤنونده کوتله سل پرویئکتلر اورتایا قویولمالی‌دیر.
– تورک دیللی مئدیا چالیشمالارینین سورکلی بؤیومه‌سی ساغلانمالی‌دیر.
– کولتورل ائتکینلیکلرین (سینئما، تئاتیر، اوپئرا، اسپور وب.) گئنیشلنمه‌سیله باغلی گوند‌م یارادیلمالی‌دیر.
– یاخین دیاسپورا (ایران ایچینده یاشایان قاشقای، خلج، خوراسان تورکلری کیمی دیلداشلار.) و اوزاق دیاسپورانین (ایران دیشیندا یاشایان سویداشلار.) اؤرگوتلنمه‌سی و گوجلنمه‌سی.
۴. سوسیال و اینسان حاقلاری یول خریته‌سی:
– اینسان حاقلارینین ساوونماسی: میللی سیاسی توتوقلولارین اؤزگورلویو اوغروندا ایلگیلی اورقانلارا مراجعت ائدیلمه‌لیدیر.
– گونئی آزربایجان داواسیندا قادین و گنجلرین ائتکیسی نین آرتیریلماسی: آ م ح-نین یؤنه تیلمه‌سینده، سوسیال اینکیشافیندا قادین و گنجلیک گوجونون ائتکینلشمه‌سی ساغلانمالی‌دیر.
– دئموکراتیک تمللرین گوجلنمه‌سی: توپلوم ایچینده اؤز وئرینین و قارشیلیقلی سایغینین دئموکراتیک تمللر اوزرینده یاییلماسی گونئیین گله‌جک دؤولت یاپی‌سیندا بؤیوک رول اوینایاجاقدیر. گون اعتباریله آمح ایچینده بو گلیشیمی یایغینلاشدیرماق گرکیر.
۵. اورتاق دیپلماتیک یول خریته‌سی:
– آزربایجان رئسپوبلیکاسی ایله سورکلی کووردیناسیا درینلشمه‌سینین ساغلانماسی.
– تورکیه جومهوریتی ایله گئنیش آلانلی ارتباتدا اولماق.
– تورک دؤولتلری ایچینده گونئیین تانیتیمی اوچون دیاسپورا گوجونو آرتیرماق.
– بؤلگه‌میز عرب-ایسلام ایدئولوژیسی ایله بزنمیش تئرور باسقیلارینا اویغون بؤلگه‌دیر. بو بؤلگه‌ده آیاقدا قالماق اوچون چئشیدلی دؤولت یاپیلانمالاری ایله نورمال دیپلوماتیک ایلیشکیلر گره کیر.
– تانیق اولدوغوموز ایمپریال دستکلی تئرور قروپلارینین بؤلگه‌ده کائوس یاراتما چابالاری گوندن-گونه چوخالیر. سؤزسوز کی، آمح بیر میللی سیاسی و چاغداش حرکات اولاراق هر تورلو تئرور آکتی و آکتیولیکله ضیدیر.
– یوخاریدا سادالانمیش تئرور اَسینتیلری گونئی آزربایجانین دا گونده‌مینه کؤلگه سالان فاکتا چئویرمیشدیر. بو اوزد‌ن آزربایجان میللی حرکاتی هر نه قدر ده سیویل حرکات اولارسا بئله، باتی آزربایجانی گلمه تئرور قروپلارینین شرریندن قوْروماق اوچون گرکن «مشروع مدافعه» حاقینا مالیکدیر.
۵.۱. آوروپا بیرلیگی، آبش و بمت ایلیشکیلری؛
– گونئی آزربایجانین میللی-سیاسی موجادیله‌سی آوروپا بیرلیگی، آبش و بمت کریدورلاریندا گوند‌م اولمالیدیر.
– گونئی آزربایجان اوچون گوند‌م یاراتماق دیاسپورا و لوبیچی‌لیک فعالیتی طلب ائدیر.
– گونئی آزربایجان و بوتؤو آزربایجانی دونیا چاپیندا تانیدان “دونیا آزربایجانلیلاری کنگره سی” (داک) کیمی دیاسپورا تشکیلاتلارین یئنیدن نَفسلنمه‌سی گرکیر.
