۱. گونئی آزربایجان میللی قورتولوش حرکاتینین (بوندان سونرا میللی قورتولوش و یا گامقح) گئنل پرینسیپلری
۱.۱.آ.«گونئی آزربایجان میللی قورتولوش حرکاتی»–میللی قورتولوش، اینگیلیسجه‌سی ایله «South Azerbaijan National Liberation Movement »– میللی قورتولوش، آزربایجانین گونئی نین میللی قورتولوشو و آزربایجان تورک جومهوریتی نین یارانماسینی، قوزئی آزربایجان دؤولتی نین داها دا درینلشمه‌سینی، آزربایجانین یئنیدن بوتؤولشمه‌سینی، ایشغالچی گوجلرین ایشتیراکی ایله ایشغال اولونموش تورپاقلاریمیزین آزادلیغینی، معاصیرلیگینی، باغیمسیز، دئموکراتیک، حقوقی دؤولتینین یاراتماسینی اؤزونون اساس مقصدی حساب ائد‌رک، تورک میللتچیلرینی اؤز سیرالاریندا بیرلشدیرمه‌یه چالیشیر.
۱.۱.ب.«گونئی آزربایجان میللی قورتولوش حرکاتی» لوقوسونون آچیقلاماسی:
– یئر کوره‌سینده تورکلویون سیمگه بویاسی اولان گؤی سینیرلاری ایچینده آنا تورکجه‌میزده و اینگیلیسجه‌ده یازیلان آدیمیز.
– دؤولت بایراغیمیزی تمثیل ائد‌ن گؤی، قیرمیزی، یاشیل بویالاری.
– دؤولت بایراغیمیزین سینیرلاری ایچینده یئرلشه‌ن ساوالان-آراز و بوتؤو آزربایجان سیمگه‌سی اولان آراز چایی اوزرینده‌کی خدافرین کؤرپوسو.
– ساوالان-آراز اورتاسیندا ۱۰۰ مین‌لیک تبریز سهند ایستادیونون‌دا سرگیلنه‌ن اینگیلیسزه «South Azerbaijan İs Not İran!» تابلوسو.
۱.۲. میللی قورتولوش، دونیانین هاراسیندا یاشاماسیندان آسیلی اولمایاراق هر بیر آزربایجان تورکونو و تورک سویداشلارینی گونئی آزربایجانین میللی قورتولوشو و ایستیقلالی اوغروندا بیرلشمه‌گه چاغیریر.
۱.۳. میللی قورتولوش، قوزئی آزربایجاندا گئدن دئموکراتیکلشمه جهدلرینی «آزربایجان میللی حرکاتی»ندان آیری توتماییر، رئسپوبلیکامیزین گوجله‌نمه‌سی، دئموکراتیکلشمه‌سی و چاغداشلاشماسی اوغروندا ایشتیراک ائتمه گی اؤزونون واز کئچیریلمز حاقی حساب ائدیر.
۱.۴. دونیانین هاراسیندا آزربایجانلی وارسا، میللی قورتولوش اورادا تشکیلاتلانما ایشلری آپاریر.
۱.۵. میللی قورتولوش حرکاتینین نظامنامه‌سینی قبول ائد‌ن، گونئین میللی قورتولوشو یولوندا مبارزه آپارماق ایسته‌ین هرکسین، آزاد، دئموکراتیک تمللر اوزرینده قورومدا اویه لیگی سربست دیر.
۱.۶. میللی قورتولوش، اولوسلاراراسی حقوق و قانونلارا اویغون اولاراق فعالیت گؤستریر.
۱.۷. میللی قورتولوشون مالیه لشمه‌سی اعانه‌لر، همچینین حرکاتین قانونلا ایمکان وئره‌ن فعالیتی حسابینا آپاریلاجاق.
۲. میللی قورتولوشون مقصدی
۲.۱. دونیانین چئشیدلی اؤلکه‌لرینه سپه لنمیش آزربایجان تورکلرینی بوتؤولشمه و دؤولتلشمه اوغوروند‌ا تشکیلاتلاند‌یرماق، قافقازلاردان، زاقروسلارا چکیله‌ن آزربایجان یایلاسینین تک بیر یورد اولماسینین حقیقتلرینی علمی یوللارلا گوند‌مه گتیرمک، میللی قورتولوشون اساس مقصدی‌دیر.
۲.۲. آزربایجان تورک میللتینین بوتؤولشمه‌سینین و قورتولوشونون دوشمنلری اولان روس و فارس راسیزمینی دایانمادان آچیقجا تانیتماق، تورک میلیتچیلیگینین اساس گؤره وید‌یر. بو باخیمدان میللی قورتولوش اولاراق، گنجلییمیزین معاصر تحصیل آلماسینی واجیب حساب ائدیر .
۲.۳. آزربایجاندا اؤنجوللوک و چاغداشلیق شرطی دئموکراسی‌دیر. میللی قورتولوشون باشلیجا چابالاریندان بیری اینسان قافاسینین ایستیثمارینا و اونون کؤتو یؤنلند‌یرمه‌سینه سون وئرمکد‌یر. دئموکراتیکلشمه‌نین ان باش دوشمه‌نی تک آداملیق ذهنیت‌دیر. ایستر حقوقی، ایسترسه ده حقیقی باخیمدان، تک آدام یؤنتم ذهنیتی چاغداش اینسانلیقلا یاخیندان-اوزاقدان علاقه‌سی یوخدور. میللی قورتولوش، بیر میللی-سیاسی قوروم اولاراق دئموکراسی یولونو کسن تک آداملیق یؤنتملرین بوتون تورلرینه قارشی‌دیر.
۲.۴. اؤلکه‌ده اولوسال دوشونجه اویرتیمیله مشغول اولان مرکزلرین ان اؤنجول و مودئرن تئکنولوژیه ییه لنمه‌سی شرط‌دیر. بوتؤو آزربایجان ایدئیاسی ایله گونئین میللی قورتولوش حرکاتینا یؤن وئر‌ن کیچیک چاپلی ائیتیم تیملرینین یارانماسی بؤیوک اوغوردور. باغیمسیز آزربایجان یورداشی، دئموکراسینین، اینسان حاقلارینین، اؤزگورلویون، لایک لیگین ائیتیمینی میللی قورتولوش موجادیله‌سینین سورجیندن اؤیره‌نمه‌لیدیر. چونکی، بو گونون اؤیرنجی‌سی کسینلیکله اؤزگور گونئی آزربایجان تورک دؤولتینین اؤیرتمه‌نی، یؤنتیجی‌سی اولاجاق‌دیر.
۲.۵. گونئی آزربایجان تورک دؤولتینین یارانماسی، بوتؤو آزربایجان دؤولتچیلیگی نین دانیلماز اؤن شرطی‌دیر. «بوتؤو میللت، بوتؤو وطن یولو گونئین قورتولوشوندان کئچر!» آنجاق، گونئین قورتولوشوندان سونرا، تورک دونیاسینین قودسال اولکولری گرچک لیک تاپار!
۲.۶. قاراباغین ایشغالی وطنین ایشغالی دئمک‌دیر. بو اولوسال یارانین سونلانماسی اولوسال ساواشدان کئچر! ساواش ایسه، اولوسال اینانجا باغلی اولان قورخماز لیدئرلیک ایستر. قوزئی آزربایجان دؤولتی، اقتداری و موخالیفتی ایله تک یوموروق اولاراق، میللتیمیزین قهر‌مان اوردوسونا اینانیر! بو اینانج، آزربایجان اوچون ۵۰۰ ایللیک سورکلی یئنیلگی لردن سونرا ایلک اولوسال ظفری قازاندیردی. ۴۴ گونلوک ۲-جی قاراباغ ساواشیندا آزربایجان-تورکیه قارداشلیغی میللتیمیزین قورتولوشو یولونداکی اینانجینی اولکوسل لشدیردی. میللی قورتولوشون اولکویه اینانجی قاراباغدا عینیله سرگیلندی. همین اولکوسل اینانج یولبای لیغیندا کسینلیکله ۳-جو قاراباغ ظفریله گونئین میللی قورتولوشو آز بیر زامان ایچینده گرچک لیک قازاناجاقدیر.
۲.۷. چاغداشلیغین ان اؤنملی اؤن شرطلریندن بیری اولان لاتین الیفباسی، عئین زاماندا چاغداش تورک اؤلکه‌لرینین اورتاق یازی سیستئمی کیمی گئنیشله‌نمکده‌دیر. روس کیریل الیفباسی ایله عرب و فارس قاپساملی ایسلام گرافیکلرینین تورک دونیاسینین بیرلیگینه ووردوقلاری ضربه گون کیمی آیدیندیر. چاغداش دوشونجه‌نین گله‌جک نسیللره اؤتورولمه‌سی، اؤلکه‌نین گئری قافالیقدان قورتولوشو دئمک‌دیر. لاتین الیفباسی بو یولون شاه داماری‌دیر. لاتین گرافیکالی تورک دیلینین آزربایجانداکی رولو، اؤلمز اسماعیل کاسپرالینین «دیلده، دوشده، ایشده بیرلیک» دئویزیله اساس اؤلچودور.
۲.۸. گونئیین کسکین میللی قورتولوشو، قوزئیین ایسه دئموکراسی ایلکه‌لری عضولرینده ایر‌لیله‌مه‌سی میللی قورتولوشون وازکئچیریلمز یول خریته‌سی‌دیر. بونا گؤره، باغیمسیز مئدیایا، اؤزگور ایلتیشیم گوجونه یئتیشمک اوچون نئچه دیللی بیلگی پایلاشیم تکنولوژی‌سینه، چئشیدلی بیلگی قایناقلارینا ییه‌لنمک گرکیر. میللی قورتولوشا گؤره، گونئی-قوزئی آیرینتیسی اولمادان آزربایجان مئدیاسینین یؤنتیجی مرکزی اولمالی و بو مرکزین تورکیه و تورک توپلولوقلاری ایله ایچ-ایچه چالیشماسی گرکیر.
۳. میللی قورتولوشدا اویه‌لیک
۳.۱. میللی قورتولوشدا اویه‌لیک کؤنوللو، ایراده‌لی و شخصی‌دیر. میللی قورتولوشا اویه‌لیک شرطی قوروم ایلکه‌لرینی، دوزویونو قبول ائتمکله و اویه‌لیک حاقی اؤد‌مکله‌دیر.
۳.۲. آزربایجانین گونئیی نین قورتولوش ساواشیندا ایشتیراک ائتمیی قبول ائد‌ن، قاراباغ باشدا اولماقلا، دربندین، بورچالی نین، گؤیچه-زنگزورون، آستارانین، اراکین، آکباتانین ایشغال‌دان قورتولوشونا اینانان، ۵۰ میلیونلوق آزربایجان تورک میللتی نین شرفینی، لیاقتینی، اوجا توتان هر بیر تورک و آزربایجانلی شخصین دینیندن، دیلیندن، سویوندان آسیلی اولمایاراق میللی قورتولوشدا عضو اولماسی مانعسیزدیر.
۳.۳. میللی قورتولوشون چالیشما دینامیکاسی بؤلگه‌لر اوزره اویغونلاشیر. اؤزگور اؤلکه‌لرده، قوزئی آزربایجاندا، تورکیه‌ده عضولرین آچیق و یاریم آچیق چالیشماسی مانعسیز اولسا دا، گونئی آزربایجان‌ده و ایشغال اولونموش باشقا یئرلریمیزده اویه‌لیک تک آنلامی ایله گیزلی‌لیک ایلکه‌سینه دایانیر.
۳.۴. میللی قورتولوشدا اویه‌لیک ایلقارلا، سیرداشلیقلا، اؤزوئری ایله اؤلچولور. دوشمنلرله گیزلی ایلیشکی قورماق، قورومون ایچ پایلاشیملارینی، ساخلارینی دیشارییا سیزدیرماق میللی دویارسیزلیق و سرت توتومویلا خیانت‌دیر. بئله دوروملاردا دویارسیزلیق عاملی دنتیم قورولو طرفیندن سورغولانیر، دویارسیزلیغین سورمه‌سیله قورومدان اوزاقلاشیریلاراق ایفشا اولونور.
۳.۵. میللی قورتولوشدا سیرادان خطالارین قارشی‌لیغی، ایلک اویاری، یازیلی اویاری، کئچیجی اوزاقلاشدیرما، کسکین اوزاقلاشدیرما کیمی جزالار اویغولانیر. قرارا قارشی دورماق جزالی عضوونون دئموکراتیک حاقی‌دیر. یؤنتیم بو باغلامدا شخصین یئنیدن دینلنیلمه‌سینی ساغلامالی، جزانی گؤزدن کئچیرمه‌لیدیر.
۳.۶. میللی قورتولوش‌دان اوزاقلاشماق هر اویه‌نین شخصی حاقی‌دیر. نورمال دورومدا قورومدان اوزاقلاشماق، یالنیز عضوون اؤلومونه باغلی‌دیر.
۳.۷. میللی قورتولوش عضولرینین یؤنتیم اورگانلارینا یوکسلمه شانسی آزاددیر، عضو، ایشلرین گئدیشاتیندا نظارت ائدیب، تکلیف و شکایت وئرمه حاقینا مالیکدیر. یؤنتیم قورولونا بیر باشا عریضه ایله مراجعت ائدر، قورومون ایش پلانلارینی موذاکیره ائده بیلر.
۳.۸. میللی قورتولوش، گرکن یئرده عضووندن آکتیو اولماسینی ایسته ر. قورومون چالیشمالاریندا، کوتلوی آکتلاردا، توپلانتیلاریندا آکتیولیک ائتمک، قوروما، سوروملولارا باغلی قالماق عضوونون اؤنملی گؤره ولریندن ساییلیر. یؤنتیم ایزنی اولمادان، عضوونون قوروم آدینا رسمی یئرلرده چیخیش ائتمه‌سی دوغرو دئیلدیر.
۳.۹. اولوسال اخلاق، آزربایجان میللی حرکاتینین آنلامی‌دیر. آزربایجان میللی حرکاتینین بؤیوک چاتی‌سی آلتیندا آنلام داشییان میللی اخلاق، میللی قورتولوشون دا، ان اؤنملی ایلکه‌سی ساییلیر. بونا گؤره، قوروم عضولرینین میللی اخلاق سینیری میللی قورتولوشدا تانیملانان جیزگیلری آشمامالی، تورک اخلاقچیلیغیندا سینیرلی قالمالیدیر.
۴. میللی قورتولوشون قورولتایی
۴.۱. قورولتای، میللی قورتولوشون یوکسک اورگانی‌دیر. نورمال شرطلر ایچینده ایکی ایللیک، باسقیلی زامانلاردا ایسه اولان اوستو قورولتای و یا یئتکیلی اوست دوزئیلی توپلانتی، قورومو الینده توتان اورگان سایلیر.
۴.۲. قورولتای سئچیلمیش عضولرین ایشتیراکی ایله کئچیریلیر. یاشادیغی یئردن آسیلی اولمایاراق سئچیلمیش عضو قورولتایدا ایشتیراک ائتمه حاقینی قازانیر.
۴.۳. ایلکه‌لر، اولکولر، دؤولت‌چیلیک پروقرامی، دوزوک، سیمگه‌لر، آنا بلگه‌لر قورولتایدا قبول اولونور. قورولتای، میللی قورتولوشون یؤنتیم قورولونو سئچیر، قورومون اورگانلارینی اولوشدورور، گؤره و وئریر و یئتکیلی شخصلردن حسابات ایسته ییر.
۴.۴. ایکی قورولتای آراسی میللی قورتولوشون یؤنتیلمه‌سینین سوروملوسو قورولتایدا سئچیلن یؤنتیم قورولودور.
۴.۵. اولان اوستو قورولتایلارین کئچیریلمه‌سی اوچ دورومدا گرچکلشیر: آ» باشقانین ایستگی و یؤنه تیم قورولونون %۵۱ اونایی ایله، ب» یؤنه تیم قورولونون-نین %۷۵ ایسته گیله، ج» مانداتلی عضوولرین %۵۱-سس چوخونلوغو ایله.
۴.۶. دؤوره آراسی یؤنتیم قورولونون گرکجه‌سیله ایشه آلینان عضوولرین رسمیلشمه‌سی ایلک قورولتایین اونایی ایله تاماملانیر.
۴.۷. میللی قورتولوشون قاپادیلماسی، قورولتایین ۲/۳ سس چوخلوغو ایله گرچکلشه بیلر.
۴.۸. قاپانیش قورولتایینین و رسمی پروسئدورونون کئچیریلمه‌سی اوچون ۳ نفرلیک «وکالت هئیتی» یارانیر.
۵. میللی قورتولوشون یؤنَتیم قورولو
۵.۱. یؤنَتیم قورولو، قورولتایدا سئچیلیر و ایکی قورولتای آراسی میللی قورتولوشون پروقیرامی و دوزویو قارشیسیندا سوروملولوق داشییر.
۵.۲. یؤنتیم قورولونون میللی قورتولوشون گوندمی ایله باغلی گرکلی بؤلوملر یارادیر. یارادیلان بؤلوملرین تصدیقینی نؤوبتی قورولتایا سونور.
۵.۳. یؤنتیم قورولونون ان آزیندان آیدا ایکی اوتوروم یاپیر. قورومون توپلانتی سیستمی جانلی و یا اینترنت آراجیلیغی ایله گرچکلنیر.
۵.۴. یؤنه تیم قورولونون توپلانتیلاری ساده سس چوخلوغو ایله رسمیلشیر.
۵.۵. یؤنه تیم قورولونون خطالی عضوونون موذاکیره‌سینی و یا عضولویونون دوندورولماسینی ساده سس چوخلوغو ایله ماسایا اوتوردور. آنجاق خطالی عضوون قورومدان کسین اوزاقلاشدیریلماسی قورولتایین اونایینا باغلی‌دیر.
۶. میللی قورتولوشون بؤلگه سل تشکیلاتلاری
۶.۱. گامقح، گوجو چاتان هر هانسی بؤلگه، اؤلکه و شهرده اؤز بؤلوملرینی یارادا بیلر. بو بؤلوملر میللی، سیاسی، کولتورل و گرکن چئشیدلی فورمالاردا فعالیت گؤستره بیلر.
۶.۲. اؤلکه‌دن اؤلکه‌یه دییشه‌ن چئشیدلی بؤلوملر «بؤلگه بؤلومو» آدی ایله یارانیر. بؤلمه باشچیسی ایسه «بؤلگه باشقانی» عنوانی ایله سسلنیر. اؤرنک: آلمانیا بؤلگه باشقانی.
۶.۳. بؤلگه باشقانی، میللی قورتولوش اؤرگودلندیرمه (تشکیلات) بؤلومو آراجیلیغی ایله یؤنه تیم قورولونونا باغلانیر. اؤرگودلندیرمه بؤلومو باشچی‌سینین ایسته گی و یؤنه تیم قورولونون اونایی ایله میللی قورتولوش یؤنه تیم قورولونون عضوو سئچیلیر.
۶.۴. «بؤلگه بؤلومو» میللی قورتولوشون دوزویونه صادق قالاراق، اؤزوملو و بؤلگه‌یه اویغون دوزنله نیر.
۶.۵. «بؤلگه بؤلومو» تشکیلاتلارینین توپلانتی‌سی آیدا ان آزیندان بیر کره اولماق اوزره کئچیریلیر.
۶.۶. «بؤلگه بؤلوملری» توپلانتی‌سی هر اوچ آیدا ان آزیندان بیر کره کئچیریلیر. توپلانتیا تشکیلات باشچیسی ایله یانی-سیرا «بؤلگه باشقانی» ایشتیراک ائدیر.
۶.۷. گامقح-نین آزربایجان و تورکیه جومهوریتلرینده‌کی بؤلوملرینین اولوشومو ۶.جی مادده دن اؤزگوندور.
آ.۶. گامقح-نین آزربایجان و تورکیه جومهوریتلرینده‌کی تشکیلات بؤلوملری
۱.آ.۶. گامقح-نین آزربایجان و تورکیه بؤلوملری یئره ل دوروما اویغون قورومساللاشیر، باشقان کاتیب‌لیگیله گامقح باشقانینا باغلانیر.
۲.آ.۶. آزربایجان و تورکیه دؤولت وارلیغی تورک دونیاسی کیمی گامقح-نین ده قیرمیزی جیزگی‌سیدیر. گامقح-نین آزربایجان و تورکیه بؤلمه‌لری بو اؤزل لیگین دیشینا چیخمامالی‌دیر.
۳.آ.۶. آزربایجان و تورکیه دؤولتلرینین ایچ و دیش سیاستی گامقح-نین باغیمسیزلیغینی اؤز ائتکیسی آلتینا آلمامالیدیر.
۴.آ.۶. گامقح-نین آزربایجان و تورکیه بؤلوملری ایکی جومهوریتیمیزین اقتداری و مخالیفتی ایله عئین دوستلوق، قارداشلیق و امکداشلیق ایچینده سیاست یورودور.
۵.آ.۶. گامقح-نین آزربایجان و تورکیه بؤلوملرینین باشلیجا فعالیتی مئدیا و مطبوعات اوزره یوغونلاشمالی‌دیر.
۶.آ.۶. بؤلوملر، میللی قورتولوشون مالیه قایناقلاریندان یارارلانیر، باشقانلیق کاتیب‌لیگی آراجیلیغی ایله یؤنتیم قورولو و قورولتایا حسابات وئریر.
۸.آ.۶. آزربایجان و تورکیه بؤلوملری، گامقح تشکیلات بؤلوموندن باغیمسیز اولدوغو حالدا، سورکلی کوردیناسیادا اولور.
۹.آ.۶. آزربایجان و تورکیه بؤلوملرینین سوروملوسو، آزربایجان بؤلوم باشقانی و تورکیه بؤلوم باشقانی آدلانیر.
۷. میللی قورتولوشون گونئی اوزره دایانیشما و فوند بؤلومو
۷.۱. گونئی آزربایجاندا گرگین میللی آزادلیق ساواشی گئدیر. سؤزسوزکی، آزربایجانین قورتولوشو اوغرونا جانیندان، مالیندان و بوتون یاشام وارلیغیندان کئچه‌ن میللی قهر‌مانلاریمیز آز دئیل. میللی قورتولوشون ان اؤنملی گؤره وی بو ایگیدلرین حاقلی سسینی دونیایا چاتدیرماقدیر.
۷.۲. آزربایجانین میللی قورتولوشو اوغروندا فارسچی رئژیمین باسقیلارینا اوغرامیش بوتون ایگیدلریمیزین دونیا گؤروشوندن، قوروم و ایدئولوژیک باغلانتی‌سیندان آسیلی اولمایاراق فردی و عایله وی احتیاجلاری تامین اولونمالی‌دیر. بو حاقدا میللی قورتولوشون گونئی اوزره دایانیشما و فوند بؤلومو وار اولان اولوسال و کورسل قایناقلاردان مالی ایمکانلار آختارمالی و گرکن یوللارلا آزربایجان میللی حرکاتینا چاتدیرمالی‌دیر.
۷.۳. فاشیست رئژیم، بیر چوخ حاللاردا میللی فعاللارین کؤرپه اوشاقلارینی، عائله وارلیغینی، ایش یئرلرینی و سوسیال حاقلارینی وحشی هدفینه معروض قویور. بو ایش رئژیمین آلیشدیغی آنتی بشری ذهنیتین اورونودور. سؤزسوزکی، میللی قورتولوشون بو قونولاری دا اله آلماسی گرکدیر.
۷.۴. آزربایجان میللی حرکاتی (آمح) گون کئچدیکجه فارسچی رئژیمین قورخولو یوخوسو اولور. بو اوزد‌ن رئژیمین آمح-ه قارشی اولان وحشی‌لیگی داها دا آقرئسیولشیر. میللی قورتولوش، رئژیمین آقرئسیولشن وحشیلیگینه اوغرامیش آمح-ه باغلی عائله‌لره یاردیم ائتمک اوچون بوتون ایمکانلارینی ایشه سالمالی‌دیر.
۷.۵. میللی قورتولوش، گونئی اوزره دایانیشما و فوند بؤلوموایله قادین، ائشیدلیک، اینسان حاقلاری بؤلمه‌لری آراسیندا بوتون آلانلاردا یاخین ایلیشکیلر اولمالی‌دیر. بو ایکی بؤلومون ایشبیرلیگی بیر چوخ حاللاردا میللی قورتولوشون تمل اولوسال ایدئولوژیسی ایله اوست-اوسته دوشمه‌یه بیلر. بئله کی، بو ایکی بؤلوم گئنیش اولاراق چوخ آلانلی اینسان و قادین حاقلاری اؤرگوتلریله ایلیشکیده اولابیلر، ایشبیرلیکلری قورابیلر. سؤزسوزکی، بو قونولاردا میللی قورتولوش یؤنتیم قورولونون توصیه‌لری دقته آلینمالید‌یر.
۷.۶. بو بؤلوم، میللی قورتولوشون گنل بودجه‌سیندن مالیلشیر، چالیشما راپورو یؤنَتیم قورولونا و یؤنَتیم قورولونون آراجیلیغی ایله قورولتایا تسلیم ائدیلیر.
۸. میللی قورتولوشون قادین-ائشیدلیک، اینسان حاقلاری بؤلومو
۸.۱. قادین اینسانلیغین آناسی‌دیر. قادینا هر تورلو باسقی اینسانلیغا قارشی جینایت ساییلیر. چاغداش دونیادا بوتون گرچک دئموکراسیلرین کؤکونده قادین-ارکک ائشیدلیگی دایانماقدادیر. فوندامئنتالیست فارسچی رئژیمین قادینا قارشی چاغدیشی وحشی باخیشی فارس اولمایان میللتلره ایکی قات جهنم یاراتمیشدیر. میللی قورتولوشون قادین دوشمنی اولان رئژیمه قارشی آپاردیغی مجادیله عئین زاماندا قادین حاقلارینین قورونماسی اوغروندا بیر سوسیال ساواشدیر.
۸.۲. میللی قورتولوش، بئله حساب ائدیر کی، آزربایجانین میللی قورتولوش ساواشی تورک قادینی اوچون ان گرکن اؤزگورلوک، ائشیدلیک و اینسانلیق آلانیدیر. بو اوزد‌ن، آمح-ده تورک قادینلارینین یئری نه بیر آددیم گئری، نه بیر آددیم ایر‌لی اولاراق، ارکک لرله اوموز-اوموزا اولمالی‌دیر.
۸.۳. میللی قورتولوش، قادین-ارکک، اینسان حاقلارینین ائشیدلی گینین یارانماسینین اؤزولونو اورتاق مجادیله‌ده، اورتاق پایلاشیمدا و اورتاق سونوجدا گؤرور. بو او دئمکدیرکی، اورتاق ساواشین گتیردیی بوتون قانونلارین اولوشومو قادین، ارکگین آیریمچی‌لیغی اولمادان یالنیزجا اینسانلیق آدینا گلیشمه لیدیر.
۸.۴. میللی قورتولوشون بؤلومو محض بو ایدعالارا دایاناراق قادین ائشیدلیگینی اؤز سیاسی یولو سئچن چئشیدلی قوروم-قورولوشلارلا گؤروشلر کئچیرملی، اورتاق ایشلر گؤرمه‌لیدیر.
۸.۵. بو بؤلوم، گونئی‌ده گئدن میللی مجادیله‌نین توتوقلو قادینلارینین دونیا اوزره هایقیران سسی اولمالی‌دیر. بو قونولاردا قادین-ائشیدلیک، اینسان حاقلاری و گونئی اوزره دایانیشما و فوند بؤلوملری آراسیندا سیخ ایشبیرلیگی گرکیر.
۸.۶. بو بؤلوم، میللی قورتولوشون گنل بودجه‌سیندن مالیلشمه‌لی، ایشلرینین حساباتینی یؤنتیم قورولونا و یؤنه تیم قورولونون – آراجیلیغی ایله قورولتایا راپور وئرمه‌لیدیر.
۸.۷. بو بؤلومون باشچیسی قادینلارا اؤزل توپلانتیلاردا، کنفرانسلاردا، ائیله‌ملرده گامقح باشقانی نین وکیلی کیمی چیخیش ائتمه ائتکی‌سینه صاحبدیر.
۹. میللی قورتولوشون تشکیلات (قورومساللاشما) بؤلومو
۹.۱. میللی قورتولوشون تشکیلات بؤلومو، قورومون چالیشما مئتودونو سئچیر، اونو یؤنلدیر. بو آلاندا گرکلی یؤنتملر پلانلاشدیریر. ان اویغون یؤنتیم فورماسینی ساغلاییر.
۹.۲. میللی قورتولوشدا اویه لیک سیاستینی اوسته‌لنیر. بو یؤنده یئنی عضوولرین ساغلاملیغینی آراشدیریر. یئنی عضوولرین سوروم آلماسینی و هانسی بؤلومه اویغون اولماسینی آراشدیریر.
۹.۳. میللی قورتولوشون کنفرانسلاری، توپلانتیلاری و گرکن ائیله‌ملرینین کئچیریلمه‌سینی اوسته‌لنیر. بو گؤروه لری دوزگون یئرینه یئتیرمک اوچون بؤلوم ایچی ایشچی قوروملار یارادیر.
۹.۴. میللی قورتولوشون گنل بودجه‌سیندن مالیلشیر. یاپدیغی بوتون ایشلرین حساباتینی یؤنه تیم قورولونا و اونون آراجیلیغی ایله قورولتایا راپور ائدیر.
۹.۵. میللی قورتولوشون بؤلگه، اؤلکه، شهر و بوتون تشکیلاتلاندیرما ایستراتئگیاسینی (آزربایجان و تورکیه جمهوریتلری دیشیندا)، گونئین دییشکه‌ن قوشوللاری ایله باغلی اویغونلاشدیریر و یؤنلندیریر.
۹.۶. آزربایجان و تورکیه جمهوریتلرینین بؤلوملری اؤزل شرطلره باغلی اولدوغو اوچون بیر باشا گامقح باشقان کاتیب لیگینه حسابات وئریر و ایستراتئگیا بلیرله ییر.
۹.۷. میللی قورتولوشون ایچ دوزه‌نینی اله آلماق اوچون قوروم بؤلمه‌لرینین ایچ دوزویونو طلب و تصدیق ائدیر.
۱۰. میللی قورتولوشون یاییم و ایله تیشیم بؤلومو
۱۰.۱. میللی قورتولوشون اینترنت، تبلیغات، ایلتیشیم و یاییم ایشلرینی اوسته‌لنیر. بؤلومون گئنیش آلانلی اولدوغو اوچون اؤزگون قوللار یارانیر.
۱۰.۲. بؤلوم ایچی قوللارین ائشید، اؤزگون و بیر-بیریله اویغون چالیشماسی اولدوقجا گرکلی‌دیر. هر گون یئنی بویودلار آلاراق، گئنیشله نن سانال دونیا تیمسل چالیشمالار طلب ائدیر.
۱۰.۳. بؤلوم ایچره چالیشمالارین تهلوکسیزلیگینی گؤز اؤنونه آلاراق، بؤلوم ایچره سالدیریلارا قارشی ساوونما قروپو یارانیر.
۱۰.۴. بو بؤلوم میللی قورتولوش آدینا لوببی و دیاسپورچالیشمالاری ائدیر. بو یؤنده اؤلکه‌میزین گرچکلرینی اولوسلاراراسی اینسان حقوقلاری تشکیلات لارا و ایلگیلی اورقانلارا چاتدیریر.
۱۰.۵. میللی قورتولوشون اولکولرینی، میللی ایدئیاسینی، ایستراتئژیک پلانلارینی ائورنسل آلاندا یایماق آماجی ایله تله-رادیو و چئشیدلی اینترنت آلانلاری یارادیر.
۱۰.۶. بؤلوم ایچی اینترنت قْوللاری یارادیر. اؤزوملو فینانس صاحبی اولور. یؤنتیم قورولو و یؤنه تیم قورولونون آراجیلیغی ایله قورولتایا حسابات وئریر.
۱۱. میللی قورتولوشون اینفورماتیک و میللی آراشدیرمالار بؤلومو
۱۱.۱. بو بؤلوم، میللی قورتولوشون بیلیمسل و ایستراتئژیک آراشدیرمالارینی اوسته‌لنیر. بو باغلامدا بؤلوم ایچی ایشچی قوروپلار یارادیر.
۱۱.۲. تورک دونیاسی و آزربایجانین اولوسال کیملیگینی، تاریخینی، دیلینی، گوندمینی آراشدیریر.
۱۱.۳. قورومون گله‌جک پلانلارینی و میللی-سیاسی یؤنلرینی آراشدیریر، اؤلکه، بؤلگه و کوره سل گلیشمه‌لری آن-با-آن اینجه لیر.
۱۱.۴. اولوسوموزون آیدین یاشامینی قارانتی آلتینا آلاجاق دؤولت پروقراملاری اوزرینده چالیشمالار آپاریر. بو قونولار اوزره بیلگیلندیرمه و تبلیغاتی بولتنلر یاییر.
۱۱.۵. باشقا قارداش تشکیلاتلار ایله اورتاق ایش پلانلاری ایره لی سورور و بو حاقدا گرکن گؤروشلرین نئجه لیگینی ساغلاییر.
۱۱.۶. میللی قورتولوشون گنل مالی قایناقلاریندان یارارلانیر. یؤنتیم قورولو و یؤنتیم قورولو آراجیلیغی ایله قورولتای قارشیسیندا سوروملولوق داشیر.
۱۲. میللی قورتولوشون فینانس و ائکونومی بؤلومو
۱۲.۱. میللی قورتولوشون آماجلاری، گؤروشلری و ائیله‌ملرینین فینانس ائدیلمه‌سی قورومون فینانس و ائکونومی بؤلومونون گؤره وید‌یر.
۱۲.۲. میللی قورتولوشون ایلک مالی قایناغی اولان اویه لیک حاقینین توپلانماسی و فینانس ائدیلمه‌سی بو بؤلومون اوزه رینده‌دیر.
۱۲.۳. فینانس و ائکونومی گلیر قایناقلارینین آراشدیریلماسی، فوند ایشلریله یاخیندان ایلیشکیده اولماسی بؤلومون ان اؤنملی گؤره وی ساییلیر.
۱۲.۴. بؤلوم یؤنتیم قورولو و یؤنتیم قورولونون آراجیلیغی ایله قورولتایا حسابات وئریر.
۱۳. میللی قورتولوشون دیل، کولتور، تاریخ و توپلوم بؤلومو
۱۳.۱. اولوسوموزون هاردا یاشاماسیندان آسیلی اولمایاراق بیر آد آلتیندا توپارلانماسینین ان اؤنملی اؤزولداشی دیل و کولتوردور.
۱۳.۲. دیل، کولتور و تاریخ ایشیغیند‌ا آیدینلاشان بیر توپلومون قلاووز چیراغی سؤنمزدیر.
۱۳.۳. میللی قورتولوشون ان گرکن ایشلریندن ساییلان دیل و کولتور بؤلومو گئجه-گوندوز بیلمه‌دن چالیشمالی، پانفارسیزمین میللی اریتمه ایستراتئگیاسینی چوروتملی‌دیر.
۱۳.۴. ایران آدلانان یئرده و دیشاریدا گئنیش آلاندا چئشیدلی درنکلرین یارانماسی اولوسال آماجیمیزا یؤنتم وئره‌جک ان دوغرو یو‌لدور. بو باغلامدا دونیا اوزره درنکلرین یارانماسی، بوتون میللی فعاللارین ان گرکن ایشلریندن ساییلیر.
۱۳.۵. یوخاری بندلری حیاتا کئچیرمک اوچون میللی قورتولوشون دیل، کولتور، تاریخ و توپلوم بؤلومو بیر باشا گؤره ولید‌یر.
۱۳.۶. بؤلوم، میللی قورتولوش طرفیندن مالیلشیر، یؤنتیم قورولو و یؤنتیم قورولونون آراجیلیغی ایله قورولتایا حسابات وئریر.
۱۴. میللی قورتولوشون سیاسی بؤلومو
۱۴.۱. سیاسی بؤلوم، میللی قورتولوشون گونده‌م گوزگوسودور. بو بؤلوم، میللی قورتولوشون گونده‌مینی حیاتا کئچیرمه‌سینی اوسته‌لنیر.
۱۴.۲. میللی قورتولوشون باشقا بؤلوملرینین سیاسال گونده‌می نین دینامیکاسینی اولوشدورور.
۱۴.۳. میللی قورتولوشون سیاسی بؤلومونون باشقا اؤنملی گؤره وی گونئین میللی-سیاسی گونده‌مینی دونیاداعکس ائتدیرمکدیر.
۱۴.۴. میللی قورتولوشون سیاسی بؤلومونون یؤنتملری ایله باغلی چئشیدلی قوللار یارانیر. آنجاق، یارانان قوللارین یؤنتیم قورولونون اونایی ایله اولماسی گرکدیر.
۱۴.۵. باشقا بؤلوملر کیمی، سیاسی بؤلوم ده یؤنتیم قورولونون آراجیلیغیلا قورولتای قارشیسیندا سوروملولوق داشیر.
۱۴.۶. میللی قورتولوشون پولیتیک سوروملوسو اولان بو بؤلومون باشچیسی اؤزه ل دوروملاردا گامقح باشقانینین سیاسی وکیلی کیمی گؤره و داشییر.
۱۴.۷. بؤلوم، میللی قورتولوش طرفیندن مالیلشیر، یؤنتیم قورولو و یؤنتیم قورولونون آراجیلیغی ایله قورولتایا حسابات وئریر.
۱۵. میللی قورتولوشون اولوسلاراراسی ایلیشکیلر بؤلومو
۱۵.۱. میللی قورتولوشون اولوسلاراراسی ایلیشکیلر بؤلومو، حرکاتین ائورنسل ایلیشکیلرینی اوسته‌لنیر. بو بؤلوم، میللی قورتولوشون کورسل گئنیشله‌نمه‌سی اوچون پروقراملار سونور، سوروملولوق داشیر.
۱۵.۲. میللی قورتولوش باشقانینین هر هانسی ندنله اولوسلاراراسی ایلیشکیلرده اولماماسی دورومدا، اولوسلاراراسی ایلیشکیلر بؤلومو باشچیسی باشقان وکیلی گؤروینی داشیر.
۱۵.۳. میللی قورتولوش باشقانینین ایسته یی و یؤنتیم قورولونون اونایی ایله اولوسلاراراسی ایلیشکیلر باشچیسی تک باشینا و یا سئچیله‌ن هئیتله بیرلیکده اولوسلاراراسی گؤروشلرده گامقح-نی تمثیل ائدیر.
۱۵.۴. داها گئنیش ایشله‌م اوچون بؤلوم ایچی ایشچی قوروملار یارادیر. یؤنتیم قورولونون اونایی ایله بؤلوم ایچی گؤروه لی لر سئچیر.
۱۵.۵. بؤلوم، میللی قورتولوش یؤنتیم قورولو و یؤنتیم قورولونون آراجیلیغی ایله قورولتای قارشیسیندا سوروملولوق داشیر.
۱۵.۶. میللی قورتولوشون اولوسلاراراسی ایلیشکیلر بؤلوم باشچیسی، گرکن دوروملاردا باشقانین اولوسلاراراسی ایلیشکیلر وکیلی کیمی گؤره و داشییر.
۱۵.۷. بؤلوم، میللی قورتولوش طرفیندن مالیلشیر، یؤنتیم قورولو و یؤنتیم قورولونون آراجیلیغی ایله قورولتایا حسابات وئریر.
۱۶. میللی قورتولوشون گنجلیک و ایدمان بؤلومو
۱۶.۱. شوبهه‌سیز کی، گنجلیک و ایدمان هر توپلوم اوچون آیریلماز اوبیئکتیو و سوبیئکتیو بیر بوتونلوکدور.
۱۶.۲. ایدمان بوتون آلانلاری ایله بیر توپلومون شنلیگینین، ساغلاملیغینین، دایانیشماسینین، یوکسلیشینین و تک آنلاملا میللی و ائورنسل تابلوسونون گؤرونتوسودور.
۱۶.۳. فارسچی شعوبی رئژیمین گنجلیگی ائتکیسیز دوروما دوشورمه‌سینین ان ییخیجی چاباسی اویوشدوروجو و فارسلاشمیش شیعه‌چیلیکدیر. رئژیم، اولدوقجا بو ایکی آنتی تورک سلاحدان یارارلانیر. میللی قورتولوشون ان اؤنملی ایشلریندن بیری آزربایجان تورک گنجلیگینی رئژیمین بو باتاقلیغیندان قورتارماقدیر. بو باغلامدا ایدمان آلانلاریندا آیدینلاندیریجی سلوقانلارین دیزای ائدیلمه‌سی و میللی فعاللار طرفیندن یاییلماسی چوخ گرکلی ایشدیر.
۱۶.۴. میللی قورتولوشون گنجلیک و ایدمان بؤلومو، آزربایجانین گونئینده گئدن بوتون ایدمان اولایلارینی ایزله‌ملی، اورالاردا فعال اولمالی‌دیر.
۱۶.۵. فارسچی رئژیمین آزربایجانا قارشی گئنیش آلانلی سیاسال، ائکومومی و توپلومسال آیری-سئچکی‌لیک ایستراتئگیاسی سورور و بونا قارشی، تورک گنجلیگی تاریخسل آلیشقانلیغینا دایاناراق، گنلده ایران ایسلام رئسپوبلیکاسینین ان ساغلام میللی وارلیغی ساییلیر. رئژیم، بوتون گوجو ایله ساغلام یاشامی آزربایجان توپلوموندان چالماغا چالیشیر.
۱۶.۶. گنجلیگیمیزین ایدمان یئرلرینده فعال اولماسی ایله رئژیمین بو چیرکین ایستراتئگیاسی ایچده‌ن چورویه‌جکدیر. میللی روحلو، ساغلام بد‌نلی و موتلو قالماغا چالیشان تورک گنجی قارشیسیندا مین بویالی رئژیم توزاقلاری بیر-بیر باشینا ییخیلاجاقدیر.
۱۶.۷. بو قاپسامدا، میللی آنلام داشییان «تراختور کولتور و ایدمان کلوبو»نون سیرالاریندا فعال اولماق، ان آزیندان رئژیم الینین قیسالماسیندا بؤیوک رول اوینایاجاغی شوبهه‌سیزدیر.
۱۶.۷. میللی قورتولوشون گنجلیک و ایدمان بؤلومو، بوتون بؤلوملر کیمی میللی قورتولوشون طرفیندن مالیلشیر. اؤز فعالیت راپورونو یؤنتیم قورولونونا وئریر و یؤنتیم قورولونون آراجیلیغی ایله قورولتایا سونور.
۱۷. میللی قورتولوشون تهلوکه‌سیزلیک اوزره اؤزل بلؤلومو
۱۷.۱. میللی قورتولوشون گوندن-گونه بؤیومه‌سی حرکاتیمیزین ان اؤنملی و باشلیجا آماجلاریندان بیری‌دیر. بو قاپسامدا بؤیومکله بیرلیکده گووه‌نلیک قونوسو دا اولدوقجا گرکلی‌دیر.
۱۷.۲. سؤزسوز کی، اولوسلاراراسی سانال دونیادا تهلوکه‌دن اوزاق قالماق اولدوقجا چتین ایشدیر. بو باغلامدا گامقح-نین ساغلام قالماسی، اؤزل‌لیکله فارسچی رئژیمین تهلوکه‌سیندن اوزاق توتولماسی اوچون سورکلی ایزله ییش و آختاریش گرکمکده‌دیر.
۱۷.۳. تیتیز داورانماق، تهلوکه‌لی نقطه‌لری کور ائتمک بو بؤلومون هر آن حرکتده اولماسینی طلب ائدیر.
۱۷.۴. میللی قورتولوشون تهلوکه‌سیزلیک اوزره اؤزل بلؤلومو، هر هانسی یالنیش گئدیشاتی گامقح باشقانی ایله پایلاشمالی‌دیر. بو باغلامدا بؤلوم باشچی‌سینین یؤنه تیم قورولونونا راپور حاضرلاماسی گرکمیر. بؤلومون راپورلاری آنجاق باشقانا وئریلیر. باشقان ایسه همین راپورو اینجه‌لمک اوچون گرکن ایشله‌ملری ایر‌لی سورور.
۱۷.۵. بؤلوم، میللی قورتولوشون گنل بودجه‌سیندن یارارلانیر. اؤزل راپورونو باشقانا سونور.
۱۸. گونئی آزربایجان میللی قورتولوش حرکاتینین سؤزجوسو
۱۸.۱. گونئی آزربایجان میللی قورتولوش حرکات سؤزجوسو، باشقان طرفیندن اؤنه ریلیر و یؤنه تیم قورولونون اونایندان سونرا گؤروه باشلاییر.
۱۸.۲. میللی قورتولوشون سؤزچوسو، یؤنه تیم قورولونونون ایشلرینی یاخیندان ایزله ییر، حرکاتین رسمی باخیشلارینی دوغرو بیچیمده دونیا مئدیاسینا اؤتورور.
۱۸.۳. میللی قورتولوشون مئدیا ایشلرینده یاخیندان امکداشلیق ائدیر، همین مرکزدن قورومون رسمی بیلگیلرینی یاییملاییر.
۱۸.۴. باشقانین ایسته گی و یؤنه تیم قورولونون اونایی ایله توپلانتیلاردا، گؤروشلرده گامقح-نی تمثیل ائدیر.
۱۸.۵. میللی قورتولوشون باشقانینین ایسته گی اوزره، اونونلا بیرلیکده رسمی گؤروشلرده ایشتیراک ائدیر، گرکن بیلگیلر پایلاشیر.
۱۸.۶. گونئی آزربایجان میللی قورتولوش حرکاتی سؤزجوسونون فعالیت دایره‌سی قورومون بودجه‌سیندن تامین ائدیلیر.
۱۸.۷. گونئی آزربایجان میللی قورتولوش حرکاتی سؤزجوسو، باشقانین ایسته گی ایله، یؤنتیم قورولونون عضوولری ایچیندن سئچیلیر و ایکی قورولتای آراسینداکی ایش دؤنمی سورجی اوچون قورولتایین اونایی ایله سئچیلیر.
۱۹. گونئی آزربایجان میللی قورتولوش حرکاتینین معاوینلری، مشاویرلری و کاتیب‌لیگی
۱۹.۱. باشقان، یؤنتیم قورولو ترکیبیندن اؤزونه یاردیمچیلار (۱.جی معاوین و معاوینلر)-موشاویرلر سئچیر، کاتیبلیک قورور.
۱۹.۲. باشقان، آتانان گؤره ولر اوچون یؤنه تیم قورولونونا باش وورور. یؤنه تیم قورولونون ساده سس چوخونلوغو ایله معاوینلرینی و موشاویرلرینی گؤروه لندیریر.
۱۹.۳. باشقانین اولمادیغی اؤزل دوروملاردا، ۱- جی معاوین قورولتایادک اونون ایشلرینی ایر‌لی سورور و گامقح-یه رهبرلیک ائدیر.
۱۹.۴. باشقان، بوتون دوروملاردا اؤز معاوینلری و موشاویرلریله کووردیناسیا توپلانتیلاری قورور، توپلانتیلارین سونوجونو یؤنه تیم قورولونونا راپور ائدیر.
۱۹.۵. باشقان، چئویک حرکت یاراتماق اوچون گامقح-نین باشکانلیق کاتیبلیگینی یارادیر. اونون ایشلرینه نظارت ائدیر.
۲۰. گونئی آزربایجان میللی قورتولوش حرکاتینین باشقانی
۲۰.۱. میللی قورتولوشون اولوسال چیخارلارینین گنل تمثیلچی‌سی، باش دانیشمانی باشقاندیر.
۲۰.۲. میللی قورتولوشون آدیندان توپلانتیلارا، ائیله‌ملره، گؤستریلره و چئشیدلی ائتکینلیکلره قاتیلیر.
۲۰.۳. میللی قورتولوشون توپلانتیلارینی یؤنلندیریر. بؤلمه‌لرین چالیشماسینی یاخیندان ایزله ییر. قوروم ایچره گرکلی دییشیکلیکلرین موذاکیره‌سینی آچیر.
۲۰.۴. گامقح-نین داها افئکتیو اولماسی اوچون اؤزونه یاردیمچیلار، مشاویرلر سئچیر، کاتیبلیک یارادیر و اونای اوچون یؤنه تیم قورولونونا سونور.
۲۰.۵. میللی قورتولوشون آیاقلانماسی یولوندا حقیقی و حقوقی شخصلرله ایلگی یه کئچیر و ایلگیلی قوروملارلا ایشگوزار گؤروشلر کئچیریر.
۲۰.۶. گامقح باشقانی، قورولتایدا سئچیلیر. ایکی قورولتای آراسی قورومون گنل باشقانی اولاراق سوروملولوق داشیر.
۲۰.۷. یؤنتیم قورولوندا اولان چاتیشمازلیقلارین قایناغینی آرادان قالدیرماق اوچون اولان اوستو قورولتای چاغیریر.
۲۰.۸. ختالی گؤردویو یؤنه تیم قورولونون اویه سینین ایشدن آلینماسی و یا قورولتایا قدر گؤره ویندن اوزاقلاشدیریلماسینی یؤنه تیم قورولونونا بیلدیریر.
۲۰.۹. باشقان، گامقح-نین قورولتاینی آچیر. میللی قورتولوشون ایکی قورولتای آراسی گنل راپورونو سونور، سورولاری یانیتلاییر. یئنی یؤنتیم قورولو سئچکی‌سی اوچون وارولان یؤنه تیم قورولونونون ایشدن آزاد اولماسینی ایسته ییر. قورولتایین سورمه‌سینی قورولتایدا سئچیله‌ن قورولتای دیوانینا تاپشیریر.
۲۰.۱۰. باشقانین یؤنتیم قورولو دیشیندا گیزلی ایش یؤنتمه‌سی کسینلیکله اولومسوز سونوجلارا یول آچابیلر. بئله اولان حالدا، یؤنه تیم قورولونون ¾ اوی چوخونلوغو ایله باشقانین سوروشدورماسی باشلاییر. سونوج اولومسوز اولارسا، ساده سس چوخلوغو ایله باشقان گؤره وینی گلن قورولتایا قدر “باشقانین ۱-جی یاردیمچی سینا”(معاوین) تاپشیریلیر.
۲۰.۱۱. هر هانسی ندنله، ایکی قورولتای آراسی باشقان گؤره وی بوش قالارسا، باشقانین ۱-جی یاردیم‌چیسی باشقان وکیلی حکمو ایله کئچه ری اولاراق گامقح-یه لیدئرلیک ائدیر. بو گؤره و، یؤنه تیم قورولونون ساده سس چوخونلوغو ایله نؤوبتی قورولتایا قدر رسمیلشیر.
۲۱. میللی قورتولوشون قاپانماسی
۲۱.۱. قورولتایین ¾ سس چوخونلوغو ایله میللی قورتولوش، اؤز ایشینه سون وئریر.
۲۱.۲. میللی قورتولوشون سونلانما سورجی قورولتایدا سئچیله‌ن ۳ نفرلیک قاپاتما قروپونا تاپیشیریلیر.
۲۱.۳. میللی قورتولوشون داشینار-داشینماز وارلیقلارینین حلی قاپاتما قورومونون اینسیاتیوینه وئریلیر.
۲۱.۴. میللی قورتولوشون رسمی لغویندن سونرا کیمسه اونون قاپادیلماسی اوزوندن سوچلو و یا سوروملو توتولمور.
۲۱.۵. میللی قورتولوشون قاپانیشیندان سونرا، یئنیدن جانلانماسی تعقیبسیز، مانعسیز و اولوملو ساییلیر. هر هانسی اسکی یؤنتیم قورولو عضوونون بو قاپسامدا اعتراض ائتمه‌یه حاقی یوخدور.
«گونئی آزربایجان ایستقلالی»، «بوتؤو آزربایجان دؤولتچیلیگی»، «توران ائوی» یولوندا ایر‌لی!
گونئی آزربایجان میللی قورتولوش حرکاتی-یؤنتیم قورولو
ایلک اونای ۲۰۲۲/۱۰/۰۱
سون رئداکته اونایی ۲۰۲۳/۰۹/۱۰
