فارسچی شعوبی رئژیم ایسرائیلین دئیل، فلیسطین ایستیقلالینین سینسی دوشمنیدیر!
گونئی آزربایجان میللی قورتولوش حرکاتی نین بیلدیریش
تاریخه دوشموش بیر دئیرکی: «ایرتیجاچی رئژیملر سؤمورگهچی دؤولتلرین چؤریی نین یاغیدیر»!
بو گونلرده دونیانی آغیر تهلوکه ایله قارشی-قارشیا قویان اوزده حماس-ایسرائیل ساواشی دورمادان سورمکدهدیر.
۲۰۲۳/۱۰/۰۷ سحر چاغیندان غزهدن ایسرائیلین گونئی زولاغینا فیرلانان سایسیز فوزه ایله دونیا شوکه گیردی. آددا حماس اؤرگودو، آرخادا ایسه هئچ قوشقوسوز ایران فارسچی شعوبی رئژیمین ایسرائیله قارشی گؤرونمه میش یوروشو بؤلگهنین سیاسال وولکانینی یئنیدن آتشلهدی. ساواشین ایلک گونلرینده هر ایکی طرفدن مینلر سیویلین اؤلومو بلیرلندی. حماسدان داها گوجلو اولان حزب آللاه و عحوسی لرین ده تئهران امریله ساواشا گیرمهسیله ۱۰ مینلرله سوچسوز سیویلین اؤلومو گؤزلنیلیر. علی خامنئینی سرمست ائدن حماسین تئررور وحشیلیگی ایسرائیله وئریلهن ان یئرینده هدیه اولاراق دونیا مئدیاسینا دوشدو. تئهران رئژیمی، حماسین سیویل قتل عامّینی فتحلرین فتحی آدلاندیراراق تام آنلامی ایله حماسین سیویللره سالدیریسینی منیمسهدی. آنجاق، چوخ کئچمهدن ایسرائیل اوردوسونون حماسا قارشی غزهنی گؤیدن، دنیزدن بومبایا توتماسی ایله خامنئیی بو کز ایسرائیلین وحشیلیگینی قتل عام اعلان ائدرک عرب و موسلمان دؤولتلری جوشدورماغا باشلادی. ایران، بو ایکی اوزلو سیاستیله سیویل اینسانلارا ان اوفاجیق ده یر وئرمه دیگینی بیر داها تصدیق ائدرک، اؤلکهلری موسلمان-یهودی ساواشینا چاغیردی. تئهرانین ساواش هاواسیندا نفس آلماسینی هرکس کیمی اؤز ال آلتیلاری دا بیلیر. اوممتچی رئژیم اوچون، ایستیقلال سؤزونون آنلامی یوخدور. بئله رئژیملر اوچون آنجاق آسیلقان، باخیملی و اسیر میللتلرین وارلیغی گرکیر. ایرانین دیپلوماتیک موناسیبتلرینه باخینجا بو گرچه گی چوخ آیدین باشا دوشمک اولار. بئله کی، دونیا اوزرینده ایرانین ایکی چئشید دوستو واردیر: آ) خالقلارینا دوشمن اولان دئسپوت حکومتلر. ب) ایران رئژیمیندن آسیلی اولان ایدئولوژیکسل تئرروریست اؤرگودلر. تئهران رئژیمینین ایکینجی گروپا، اؤزللیکله فلیسطینه قارشی اویونو تام آنلامی ایله ۱۸-۱۹-جو عصرین اینگیلتره اویونو ایله عئیندیر.
ایسرائیلین حماسی بیتیرهجک عملیاتینین سون سورجی هر آن باشلایا بیلر. مینلرجه گوناهسیز فلیسطینلی نین غزهدن قاچما شانسی یوخدور.
تخمینلره گؤره، حماسین الینده ۱۰-۱۵ مین ایران فوزهسی قالمیشدیر. حزب اوللاه، حوسیلر و ایسلامی جاهادین دا بؤلگه گوجونو بونا قاتارساق، لیواندا، سوریادا، یمن ده ده مینلر سیویل عربین قارا تورپاقلارا دوشمهسی گؤزلنیلیر. بو ایسه، فارسچی شعوبی رئژیمین ایللردن بری فلیسطین خالقی اوزرینده اویون قورماسینین آجی سونوجودور. تئهران رئژیمی، اینگیلترهنین ۱۹۲۱-جی ایلده فلیسطین ایستیقلالینا قارشی انگل قویماسینین تکراریدیر. ایللیک ۱ میلیارد دوللار حوسیلره، حماسا، حزب اوللاها و ایسلامی جاهادا سیجاق پارا اؤتورمکله یانی-سیرا سایسیزجا سلاح-سورسات و ارزاق وئرن تئهران رئژیمینین تک و باشلیجا شرطی ایسرائیله قارشی سورکلی ساواشدی. بو سورکلی ساواشین سونوجو ایسه، ایسرائیلی دئیل فلیسطینی یوخ ائتمک دئمکدیر. بو آنتی-بشری رئژیم اوچون ایسرائیل و فلیسطین سورونو سورمهلیدیر کی، بؤلگهده دانیشیق ماساسی قورولماسین!
بؤلگهیه نیفرت توخومو سپهن رئژیمین چالخانتیلی حیاتی آنجاق بئله تامین اولماقدادیر. رئژیم بونو یاخشی بیلیر کی، فلیسطینین حاقلی مجادیلهسینین تکجه یولو باریش یولودور. بو اوزدن ایسرائیل، حماس-الفتح ماساسینین قورولماسینین ان سینسی و گیزلی دوشمنی شعوبی ایران رئژیمینین دینی لیدئریدیر. تئهران مورتجعلری ایلک نؤوبهده فلیسطین خالقینی سیاسی قوروملار آراسیندا پارچالاماغا، آردیجا ساواش آلانی آچماغا چالیشیر. ایران آدلانان دینسل رئژیمینین ائرمهنی فاشیزمینین موسلمان سویقیریمینا گؤز یومماسی، آزربایجان تورکلرینین قانینی تؤکهن ائرمنیستان دؤولتینه ۳۰ ایل بویونجا ایشغال پیریمی وئرمهسی، یمنده، افغانیستاندا، عراقدا، سوریادا، لیواندا و همین فلیسطینده موسلمانلاری موسلمانا قیردیرماسی، فارسچی شعوبی رئژیمین جینایتکار سیماسینی گؤستریر.
آزربایجان تورک میللتی بیر ایستیقلاچی میللت اولاراق هر زامان اسیر میللتلرین میللی قورتولوش و ایستیقلالچی حاقلارینین یانیندادیر. آنجاق، قورخونج ایشغالچی فارسچی شعوبی رئژیمین تئررور ماشاسی اولان حماس کیمی سیویلیزاسیا قارشیدی تئررور اؤرگوتلرینین قارشیسیندا اولدوغونو آچیق-آیدین اؤنه چکیر.
گونئی آزربایجان میللی قورتولوش حرکاتی باشقانی ائلدار قاراداغلی
۲۰۲۳/۱۰/۱۲
