آزربایجان قورتولوش پارتیاسی
دونیا قادینلار گونونو قوتلاییر
آزربایجان میللی حرکاتینین ان سون قادین شهیدلریندن گؤرونتولر
گونئی آزربایجان گؤزو ایله ۸ مارت
۸ مارت – بئینلخالق قادینلار گونو، گونئی آزربایجاندا یالنیزجا جنسی برابرلیگینین دئیل، عینی زاماندا میللی حقوقلار اوغروندا مباریزه‌نین ده سیموولیک گونودور. ایران فارسچی-شعوبی رئژیمی آلتیندا اینله‌ین آزربایجان تورک قادینلاری عئین زاماندا میللی و بیولوژیک آیری-سئچکی‌لیگی ایله قارشی-قارشیادیر. قادینلارا قارشی ایکی قات توپلومسال، حقوقسال، مذهبسل و ائکونومی باسقیلارلا یاناشی میللی وارلیقلارین ان ایلکین حاقلاریندان بئله، یوخسوندور. بو ایسه، دونیادا باشقا اؤرنگی اولمایان ۲۰ میلیونلوق قادین توپلوسونا اولان ان درین آنتی بشری گرچکدیر. بوتون بونلارا باخمایاراق، گونئی‌لی تورک قادین، تام میللی-سیاسی حاقلارینی الده ائتمک اوچون اؤز میللتیله اوموز-اوموزا آیاقدادیر.
آزربایجان میللی حرکاتیندا قادینلارین رولو
تورک قادینی، آزربایجان میللی حرکاتین اونورقاسی‌دیر دئسک یالنیش چیخماز! قادینلاریمیزین میللی حرکاتین اؤن سیرالاریندا یئر آلماسی هئچ ده تملسیز دئیل‌دیر. بو اؤندرلیک تورک تاریخینین درینلریندن گلن بیر میللی گلنه کدیر. تورک قادینی تاریخ بویو یالنیز آچیق آلانلاردا و گؤز اؤنونده دئیل، ساواشلارین گؤزه گؤرونمز ان درین دویونلرینین آچاری اولموشدور.
گونئی آزربایجان تورک قادینی، فاشیست رئژیمین آزربایجانلی عائله‌لره قارشی ویران ائدیجی ایستراتئژی‌سینی صیفیرلایان، ائتکیسینی مینیمال اؤلچویه دوشوره‌ن ان ییلماز میللی حرکاتچی‌دیر. فارسچی -شریعتچی رئژیمین سینیرسیز باسقیلارینا باخمایاراق، گونئی‌لی تورک قادینین اؤزوئریسیله آزربایجان میللی حرکاتینین گوندن-گونه گوجله‌نمه‌سی بوتون توپلومسال آلانلاردا گؤرونمکده‌دیر. حاضردا بیر چوخ میللی قادین تبریز، کرج و باشقا آزربایجان شهرلرینده توتوقلو اولاراق زیندانلاردادیر.
۲۰۲۲-جی ایل ایراندا آیاقلانما و گونئی آزربایجان قادینلاری
گؤرونن تابلویا گؤره، ۲۰۲۲ ایران اعتراضلاریندا آزربایجانین اؤنجول رولو یوخ ایدی. بونون ان باشلیجا ایکی سوروسونو بئله جاوابلاماق اولار: آ) آزربایجان تورک قادینی سورونلارینین چؤزومونو یالنیز تبریز مرکزلی آزربایجان میللی حرکاتیندا گؤرور. اونون اوچون یوز ایللیک میللی-سیاسی و دؤولتچی‌لیک اسارتین سونوجلاری گؤز اؤنونده‌دیر. گونئی‌لی قادین آرتیق یالان-دولانلارلا دئیل، گرچکلریله یاشاماق ایسته ییر. بونا گؤره، باجاردیقجا اؤزونو ایران ایچی اولایلاردان اوزاق توتماغا، بوتون ائنرژی‌سینی اؤز میللتینین و یوردونون قورتولوشونا وئرمه‌یه قرارلیدیر. ب) بونا رغمه‌ن، بیر چوخ آزربایجان تورکو بو قانلی اولایلاردا جانیندان اولدو. اونلار ساده‌جه ایران خلاصی، قادین آزادلیغی اوچون دئیل، بیر میللی یوخسوللوق ایچینده اینله‌ین اینسان اولاراق عصیان بایراغی قالدیردیلار. بو آرادا بیر چوخ تورک قادینی آل قانلاری ایله اؤزگورلویون نه قدر سینیرسیز اولدوغونو گؤسترمیش اولدولار. آنجاق، قانینی وئرن بو سویداشلاریمیز بئله، ایرانچی-فارسچی ایچ و دیش مئدیاسینین بویکوت قصدیندن اوزاق قالمادیلار. فارس مئدیاسی آچیق-آرا تورک ائتنیکلی هلاک اولانلارین کیملیگینی گیزله‌ده‌رک اؤز دوشمنلیگینی آزربایجانلا گیزلی توتا بیلمه‌دی.
گونئی آزربایجان قورتولوش پارتیاسینین قادینا باخیشی
گونئی آزربایجان قورتولوش پارتیاسی (گاقپ)، توپلومون بوتون آلانلاریندا، قانونلاریندا، حقوقلاریندا، جزا آلانیندا قادینلارین ارککلرله تام ائشیدلیگینی ساده‌جه ساوونمادا دئیر، او یولدا تام آنلامیلا ساواشدا گؤرور. چونکی، بیر میللتین میللی قورتولوش ساواشی اونون بوتون قاتمانلارینین قاتیلیمی ایله اولاسی‌دیر. قادین، توپلومون ان سوروملو یاریسی‌دیر. بیر توپلومون آزادلیغی اونون سوروملولوغونو قبول ائدن اؤنده رلیگی ایله مومکوندور. بو اوزدن، گاقپ تورک قادینین میللی حرکاتدا فعال ایشتیراکینی واجیب حساب ائدیر و اونلارین لیدئرلیک مؤقعیه یوکسلمه‌سینی گرکلی ساییر.
گونئی آزربایجان قورتولوش پارتیاسی
۷مارت۲۰۲۵
