گونئی آزربایجان قورتولوش پارتیاسیندان بیرلیک چاغریسی
سئویملی آزربایجان تورک میللتی،
دئیرلی گونئی آزربایجان تشکیلات باشچیلاری!
یوردوموزون گله جگی، میللتیمیزین آزادلیغی و وارلیغینین قورونماسی اوچون بیرلیگیمیزدن گوج آلاراق یولوموزو سورمه لییک.
گونئی آزربایجان قورتولوش پارتیاسی (گاقپ) اولاراق اینانیریق کی، گونئیمیزین باغیمسیزلیغی و اولوسوموزون آزادلیغی یالنیز و یالنیز میللی بیرلیکدن، اورتاق یورومکدن الده ائدیله بیلر.
بیزیم یولوموز میللتیمیزین آزادلیق، عدالت و میللی حکومت یولودور! یاخین کئچمیش تاریخیمیزده دفعه‌لرله بیزی-بیزدن قوپاراراق دوشمنلریمیزین الوئریشلی آوینا چئویردیلر. بو آجی سوره‌جه، آنجاق بیرلیک ایچینده اولدوغوموز زامان سون قویا بیلریک. آنجاق، بیرلیک آتموسفری ایچینده حاقلاریمیزی الده ائده بیلریک. فرقلی دوشونجه‌لریمیز اولسا دا، سؤزسوز کی آماجیمیز بیردیر: گونئی آزربایجانین میللی قورتولوشو، باغیمسیزلیغی و میللی دؤولتچی‌لیگی!
دئیرلی میللی فعاللار، سایین تشکیلات مسئوللاری!
چوخ آغیر سوره جدن کئچیریک. میللتیمیزین بو سورجدن اوغورلو کئچمه‌سی اوچون آیدینلاریمیزین میللی غیرتینه، خوشگؤروسونه، ایشبیرلیگینه احتیاج وار. بو یولدا سیزلری قئیدسیز-شرط‌سیز گؤروشلره چاغیریریق. بیز، هر هانسی آشیری ائقودان، سیاسی احتراسدان آزاد اولمالی ییق. سون اورمو یوروشو، بیر داها توپلوموموزون نه درجه بیرلیگیه احتیاجینی گؤسترمیش اولدو. اورمو یوروشونده توپلومون بوتون قاتمانلاری—قادینی، ارکه گی، اؤیرتمه‌نی، اؤیرنجی‌سی، صنعت‌چیسی، اینجه صنعت‌چیسی، ایشچی‌سی، ایشسیزی، اکینجی‌سی، یازاری، شاعری، سیاست‌چیسی، حقوقچوسو، دوکتورو، مهند‌سی، دینچی‌سی، دین‌سیزی، وارلی‌سی، یوخسولو، گنجی، یاشلی‌سی وب.— فرق‌لیکلریندن آسیلی اولمایاراق، وطن، میللت، تورپاق آدینا بیرلیک، دیریلیک و وارلیق گؤستریسی سرگیله‌دیلر. بو، بیز میللی-سیاسی تشکیلاتلار و فعاللار اوچون ان بؤیوک اؤرنکدیر. بیز، یا میللتیمیزین سئچدیگی بیرلیک یولونو سئچمه‌لی، یا میللتیمیزین گؤزوندن، سئوگی‌سیندن سیلینمه لییک.
میللی دوشمنلرین اومیدلرینی یاسا چئویرمک اوچون آیریلیقلارا سون وئرمکدن باشقا یولوموز یوخدور. میللتلشمه، دؤولتلشمه یولوندا دیلده-دوشونجه‌ده-ایشده بیرلیک فلسفه‌سیندن آیری دوشمه مه لییک. بو بیر کؤنول سئچیمی دئیل، اولوسال زورونلولوق و گرکن جبردیر.
بیرلیکدن گوج دوغار! گونئی آزربایجان اوچون بیرلشه لیم!
گونئی آزربایجان قورتولوش پارتیاسی
۲۰۲۵/۰۳/۲۷
بیرباشا ایلیشکی:ا.قاراداغلی۴۶۷۰۴۶۴۵۲۴۴ +
