آزادلیق – عدالت – میللی حکومت
آزربایجان میلی حؤکومتی نین باش ناظری
سید جعفر پیشه وری
گونئی آزربایجان قورتولوش پارتیاسی نین « آزربایجان میللی حکومتی» نین ۷۹-جو ایل دؤنومو ایله باغلی بیلدیریشی
(هر ایل، شانلی ۲۱ آزر اؤزونون ایل دؤنومونده بیزه بیرلشین، بوتونلشین، ایری اولون، دیری اولون، خطایا دوشمه گین، اؤزگه ائوینه چیراق اولمایین، باشقالارینا بئل باغلانمایین،
تورکلویونوزه دایانین، آزربایجانیزا ییگه‌له‌نین اؤیودو وئریر!
بیز ایسه، ائقولاریمیزا، بیریسل هوسلریمیزه، قروپسال چاتیشمالارا یئنیک دوشرک ۸۰ ایللیک دادلی-دادسیز تجروبه‌دن درس چیخارا بیلمیریک!!!)
سایغیلی آزربایجان تورک میللتی!
قان ایچینده بوغولان اورتادوغو گوندن-گونه آغیر سیناقلاردان کئچمکده‌دیر. ایرانین فارسچی-شعوبی رئژیمی بوتون تئررور آیاقلارینی بیر-بیر الدن وئریر. اؤنجه حاماس، آردیجا حیزبوللاه، ایندی سوریه دیکتاتوراسی،
یاخین گله‌جکده ایسه بشریتین اوزقاراسی، دونیایا زهر ساچان ایلانین باشی فارسچی موللالار رئژیمینین چیرکین وارلیغی یوخ اولاجاقدیر!
آمئریکا آددیم-آددیم اورتادوغو پرویئکتینی ایر‌لی سورمک اوچون ایسرائیلین گئنیشلنمه ایستراتئگیاسینی بوتون بؤلگه‌یه یایماقد‌ادیر.
کورسل سیاستده گونئی آزربایجان گرچکلیگی گوندن-گونه آرتماقدادیر. بو ایل، بوتون کئچمیش ایللردن داها آرتیق بیرلیکده اولماق گرکیر.
بو ایل، تک یومروق اولاراق، تورپاق، وطن، میللت، دؤولت دئیه «آزادلیق-عدالت-میللی حکومت!» آختاریشیندا یوردوموزون آزادلیغینی هایقیرمالییق. بو ایل، داها آرتیق تورکچولوک اینامینا دایاناراق،
آزربایجانین اؤزگورلویو، باغیمسیزلیغی ایله اؤتوشوب-یانان میللتچی گنجلیگیمیزین سسینه سس اولمالییق.
سئویملی میللتیمیز!
شانلی ۲۱ آزر روحو بیزدن بیر سون میللی ساواش ایسته ییر. بو گون، ایشغالدان قورتولوش گونودور. یوردوموزو، اولوسوموزو ایرانی‌لیک بویوندوروغوندان قورتارمالییق. میللتیمیزین وار اولان کیملیگینی اونا قایتارمالییق.
بو زامانین حکمو، اینسانلیغین تمل داشی‌دیر.
۲۱ آزر روحونو یاشاتماق اوچون گونئین دؤولتچیلیگینی یاشاتماق گرکیر. بونا گؤره، اؤزونو «آزربایجان میللی حرکاتی»نین بیر پارچاسی بیلن بوتون چئشیدلی باخیش آچیسی اولان «دیلداش، سویداش، وطنداش» قوروملارین بیر آرادا اولماسی میللی بورج ساییلیر.
باشقا آنلامییلا ایدئولوگیا یاریشمالارینی اؤز دوغما دؤولتیمیزین چاتیسی آلتیندا کئچیرملی ییک. بو اوزدن ۲۱ آزرین شانلی-قانلی روحونو داها نیسگیللی، داها حسرتلی دویماماق اوچون:
۱- ایستیقلال‌چی، فئدئرال‌چی، موختارچی آیریم‌چیلیغی ائتمه‌دن بوتون میللی-سیاسی حرکاتلار، پارتیالار، تشکیلاتلار، جبهه‌لر و چئشیدلی میللی قوروملارین آزادلیق-عدالت-میللی حکومت شوعاری آلتیندا بیرلشمه پوتانسیئلری آرتمالی،
۲- قارداش قوروملارین آراسیند‌ا اولان فرقلی دوشونجه‌لرین اینجه‌له‌نمه‌سی اوچون اورتاق سانال گؤروشلرین کئچیریلمه‌سی ساغلانمالی،
۳- ایران آدلانان دؤولتین بوتون اورقانلاری چورومکد‌ه‌دیر. ییخیلاجاق فارسچی-شعوبی رئژیمدن سونرا نه ائدیله‌جک ایستراتئژیلرین اله آلینماسی دانیشیلمالی
۴- باشقا میللتلرین میللی قوروملاری ایله اورتاق ایش خریطه‌سی اورتایا قویولمالی،
۵- گونئی‌ده و ایران آدلانان آچیق زیند‌اند‌ا جانینی، مالینی، عائله‌سینی و بوتون وارلیغینی آزربایجان وطنی اوغرونا قویان ایگیدلریمیزین گنل دورومو اله آلینمالی،
۶- آزربایجان میللی حرکاتی (آمح) آدینا اورتاق مئدیا مرکزی یارانمالی،
۷- گونئی آزربایجان اوچون میللی فوندون یارانماسی اوغروندا سفربر اولمالی، تانینمیش میللی سیاسی بؤیوکلرین بو ایشه جلب اولونماسی،
۸- بروکسئل و بئرلین یوروشلرینین آردینین گلمه‌سیله باغلی دانیشیقلارا باشلانمالی و بو کیمی یاخینلاشما میکانیزملرین آکتیولنمه‌سی گرکلی ساییلیر.
بیز گونئی آزربایجان قورتولوش پارتیاسی اولاراق یوخاریدا سادالانمیش بوتون اؤنه ریلره آچیق اولدوغوموزو بیلدیریر، قئیدسیز-شرط‌سیز اولاراق بوتون قارداش تشکیلاتلاری و میللی-سیاسی فعاللاری دیالوغا چاغیریریق.
«سن چاغیرسان گلر‌م من، سن یاشا آزربایجان!
سن دئسه‌ن اؤل، اؤلره‌م من، سن یاشا آزربایجان!»
یاشاسین قانلی ۲۱ آزر شهیدلرینین اؤلمز خاطیره‌سی!
گونئی آزربایجان قورتولوش پارتیاسی
۲۰۲۴-۱۲-۱۰
