گونئی آزربایجان میللی فعاللارین آزادلیغی اوچون ایمضا کامپانیاسی،
سوسدورولان سسیمیزی یئنیدن اوجالداق .
گونئی آزربایجان میللتینین تمل حاقلاری اوچون موباریزه آپاران میللی فعاللاریمیزین سسی اولاق.
شوونیست ایران رئژیمینین ظولمو آلتیندا اؤز آنا دیلینده تحصیل و اورمو گؤلونون یاشادیلماسی حاققینی طلب ائدن جسور گونئی آزربایجانلی میللی فعاللار ،سادهجه حقوقلارینی مدافعه ائتدیکلرینه گؤره حاقسیز اتهاملارلا محکوم ائدیلیبلر. بو اینسانلار، یالنیز اؤز دهیرلرینی قوروماق و گونئی آزربایجانین طبیعی و مدنی ایرثینی یاشادماق ایستهدیکلری اوچون، هئچ بیر اساس اولمادان ۸۷ ایل آزادلیقدان محروم ائدیلیبلر.
ایران رئژیمی اونلارین آزادلیق سسینی سوسدورماغا چالیشسادا ،بیز بیرلهشرک بو سسی یئنیدن اوجالدا بیلهریک .
بو مبارزه یالنیز حبسده اولان فعاللارین دئییل، بوتون گونئی آزربایجانین مبارزهسیدیر. اونلارین حاق ساواشینی بیرگه دستکلهیک، بیر ایمضا ایله آزادلیق ایشیغینا گوج قاتاق.
حبس اولونان جسور فعاللار و حاقسیز حبس جزالاری:
۱. آیاز سیف خواه ۱۳ ایل حبس
۲. باقر حاجی زاده ۱۳ ایل حبس
۳. آراز امان زین آباد ۱۳ ایل حبس
۴. طاهر نقوی ۶ ایل حبس
۵. مرتضی پروین ۶ ایل حبس
۶. حسین پیری ۵ ایل حبس
۷. سالار طاهر افشار ۵ ایل حبس
۸. ودود اسدی ۴ ایل ۶ آی حبس
۹. سعید مینایی ۵ ایل حبس
۱۰. کمال نوری ۳ ایل حبس
۱۱. سلیمان محمدی ۳ ایل حبس
۱۲. عبدالعزیز عظیمی قدیم ۶ ایل حبس
۱۳. محمد رضا فقیهی(گونئی آزربایجانلی حقوق شناس ) ۵ ایل حبس
بو حاقسیز حبس قرارلاری، ایراندا میللی حاقلارا قارشی اولان باسینجلارین(تزیقلرین )بیر سمبولودور. ایران رئژیمی آنا دیلیمیزده تحصیل حاققینی قاداغان ائدهرک، اورمو گؤلونون مقصدیؤنلو شکیلده قورودولماسینا شرایط یاراداراق گونئی آزربایجان میللتینین ایرادهسینی بوغماغا چالیشیر. آما بیزلر بو حاقسیزلیغا بویون ایمهیهجهییک ،میللی فعاللاریمیزین سسینی دونیا اجتماعیتینه چاتدیراجاییق .
بو ایمضا ایله حاققیمیزا صاحیب چیخاق، دونیا سویهسینده دستهییمیزی گؤستهرک.
توپلادیغیمیز ایمضالار، بیرلشمیش میللتلر تشکیلاتینین اینسان حاقلاری یوکسک کمیسارلیغینا و باشقا علاقهدار بینالخلق قوروملارا تقدیم ائدیلهجک. گونئی آزربایجانین سسینی یئنی دن اوجالداق، عدالت اوچون بیرلیک اولاق.
بو مبارزه ده یالنیز دئییلیک. بیر ایمضا ایله عدالتین یانینداییق، حاقسیزلیغا یوخ دئییریک.
