Ərdəbilin cümə imamı yenidən Azərbaycana qarşı ittihamlar səsləndirib
İranın rəhbəri Seyid Əli Xameneyinin Ərdəbil əyalətindəki nümayəndəsi və Ərdəbil şəhərinin cümə imamı Seyid Həsən Amili sentyabrın 9-da cümə namazı çıxışında yenidən Azərbaycana qarşı ittihamlar irəli sürüb.
Həsən Amili Azərbaycan hökumətinə məsləhətlər verməyə də cəhd edib.
Cümə imamı Azərbaycan hökumətinin xalqı özünə düşmən etdiyini deyib və “azəri”lərin telefon danışıqlarında qan ağladıqlarını söyləyib.
O, çıxışının ardında Ərbəin mərasimlərindən siyasi məqsədlərlə istifadənin vacibliyindən danışıb.
Ərdəbilli molla bu mərasimlərdən fərdi, ölkə və beynəlxalq səviyyədə yetərincə faydalanmağın, “imprializmə qarşı etiraz yürüşü” kimi keçirilməsinin lazım olduğunu söyləyib.
“Bu yürüş beynəlxalq təkəbbürə qarşı etiraz yürüşünə çevrilməli və beynəlxalq idarəetmənin hazırkı vəziyyətinə etiraz edənlərin hamısı bu mərasimdə iştirak etməlidir”-deyə, Amili insanları dini mərasimdən siyasi istifadəyə çağırıb.
