Sevgili Arif bəy Rəhimoğlu!
Sənin həyat yolun, gəncliyindən son nəfəsinə qədər, Azərbaycan Türk millətinə həsr olunmuş müqəddəs bir amal idi. Bu amalın yükünü çiyinlərində daşıyaraq, sən həm sözünlə, həm də əməlinlə millətinə yol göstərdin.
Bu gün – sənin 70-ci ildönümündə – sevənlərin səni bir daha ehtiramla yad edir. Sən fiziki olaraq aramızda olmasan da, qəlbimizdə, düşüncələrimizdə və millətimizin yaddaşında daim yaşayacaqsan. Çünki ölməzlik – millətinə xidmətlə qazanılır, sən isə bu ölməzliyi çoxdan qazanmısan.
Heç şübhəsiz ki, ömrünü sədaqət və xalis niyyətlə öz doğma millətinə və vətəninə həsr etmiş insanlar bir ömür yaşamış deyil, əsərləri və qoyduğu izləri ilə nəsildən-nəsilə yaşayır. Belə insanlar iki xüsusiyyəti ilə seçilirlər:
- Millətinin içində yaratdığı toplumsal-bəşəri dəyərlər və əxlaqi davranışları ilə;
- Günlərini aylara, aylarını illərə qatan fədakarlıqları və yazdıqları əsərləri ilə gələcək nəsillərə örnək olaraq.
Arif Rəhimoğlu Azərbaycan Türk Millətinin dərdi və qayğısı ilə yaşamış, yaratmış, ömrünü millətinə bağışlamış o nadir insanlardan biridir. Onun kimi insanların bir millət üçün dəyəri, qısa ömürləri ilə deyil, millətin yaşadığı sonsuzluğa qədər uzanan əbədiyyətlə ölçülür.
Mənim üçün Arif bəy yalnız 30 illik bir dost deyil, sonu gəlməz bir yol yoldaşıdır. Çünki bu yoldaşlıq – bir millətin, bir vətənin, bir bayrağın, bir dövlətin daimi yaşaması uğrunda ölümsüz bir ruhsəllikdir. Bu ruhsəllik bizdən öncə də var idi, bizdən sonra da olacaqdır – bizlə də, bizsiz də!
Arif canımızdan bir parçanı özü ilə apardı, amma yolu gedərli, adı-sanı 50 milyonluq millətimizlə əbədi yaşayacaqdır.
Ad günün millətimizə qutlu olsun, ölməz Arifimiz!
Güney Azərbaycan Qurtuluş Partiyası Başqanı Eldar Qaradağlı
2025.08.23
